Bisedimet për arritjen e armëpushimit në Ukrainë/ Përfundon pas dy orësh telefonata e Trump me Putinin, presi...
GJKKO dërgoi dosjen "Partizani" për gjykim, Gjokutaj: Do të ecet me gjykim të zakonshëm, ja pse nuk e kemi kërkuar...
Ulsi Manja prezanton rekomandimet e qeverisë në luftën kundër krimit: Të shmangen vonesat e hetmeve, të përdo...
"Kosova ka nevojë për institucione", Abdixhiku: E pakuptueshme që një parti me 48 deputetë nuk arrin të bëj&e...
• Partia Demokratike dhe LDG me pjesëmarrjen e Bordit Ekzekutiv të CDI Women dhe me pjesemarrjen e Kryetarit të koalicionit PD-ASHM, Sali Berishë, organizuan sot konferencën ndërkombëtare "Global She: Voices of Power, Unity, and Change". • Kryedemokrati Sali Berisha ka marrë pjesë sot në konferencën ndërkombëtare të organizuar nga LDK me temë “Global She”. • Berisha tha se Partia Demokratike do të luftojë kundër murit të patriarkisë. Berisha shtoi s këto 12 vite kanë qenë më të vështirat për gratë dhe vajzat shqiptare. • Berisha tha më tej se kur kryeministri Edi Rama erdhi në pushtet tha se do ndalonte lojërat e fatit se ato krijojnë shumë probleme familjare duke shtuar se ai jo që nuk i ndaloi lojërat e fatit, por përkundrazi lojërat e fatit i shtoi në duart e banditëve dhe u shtoi atyre drogën. • Berisha tha se ministret e kryeministrit Rama sillen si badigardet e Gadafit, të cilat i thurnin lavdi këtij të fundit. • Berisha shtoi se ato nuk tregojnë dot asnjë projekt në mbështetje të grave në këto 12 vite në pushtet. • Zëvendës presidenti i CDI, Elmar Brok, ka marrë pjesë në konferencën ndërkombëtare të organizuar nga LDK me temë “Global She”. • Brok tha se Shqipëria nuk do të jetë pjesë e BE në vitin 2030, për arsye se Edi Rama e ka kthyer Shqipërinë në një narkoshtet. Ai shtoi se socialistët në Gjermani e marrin pushtetin vetëm për të rrëzuar shtetin, kurse sipas tij, konservatorët rrisin ekonominë. • Brok shtoi se Europa dhe Gjermania ndodhen sot në sfida të mëdha, por askush nuk mund të mohojë rolin e saj të rëndësishëm në mbrojtjen e institucioneve dhe stabilitetit ekonomik në kohë të vështira. • Ministrja e Kulturës në Kroaci, Nina Obuljen, ka marrë pjesë në konferencën ndërkombëtare të organizuar nga LDK me temë “Global She”. • Obuljen shprehu mbështetje të qartë për politikat që promovojnë pjesëmarrjen e grave në vendimmarrje dhe fuqizimin e rolit të tyre në shoqëri. • Ajo ka ndarë përvojën e saj si grua me një karrierë të gjatë në politikë, teksa vlerësoi reagimin e grave shqiptare ndaj temave të trajtuara në këtë forum, veçanërisht në kontekstin e vlerave të përbashkëta. • Në fjalën e saj, ajo theksoi rëndësinë e ruajtjes së parimeve tradicionale, përballë sfidave moderne si populizmi, keqinformimi dhe polarizimi social, duke vënë theksin te mundësitë e barabarta, dinjiteti njerëzor dhe respektimi i të drejtave të grave – si shtylla themelore mbi të cilat ndërtohet një shoqëri demokratike dhe progresiste.
5 artikuj për këtë temë.
TIRANË- Është zhvilluar sot Konferenca Ndërkombëtare e organizuar nga LDK-ja me temë ‘Global She’. Në këtë konferencë mori pjesë edhe Sekretarja për Çështjet e Drejtësisë Familjare në Venezuelës, Marry Ponte e cila theksoi se Shqipëria ka të njëjtin regjim si në Venezuelë.
Ponte tha se çdo qytetar shqiptar duhet të luftoj për të drejtën e lirisë së individit, pasi njësoj si në Venezuelë, edhe në Shqipëri do të mbizotërojë frika.
PJESË NGA FJALIMI:
“Së pari, dua të falënderoj organizatorët dhe të gjithë ju këtu në Shqipëri që më ftuat për të ndarë përvojën time. Unë jam nga Venezuela dhe aktualisht jetoj në mërgim, në ekzil në Spanjë. Dua të flas për lirinë. Në Venezuelë kemi tashmë 26 vjet nën një regjim që erdhi në pushtet përmes votës, por që nga viti 1999 e deri më sot ka manipuluar zgjedhjet për të qëndruar në pushtet. Gjatë këtyre 26 viteve, ky regjim ka shkatërruar vendin, ekonominë, institucionet; ka rritur korrupsionin, pasigurinë, trafikimin e drogës dhe ka përndjekur drejtuesit e opozitës. Për këtë arsye, shumë prej nesh jemi larguar nga vendi, jo vetëm drejtuesit e opozitës, por edhe qytetarët e thjeshtë.
Sot, jemi gati 9 milionë venezuelanë të shpërndarë në të gjithë botën. Ata janë bërë ekspertë në krijimin e frikës tek popullata: i detyrojnë njerëzit të mendojnë dhe të votojnë sipas dëshirës së tyre, duke i kërcënuar se do përfundojnë në burg edhe për një postim në rrjetet sociale. Frika është e përhapur thellë mes venezuelanëve. Prandaj dua të flas për lirinë. Si gra, barazia është shumë e rëndësishme për ne. Kemi punuar ndër vite për të fituar shanse të barabarta. Si politikane nga Venezuela, mund të them se duhet t’i japim rëndësinë e duhur lirisë në çdo aspekt. Lirisë së individit, para së gjithash.
Pa liri, nuk mund të ketë barazi, solidaritet, drejtësi apo asnjë vlerë tjetër thelbësore për jetën.
Fuqizimi i vërtetë nuk vjen nga kontrolli i shtetit apo nga imponimi, por nga një shoqëri e hapur, ku çdo grua ka mundësinë, përmes përpjekjeve të saj, të arrijë potencialin e saj të plotë. Kjo mund të arrihet vetëm nëse ke lirinë të zgjedhësh atë që dëshiron të bësh. Gratë nuk kanë nevojë për bamirësi; gratë kanë nevojë për lirinë për të konkurruar. Unë jam sot këtu për t’ju ftuar të luftoni për lirinë tuaj, të punoni për të dhe të mos dorëzoheni kurrë. Ne në Venezuelë kemi 26 vite që e bëjmë këtë luftë dhe vazhdojmë të qëndrojmë.
Ashtu siç luftojmë për Venezuelën, duhet të luftojmë edhe për Shqipërinë, dhe për çdo vend tjetër që përballet me regjime të ngjashme. Ne, si gra, mund të tregojmë se si luftohet për të drejtat tona dhe për drejtësinë,” tha Marry Ponte.
TIRANA- Ministrja e Kulturës në Kroaci, Nina Obuljen, ka marrë pjesë në konferencën ndërkombëtare të organizuar nga LDK me temë “Global She”. Obuljen shprehu mbështetje të qartë për politikat që promovojnë pjesëmarrjen e grave në vendimmarrje dhe fuqizimin e rolit të tyre në shoqëri.
Ajo ka ndarë përvojën e saj si grua me një karrierë të gjatë në politikë, teksa vlerësoi reagimin e grave shqiptare ndaj temave të trajtuara në këtë forum, veçanërisht në kontekstin e vlerave të përbashkëta. Në fjalën e saj, ajo theksoi rëndësinë e ruajtjes së parimeve tradicionale, përballë sfidave moderne si populizmi, keqinformimi dhe polarizimi social, duke vënë theksin te mundësitë e barabarta, dinjiteti njerëzor dhe respektimi i të drejtave të grave – si shtylla themelore mbi të cilat ndërtohet një shoqëri demokratike dhe progresiste.
"Kemi përmirësuar edhe planet e pensioneve për gratë, kemi investuar fuqishëm në statusin e nënës në familje, duke ndihmuar zhvillimin e shoqërisë, me gjithnjë e më shumë gra që ndjekin dhe përfundojnë arsimin e lartë. Kjo është një nga arsyet pse po përballemi edhe me një ulje të numrit të lindjeve. Ne po përjetojmë rënie të normës së lindshmërisë në vendin tonë, ashtu si edhe ju. Por, përkundër përmirësimit ekonomik, ne kemi arritur të ndalojmë migracionin ekonomik nga Kroacia dhe po ndryshojmë rrënjësisht situatën, duke u bërë një vend tërheqës për kroatët që më parë ishin larguar", tha ajo.
Deklarata e ministres kroate :
Është një sfidë më vete të flas pas kryetarit tuaj kaq karizmatik. Sikurse më është kërkuar, unë do të ndaj me ju disa mendime mbi rrugëtimin tim si grua në politikë. Të flasësh përpara një salle plot me gra të mrekullueshme, të cilat reaguan me kaq energji ndaj fjalës së kryetarit, është një nder i veçantë dhe një përgjegjësi. Më lejoni që të ndalem pjesërisht edhe te disa nga çështjet që përmendi zoti Berisha, duke i lidhur ato me kontekstin e organizatës që na ka mbledhur sot këtu, të CDI-së. Dua të përshëndes panelistët e nderuar dhe, njësoj si ju, kuptoj që një pjesë e këtyre grave të mrekullueshme janë gjithashtu kandidate në zgjedhjet e ardhshme. Ju uroj shumë suksese të gjithave! Gjithashtu, sjell përshëndetjet e zotit Plenkoviç, kryetar i partisë sonë, zëvendëspresident i organizatës sonë dhe një figurë shumë aktive në PPE. Zoti Plenkoviç ka qenë tre herë radhazi kryeministër në vendin tonë.
Dua të theksoj se unë vetë kam shërbyer si ministre për nëntë vjet – një periudhë shumë e gjatë, sidomos për një grua në politikë. Ashtu siç theksoi edhe zoti Berisha, kur flasim për gratë në politikë, veçanërisht në kontekstin e partive tona të qendrës së djathtë, ne gjithmonë përpiqemi të balancojmë mes parimeve dhe vlerave thelbësore: vlerat e familjes, kujdesin për familjen, ruajtjen e vlerave tradicionale. Ne ndajmë një vlerë të përbashkët: besimin në bashkimin e shoqërisë dhe në mundësitë e barabarta për të gjithë. Shoqëritë tona duhet të garantojnë realisht mundësi të barabarta për çdo individ.
Dhe pikërisht këtu qëndron edhe thelbi i debatit për rolin e grave në politikë. Sfida të shumta ekzistojnë sot në botë, të cilat na detyrojnë të luftojmë për këto parime dhe vlera, edhe pse kjo betejë është bërë më e vështirë. Ajo që përpiqemi të bëjmë është ndryshe nga e kaluara. Me rritjen e populizmit dhe me sulmet e partive populiste të majta dhe të djathta ekstreme, është shumë e vështirë t’u shpjegosh qytetarëve se si mund të mbrohen këto vlera, duke luftuar njëkohësisht për një shoqëri gjithëpërfshirëse që garanton kujdes të barabartë për çdo person.
U trondita kur dëgjova nga Zoti Berisha se pagat e larta në Shqipëri janë shumë më të larta se në vende të tjera, ndërsa pagat e ulëta janë edhe më të ulëta se në vendet e tjera europiane. Kjo tregon se shoqëria shqiptare ka probleme të thella. Vetëm nga ky informacion kupton se ke të bësh me një shoqëri të fragmentuar, e cila nuk mund të zhvillohet dhe as të përballojë sfidat e së sotmes. Këto sfida janë të shumta dhe ne që jemi pjesë e politikës, në nivel lokal, kombëtar, europian apo global – e kuptojmë se jetojmë në një botë ku gjithçka ndryshon me shpejtësi, ku siguria është gjithnjë e më e rrezikuar, dhe ku besimi te e drejta ndërkombëtare po vihet në pikëpyetje. Duke vënë në pikëpyetje parimet e të drejtës ndërkombëtare dhe të drejtave të njeriut – përfshirë të drejtat e grave, ekziston rreziku që këto të drejta të cenohen.
Pjesëmarrja e barabartë në të gjitha nivelet e vendimmarrjes, që Zoti Berisha e ka theksuar gjithmonë, është jetike për shoqëritë dhe vendet tona që të ecin përpara. Kur flasim për Kroacinë, duhet të jemi të sinqertë: ne kemi një problem serioz me përfaqësimin e grave, sidomos në nivelet më të larta të politikës.
Në mitingje, takime partie apo diskutime për të drejtat e grave, shohim shumë gra dhe kjo më mbush me gëzim dhe shpresë. Megjithatë, kur bëhet fjalë për qeverisjen, parlamentin apo pozicionet kyçe në kompani, situata ndryshon: gratë janë shumë më pak të përfaqësuara. Edhe pse janë pikërisht ato që shpesh bëjnë pjesën më të madhe të punës në prapaskenë, ne e pranojmë këtë dhe e dimë se duhet të punojmë për ta përmirësuar. Gjithashtu, dua të theksoj veçanërisht në rastin e Shqipërisë dhe të qeverisë kroate: ne besojmë fuqimisht në të ardhmen europiane të Shqipërisë. Ne e mbështesim fuqimisht zgjerimin e Bashkimit Europian dhe duam që çdo vend i rajonit tonë të përfitojë nga anëtarësimi, që shoqëritë të forcohen dhe Europa të bëhet më e fortë. Kur shohim çfarë kemi arritur në nëntë vitet e fundit në drejtim të politikave sociale dhe ekonomike, shumë gjëra janë përmirësuar, falë pjesëmarrjes sonë në Bashkimin Europian, fondeve të marra dhe reformave të zbatuara. Ne kemi përmirësuar ndjeshëm kushtet e punës, jemi afër realizimit të pagave të barabarta dhe sot norma e papunësisë është rreth 5%, çka nuk konsiderohet më papunësi. Për krahasim, kur kemi ardhur për herë të parë në pushtet, papunësia ishte rreth 20%.
Kemi përmirësuar edhe planet e pensioneve për gratë, kemi investuar fuqishëm në statusin e nënës në familje, duke ndihmuar zhvillimin e shoqërisë, me gjithnjë e më shumë gra që ndjekin dhe përfundojnë arsimin e lartë. Kjo është një nga arsyet pse po përballemi edhe me një ulje të numrit të lindjeve. Ne po përjetojmë rënie të normës së lindshmërisë në vendin tonë, ashtu si edhe ju. Por, përkundër përmirësimit ekonomik, ne kemi arritur të ndalojmë migracionin ekonomik nga Kroacia dhe po ndryshojmë rrënjësisht situatën, duke u bërë një vend tërheqës për kroatët që më parë ishin larguar. Besoj se edhe Shqipëria do të mund ta realizojë këtë, ndërkohë që zhvillohet ekonomikisht, duke i kthyer bashkatdhetarët dhe qytetarët e saj që u larguan për arsye të ndryshme ekonomike ose sociale. Në kontekstin e grave, Zoti Berisha foli gjithashtu për këtë temë. Ne nuk duhet të mbyllim sytë përballë këtyre fenomeneve. Ka shumë deklarata ndërkombëtare që ne duhet t’i ndjekim. Ky është një problem që ekziston në çdo shoqëri, por është jashtëzakonisht e rëndësishme që të kemi udhëheqës që e pranojnë, e artikulojnë dhe nuk e injorojnë këtë problem. Sepse vetëm duke e pranuar dhe duke folur për të, ne mund të fillojmë ta përmirësojmë situatën për të gjithë.
Nuk do të flas gjatë për çfarë do të thotë të jesh për nëntë vite në një pozicion drejtues si grua. Nuk e di as vetë si ndodhi. Nuk e kisha menduar kurrë se do të zgjaste kaq shumë, por ne patëm mbështetjen e popullit dhe qëndruam në pushtet. Dhe ka një arsye për këtë: ne punuam për të realizuar atë që u premtuam qytetarëve tanë. Sepse në politikë, të mbash premtimet, të flasësh dhe të punosh për çdo anëtar të shoqërisë, duke u kujdesur që secili të ketë mundësi dhe trajtim të barabartë, është mënyra e vetme për të ecur përpara. Çfarë mund të them tjetër? Familja politike që na bashkon sot këtu, na bashkon jo vetëm në Europë, por edhe në nivel global. Për dekada të tëra, në shoqëri të ndryshme, në kontekste të ndryshme politike, ne kemi ndërtuar një traditë të gjatë demokracie. Për gjithçka për të cilën kemi luftuar 35 vjet më parë, për ruajtjen e vlerave bazë, për bashkimin, për demokracinë, për solidaritetin, këto parime sot janë edhe më të rëndësishme, në një kohë kaq të vështirë sa kjo që po jetojmë. Nëse arrijmë të ruajmë këto vlera në një kontekst botëror të mbushur me sfida të mëdha, keqinformim, gjuhë urrejtjeje në rrjetet sociale, krizë migratore, frikë nga ndryshimet në shoqëri, kriza ekonomike dhe ekologjike, nëse në çdo politikë që ndjekim kemi këto parime në mendje, atëherë ne do t’ia dalim me sukses si anëtarë të partive tona politike.
Përtej partive politike dhe duke folur jo vetëm në emër të partive tona, por duke u përpjekur të përmirësojmë dhe të ndërtojmë një të ardhme më të mirë për shoqërinë, me këto fjalë, unë shpresoj sinqerisht që zgjedhjet që ju presin do t’i japin Shqipërisë mundësinë të zgjedhë ata që do t’u përmbahen këtyre parimeve, që do të luftojnë për to, që do të ofrojnë mundësi të barabarta për të gjithë qytetarët, dhe që do të mbështesin fuqizimin e pozitës së grave në shoqëri. Vetëm kështu Shqipëria do të vazhdojë të ecë përpara drejt integrimit europian. Si gra që vijmë nga një vend që në tre dekadat e fundit ka kaluar përvoja të ngjashme me ato që po kaloni ju, mund të them se kemi qenë me fat që u bëmë pjesë e Bashkimit Europian. Kjo e ndryshoi shoqërinë tonë, përmirësoi ekonominë dhe na bëri pjesë e një unioni vlerash. Unë shpresoj sinqerisht që edhe Shqipëria të vazhdojë në këtë rrugë, dhe sa i përket Unionit Demokratik Kroat, në emër të Presidentit tonë dhe të gjithë bashkëpunëtorëve tanë, dua t’ju siguroj mbështetjen tonë të plotë.
TIRANA- Zëvendës presidenti i CDI, Elmar Brok, ka marrë pjesë në konferencën ndërkombëtare të organizuar nga LDK me temë “Global She”. Brok tha se Shqipëria nuk do të jetë pjesë e BE në vitin 2030, për arsye se Edi Rama e ka kthyer Shqipërinë në një narkoshtet.
Ai shtoi se socialistët në Gjermani e marrin pushtetin vetëm për të rrëzuar shtetin, kurse sipas tij, konservatorët rrisin ekonominë. Brok shtoi se Europa dhe Gjermania ndodhen sot në sfida të mëdha, por askush nuk mund të mohojë rolin e saj të rëndësishëm në mbrojtjen e institucioneve dhe stabilitetit ekonomik në kohë të vështira.
"Në Gjermani, gjithmonë kur socialistët kanë dështuar, njerëzit i janë kthyer konservatorëve dhe demokristianëve për të rritur ekonominë, dhe kështu ndodhi edhe pas tre vitesh krizash të rënda. Suksesi ekonomik është themeli i një jete më të mirë. Ai sigurohet vetëm kur politika fokusohet te zhvillimi real dhe i qëndrueshëm. Prandaj besoj fort se gratë e Partisë Demokratike, në familjen tonë politike, mund të sjellin ekuilibrin e duhur dhe ta udhëheqin këtë ndryshim. Jam e bindur që do të dilni me sukses", tha ai.
Deklarata e plotë:
Plot gra të cilat i njoh prej vitesh tregojnë se ky vend ka gra të forta: Albana, Jozefina, Jorida. Unë ju inkurajoj që të modernizoni vendin tuaj, dhe besoj fort se me rikthimin e z. Berisha në krye, ai do t’ju japë sërish mundësinë që të sillni ndryshimin dhe reformat e nevojshme për të drejtat e barabarta. Ne kemi nevojë për më shumë gra në politikë, sepse vetëm atëherë mund të arrijmë ekuilibrin e duhur. Ne kemi nevojë për një politikë të jashtme më femërore, sepse sot, kur gratë mungojnë në politikën e jashtme, mungon edhe ndjeshmëria, përfshirja dhe vizioni afatgjatë. Gratë duhet të përfshihen më shumë, sepse historikisht nuk kanë pasur hapësirën që meritojnë.
Gjithashtu, besoj fort që gratë nuk duhet të shihen vetëm si mbështetje klasike e familjes, por duhet të synojnë edhe majat e shoqërisë. Ato duhet të jenë ministre të teknologjisë, të ekonomisë, të udhëheqin sektorët më të rëndësishëm të zhvillimit. Kam bindjen se në qeverinë e re, ministrja e Ekonomisë dhe ministrja e Teknologjisë do të jenë gra, dhe kjo është rruga e duhur përpara: jo thjesht të lavdërojmë gratë me fjalë, por t’u japim përgjegjësi të vërteta, poste të larta drejtuese.
Në vendin tim, për 16 vjet, kemi pasur një grua si kancelare, Angela Merkel. Ajo u përball me sfida, pengesa dhe kriza, por gjithashtu solli edhe suksese dhe rezultate konkrete. Europa dhe Gjermania ndodhen sot në sfida të mëdha, por askush nuk mund të mohojë rolin e saj të rëndësishëm në mbrojtjen e institucioneve dhe stabilitetit ekonomik në kohë të vështira.
Angela Merkel tregoi se gratë mund të drejtojnë me sukses në çdo nivel.
Sot, pikërisht në këtë ditë të veçantë, jemi edhe në ditën e funeralit të Papa Françeskut. Kam pasur privilegjin ta takoj dy herë dhe mund të them me bindje që ne kemi nevojë për një shoqëri që frymëzohet nga vlerat për të cilat ai punoi: drejtësi, solidaritet dhe kujdes për të dobëtit, dhe jo vetëm për t’u marrë me problematikat ekonomike. Ne duhet të ndërtojmë një shoqëri të drejtë, ku secili ka vendin e tij, por ku të gjithë kanë mundësinë të kontribuojnë në mënyrë të barabartë. Vetëm nëse shoqëria ka ndjeshmëri për drejtësinë sociale, mund të zgjidhim problemet tona. Ne mund të jemi më të suksesshëm se socialistët, sepse njohim instrumentet e duhura ekonomike. Në Gjermani, gjithmonë kur socialistët kanë dështuar, njerëzit i janë kthyer konservatorëve dhe demokristianëve për të rritur ekonominë, dhe kështu ndodhi edhe pas tre vitesh krizash të rënda. Suksesi ekonomik është themeli i një jete më të mirë. Ai sigurohet vetëm kur politika fokusohet te zhvillimi real dhe i qëndrueshëm. Prandaj besoj fort se gratë e Partisë Demokratike, në familjen tonë politike, mund të sjellin ekuilibrin e duhur dhe ta udhëheqin këtë ndryshim. Jam e bindur që do të dilni me sukses.
Më lejoni të shtoj edhe diçka tjetër: gjatë këtyre ditëve kam dëgjuar deklaratat e Edi Ramës, i cili thotë se do ta çojë Shqipërinë në Europë. Por ai ka harruar premtimet që u ka dhënë qytetarëve. Shqipëria nuk ka përmbushur kushtet për anëtarësim në Bashkimin Europian, dhe me politikat e një narkoshteti, jam e sigurt që në vitin 2030 Shqipëria nuk do të jetë anëtare e BE-së. Ndryshimi është i domosdoshëm: në Shqipëri, në Europë, në Partinë tonë. Si demokristiane, si pjesë e Partisë Popullore Europiane, besoj se ndryshimi është i mundur. Sot kemi në BE tre pozicione kryesore të ndara kështu: kreu i Këshillit Europian është një socialist burrë, por presidentja e Komisionit Europian, Ursula von der Leyen, është një grua nga PPE-ja, dhe gjithashtu kryetarja e Parlamentit Europian, Roberta Metsola, është një tjetër grua nga PPE-ja. Kjo tregon që jemi një parti moderne që nuk i mbështet vetëm me fjalë gratë, por edhe me vepra.
TIRANË- Kryedemokrati Sali Berisha ka marrë pjesë sot në konferencën ndërkombëtare të organizuar nga LDK me temë “Global She”. Berisha tha se ministret e kryeministrit Rama sillen si badigardet e Gadafit, të cilat i thurnin lavdi këtij të fundit. Berisha shtoi se ato nuk tregojnë dot asnjë projekt në mbështetje të grave në këto 12 vite në pushtet.
FJALIMI:
"Gratë shqiptare u përballën këto 12 vite me një varfëri në rritje. Në qoftë se në vendet e tregut të lirë, në ligjet e tregut, varfëria shkon në pakësim, në diktatura dhe narkodiktatura, varfëria ecën gjithnjë në rritje.
Dhe kjo ndodhi këto 12 vite në Shqipëri. Çfarë ndodhi? Rrogat mbetën të ulëta, përveç rrogave të larta. Rrogat e larta në Shqipëri janë më të larta se në Kroaci, se në Slloveni. Kurse rrogat e ulëta janë më të ulëtat në Europë. Në Shqipëri, diferenca mes rrogave të ulëta dhe atyre të larta është 120-15 herë. Kjo nuk ndodh në asnjë vend demokratik. Nuk ndodh as në SHBA, as në Gjermani sepse ka disa parime dhe kur vjen problemi, rrogat e ulëta janë më tepër tek gratë dhe vajzat. Kështu që pozita e tyre këto vite është përkeqësuar me shpejtësi.
Është përkeqësuar gjendja e tyre shpirtërore për faktin se ato kanë përcjellë jashtë, dhe vetëm për shkaqe ekonomike, qindra mijëra vajza, djem të tyre. Është përkeqësuar sepse ato nuk ushqejnë dot, siç tregon UNICEF, 21 përqind e familjeve shqiptare nuk u japin dot tre vakte, u japin gjithsej dy vakte fëmijëve të tyre. Është e vërtetë se Edi Rama emëroi ministre me shumicë në kabinetin e tij dhe ju e dini, unë u ngrita në parlament dhe e përgëzova me sinqeritet. Por çfarë mund të them unë pas 4 vitesh?
4 vite, në mënyrë absolute, nuk kanë shtruar një çështje të vetme në promovim, në favor, në mbrojtje të grave dhe vajzave në Shqipëri. asnjë.
Dhe qe një moment, kur qeveria franceze i dha qeverisë shqiptare një grant 60 milionë euro tërësisht kushtuar mbështetjes së grave. U ngrita dhe propozova që t’i shtojmë edhe ne, t’i bëjmë 100 milionë dhe ky është një shans për të ndihmuar vajzat dhe gratë. Absolutisht jo. I trupëzuan në buxhet dhe nuk lanë asnjë qindarkë. Dhe të gjithë ato zonja ishin aty dhe nuk folën. U bë e famshme ajo që u thashë se ju silleni si badigardet e Gadafit, të cilat i thurnin lavdi Gadafit. Edhe ky një lloj mizogeni që nuk tregon dot 12 vite një program të veçantë për mbështetjen e grave dhe vajzave në Shqipëri. Nuk tregon një program për mbështetjen e nënave kryefamiljare të cilat janë të shumta sot," tha Berisha.
TIRANË- Kryedemokrati Sali Berisha ka marrë pjesë sot në konferencën ndërkombëtare të organizuar nga LDK me temë “Global She”. Berisha tha se Partia Demokratike do të luftojë kundër murit të patriarkisë. Berisha shtoi s këto 12 vite kanë qenë më të vështirat për gratë dhe vajzat shqiptare.
Berisha tha më tej se kur kryeministri Edi Rama erdhi në pushtet tha se do ndalonte lojërat e fatit se ato krijojnë shumë probleme familjare duke shtuar se ai jo që nuk i ndaloi lojërat e fatit, por përkundrazi lojërat e fatit i shtoi në duart e banditëve dhe u shtoi atyre drogën.
PJESË NGA FJALIMI:
"Mirëdita dhe një përshëndetje zonjave dhe zonjushave të pranishme në këtë sallë. Një përshëndetje të përzemërt Albana Vokshit. Mirënjohje dhe përshëndetje miqve tanë të pranishëm në këtë takim ndërkombëtar të rëndësishëm të grave. Zonja ministre, përfaqësuese e qeverisë së Kroacisë, mike e Shqipërisë. Zotit Elmar Brok, zëvendëspresident i CDI, dhe mik i shquar i Shqipërisë. Zotit Antonio Lopez, një mik i shquar i PD dhe Shqipërisë, aktualisht Sekretar i Përgjishshëm i CDI. Kam shumë kënaqësi t’u ripohoj ju në prani të përfaqësuesve dhe miqve tanë, se objektivi ndër më madhorët i PD është lufta kundër murit të patriarkisë. Muri i patriarkisë përbën në bindjen time më të thellë dhunuesin më kryesor të lirive dhe të drejtave të njeriut në botë.
Në programin tonë, që në themelim, ne kemi pasur prioritet dhe ritheksoj vetëm një moment, në vitin 2005, për shkak të këtij muri, diferenca në paga midis burrave dhe grave në administratën shqiptare ishte 36 përqind. Me një projekt dhe me persistim, ne e ulëm këtë diferencë në 17.8 përqind, pra e afruam shumë me diferencën mesatare në BE. Zhvilluam një seri projektesh me të cilat ne mbështesnim gratë, bizneset e tyre, pjesëmarrjen e tyre. Nuk ka nevojë t’i mbështesësh në shkolla sepse janë superiore dhe kjo është shumë e njohur. Nga eksperienca ime si pedagog, nga 10 studentë të shkëlqyer, 8 ishin vajza. Por problemi është se ky shkëlqim, për shkak të rrethanave shoqërore, në vend se të zhvillohej dhe të shpalosej plotësisht, ndryhej, topitej dhe nuk vazhdonte siç duhet të vazhdonte në vitet më pas.
Kështu që ne i rikthehemi fuqishëm me besim të plotë se lufta për barazi mes burrit dhe gruas është një luftë që duhet të frymëzojë, dhe na frymëzon, çdo njeri të lirë. Këto 12 vite kanë qenë vitet më të vështira për vajzat dhe gratë, nënat dhe motrat shqiptare, më të veshtira se në çdo vend tjetër në Europë sepse ju u përballët me pasojat direkte të narkoshtetit, i cili solli në votrat tona familjare dhunë, drogë, fatkeqësira.
Edi Rama nëse u kujtohet ju, kur erdhi në pushtet tha se do ndalonte lojërat e fatit se ato krijojnë shumë probleme familjare. Dhe e vërteta është se krijojnë. Ai jo që nuk i ndaloi lojërat e fatit, por përkundrazi lojërat e fatit i shtoi në duart e banditëve dhe u shtoi atyre drogën.
Sot a mund të imagjinoni ju një vend që nuk kishte njohur kurrë në histori kokainën, është konsumatori kryesor i kokainës për frymë në Europë dhe kjo është totalisht pasojë e narkoshtetit. Albana e theksoi, në kundërshtim absolut me traditën tonë shekullore, ne regjistruam këto 10 vite numrin më të lartë të vrasjes së grave, krimin më të shëmtuar. Përsëri nuk është e drejtë të lidhësh çdo gjë me kundërshtarin politik, por kur kundërshtari politik është i njohur publikisht si mizogen, i dokumentuar si njeri i dhunshëm ndaj grave.
Kur kundërshtari politik nuk thotë një fjalë për këto qindra vrasje, makabritete, por hesht, atëherë të paktën me heshtjen e tij, ai në një mënyrë ose në një tjetër favorizon këtë klimë agresive ndaj vajzave dhe grave," tha Berisha.
