Tragjedi në Turqi/ Përfshihet nga flakët një hotel në provincën Bolu, humbin jetën 66 pushues, plagosen 51 të tjerë, arrestohen 4 persona
66 viktima në Turqi/ "Kanë vdekur para syve tanë," zbardhen dëshmitë tronditëse për zjarrin në hotel: Dy...
66 viktima në Turqi/ "Kanë vdekur para syve tanë," zbardhen dëshmitë tronditëse për zjarrin në hotel: Dy...
"A do paraqiteshit në SPAK nëse merrni fletëthirrje për 21 Janarin"? Berisha: Mbështes çdo lloj hetimi të k...
14 vite nga protesta e 21 janarit, Rama: Drejtësia vonon po nuk harron, fëmijët e dëshmorëve po bëhen prindër...
Rikthehen reshjet e dëborës në Korçë, ARRSH apel shoferëve: Kujdes në këto akse rrugore! Pajisuni me g...
• Partia Demokratike feston ditën e sotme 34-vjetorin e themelimit të saj. • Në eventin e organizuar për këtë përvjetor morën pjesë disa figura dhe përfaqësues të Partisë Demokratike. • Ish-deputeti Ervin Salianji pati një mesazh nga burgu, ku tha se e nesërmja për demokratët është ditë beteje, pasi shqiptarët po largohen nga vendi për shkak të keqqeverisjes. • Salianji tha se zgjedhjet po afrojnë dhe se duhet të bëhen të gjithë bashkë për të arritur fitoren. • Një fjalë përshëndetëse mbajti edhe drejtuesi i Departamentit të Mjedisist në PD, Jamarbër Malltezi, ku u shpreh se PD ishte partia që hapi Shqipërinë me botën, që solli lirinë dhe të drejtat njerëzore, tregun dhe iniciativën e lirë. • Më tej ai thotë se PD nisi dhe realizoi anëtarësimin në NATO, dhe gjithashtu ishte promovuese e integrimit Evropian dhe pavarësisë së Kosovës. • Kryetari i PD-së, Sali Berisha mbajti po ashtu fjalën e tij, të cilën e nisi duke përshëndetur, kreun e PL-së Ilir Metën e ish-deputetin Ervin Salianji të cilët aktualisht ndodhen në burg dhe Jamarbër Malltezin i cili ndodhet në "arrest shtëpie". • Berisha kujtoi edhe disa nga nga emrat themelues dhe figurat kryesore të PD-së që sipas tij kanë luftuar për lirinë dhe demokracinë, ndërsa u shpreh se kjo forcë politike kishte fatin që t'i jepte Shqipërisë pluralizmin, të rrëzonte diktaturën dhe të kontribuonte në lirinë dhe pavarësinë e Kosovës.• Ish-kryeministri deklaroi sonte se rikthimi i PD-së për herën e tretë do të jetë më e mira dhe se do të bëjë të harrohet hera e dytë. • Berisha u shpreh se lëvizja e tyre që nisi me 3 vite rithemelim, sot është ortaku më i madh opozitar dhe që sipas tij gëzon mbështetjen më të madhe ndërkombëtare. • Ai u shpreh se më 23 dhjetor PD do të dalë në mosbindjen më të fuqishme. • Në mbyllje të fjalës së tij, kryedmeokrati tha se ditëlindja e 35-të duhet ta gjejë PD-në në pushtet.
6 artikuj për këtë temë.
TIRANË- Kreu i Partisë Demokratike, Sali Berisha tha se kjo forcë politike i ka frymëzuar shqiptarët duke mos u dorëzuar. Berisha u shpreh se lëvizja e tyre që nisi me 3 vite rithemelim, sot është ortaku më i madh opozitar dhe që sipas tij gëzon mbështetjen më të madhe ndërkombëtare.
Ai u shpreh se më 23 dhjetor PD do të dalë në mosbindjen më të fuqishme. Në mbyllje të fjalës së tij ai tha se ditëlindja e 35-të duhet ta gjejë PD-në në pushtet.
PJESË NGA FJALA E BERISHËS:
Njerëzit, qytetarët do na mbështesin. E tha Neritan Ceka këtu para jush, duhet front i përbashkët me qytetarët shqiptarë.
Së bashku të përzëmë këtë regjim më të keqin që kanë njohur shqiptarët në këto vite. Njerëzit do na mbështesin sepse ne u provuam shqiptarëve se nuk shitemi, por në thelb qëndrojmë shqiptarë të vërtetë. Miqtë e mi, si mik do t’u them një fjalë, në çdo vështirësi që të vini, kurrë mos harroni se po qe se duhet të shohim galerinë e heronjve, nuk ka komb tjetër me heronj si ne. Ndaj dhe duhet të ndjehemi krenarë me qenien tonë shqiptarë. Ku ka bota një Skënderbe? Ku ka bota një Adem Jashar? Ku ka lëvizja një Azem Hajdar?
Kurrë mos u dorëzoni. Kurrë mos i jepni! Ne u provuam shqiptarëve se nuk përkulemi, por më kryesorja ne i kemi frymëzuar shqiptarët. Ne i frymëzuam shqiptarët se luftuam ndonëse kishim kundër narkoshtetin, mafien e perandorisë së Sorosit, mediat e kontrolluara, drejtësinë si degë ekzekutive dhe bandat e qeverisë. Ne frymëzuam shqiptarët se qëndruam 330 ditë dhe nuk u dorëzuam. Dhe kur nuk dorëzohesh, edhe një rrugicë pa drita mund ta kthesh në një prozhektor dritash dhe shprese për mbarë vendin. Kur nuk dorëzohesh edhe një dritare mund ta kthesh në armën më të fuqishme kundër kundërshtarit të lig që nuk njeh normë as moral.
Mund ta kthesh në një portë ferri për të keqen dhe të fitosh. Prandaj dhe Rrugën e Shpresës, dritaren e katit të tretë, me qëndresën tonë të përbashkët, i shndërruam në burim frymëzimi për shqiptarët, në makth të tmerrshëm për narkoqeveritarët. Prandaj PD do të shpëtojë Shqipërinë vitin tjetër sepse ne nuk dorëzohemi kurrë për dinjitetin njerëzor.
Nuk dorëzohemi kurrë për familjen shqiptare dhe vlerat e saj. Nuk dorëzohemi kurrë për interesin kombëtar. Nuk dorëzohemi kurrë për pluralizmin politik. Prandaj lëvizja jonë që nisëm 3 vite rithemelim, sot është ortaku më i madh opozitar me mbështetjen më të madhe ndërkombëtare, që po ecën drejt fitores më të madhe që kemi pasur. Me të cilën do arrijmë sukseset më të mëdha për Shqipërinë dhe shqiptarët. Prandaj miq, nëse kemi pasur një të shkuar historike, ne do kemi një të ardhme edhe më historike vetëm e vetëm pse punojmë për qytetarët.
Kemi një diktaturë të dytë për të shembur. Kemi një komb për të shpëtuar. Kemi familjen shqiptare për ta shpëtuar. Kemi demokracinë për ta shpëtuar. Kemi Shqipërinë për ta ripopulluar me bijtë dhe bijat e saj. Dhe nuk jemi vetëm. Bashkë me ne janë shqiptarët. Bashkë me në janë partnerët ndërkombëtarët, të cilët me tre rezoluta na dhanë mbështetjen më të madhe.
Por bashkë me ne është edhe i plotfuqishmi, i madhi Zot.
Është i madhi Zot sepse vetëm me ndërhyrjen e tij, u bë e mundur që me datën 5 nëntor, perandoria marksiste e Xhorxh Sorosit të rrëzohej nga froni dhe bota e lirë të shënonte një triumf jo më pak se legjendar. Zoti e dha ndihmën e tij, tani është radha jonë. Me datën 23 dhjetor në mosbindjen civile më të fuqishme që është parë ndonjëherë.
Të bashkojmë shqiptarët për shtytjen përfundimtare ndaj narkoshtetit dhe themeleve të tij. Të shndërrojmë Tiranën në kryeqytetin e demokracisë, tmerrin e narkokracisë.
Është radha jonë t’i japim përgjigjen në zemër këtij regjimi që në 10 vite shpopulloi, grabiti dhe poshtëroi shqiptarët.
Faleminderit të gjithëve për këto 34 vite historike. Ditëlindjen tonë të 35-të duhet ta festojmë në pushtet, në liri. Rrofshi ju, rroftë PD, rroftë Shqipëria!
TIRANË- Lideri i opozitës Sali Berisha deklaroi sonte se rikthimi i PD-së për herën e tretë do të jetë më e mira dhe se do të bëjë të harrohet hera e dytë. Berisha tha se Shqipëria pa opozitë do të ishte projekti "që do të varroste përfundimisht kombin shqiptar".
Më tej shprehet se beteja aktuale e PD është ajo e shpëtimit të Shqipërisë, ku tha se me ardhjen e tyre në pushtet do të vendoset minimumi jetik 200 euro, paga minimale 500 euro dhe ajo mesatare 1200 euro. Berisha u shpreh se zotimi i tyere para shqiptarëve është "zero tolerancë ndaj krimit dhe korrupsionit".
PJESË NGA FJALA E BERISHËS:
Miqtë e mi, kurrë nuk duhet të harrojmë katastrofën që parandaluam me qëndresën tonë. Shqipëria pa opozitë do ishte një dimër i pafund. Do ishte projekti që do varroste përfundimisht kombin shqiptar. Sepse kur narkoshteti i Edi Ramës dëboi gjysmën e shqiptarëve vetëm në 10 vite, imagjinoni se çfarë do ndodhte dekadat e ardhshme kur Edi Rama priste të sundonte pa opozitë.
Por tani kjo ëndërr e Edi Ramës, ky projekt i Xhorxh Sorosit ka vdekur dhe ne duhet ta kallim atë. Dhe siç thotë ajo shprehja e mençur e shqiptarëve, kur hap gropën e tjetër, do biesh vetë. Fatin që përgatiti për ne, do e ketë rilindja e Edi Ramës, narkoqeveria e tij. Vetë Edi Rama po e shkërmoq atë organizatë. E vetmja gjë që mban rilindjen sot është vetëm pushteti. Pushteti i bazuar në lidhjet me krimin, drogën, vjedhjen e shqiptarëve.
Ditën që nuk do ketë më pushtet, shqiptarët do shohin gjendjen e vërtetë të saj. Dhe këtu qëndron ndryshimi fundamental mes nesh dhe atyre. Ne nuk jemi njëlloj sepse ne jemi një parti që ka fuqinë për të rikrijuar veten e saj. Jemi një parti që kemi drejtuar dy herë Shqipërinë. Herën e parë, kemi pasur gabimet tona, por kemi shënuar arritje epokale dhe askush sot nuk mund të mohojë se qeverisja e viteve 2005-2013 ka qenë më e suksesshmja që ka njohur Shqipëria. Dhe së fundmi ne kemi vetinë, aftësinë për t’u ringritur pasi rrëzohemi. Sepse ne kemi të parin interesin kombëtar dhe kurrë nuk e harrojmë këtë.
Prandaj dhe njësoj si hera e dytë ishte më e suksesshmja, hera e tretë do bëjmë të harrojmë herën e dytë. Do jetë më e mira. Rikthimi i PD-së në pushtet herën e tretë do jetë fati i bardhë i vërtetë i shqiptarëve. Dhe me këtë duhet thënë se gjendemi në pikën kyçe të betejës sonë. Ditët tona të këqija janë tashmë e shkuara. Beteja jonë për shpëtimin e opozitës u krye, e fituam atë betejë. Tani jemi në betejën për shpëtimin e Shqipërisë.
Para së gjithash për shpëtimin e qytetarëve shqiptarë nga dhimbjet e skamjet dhe mjerimit, për vendosjen me shpejtësi të minimumit jetik 200 euro, për pagën minimale 500 euro, për pagën mesatare 1200 euro, për dyfishimin e rrogave dhe pensioneve, për proporcionimin e çmimeve të energjisë dhe ujit, në proporcion me rrogat dhe pensionet që marrin. Për shërbimet publike më cilësore që kanë njohur shqiptarët, për arsimin dhe shëndetësinë. Për shpejtimin e integrimit të Shqipërisë në Europë. Zero tolerancë ndaj krimit dhe korrupsionit është zotimi ynë para shqiptarëve.
TIRANË- Kreu i PD-së, Sali Berisha u shpreh në eventin e 34-vjetorit të themelimit të PD-së se kjo parti që nuk i lëshon kurrë të vërtetat.
Berisha foli edhe lidhur me betejën për vulën dhe logon e partisë, ku tha se nëse kjo përçarje do të kishte ndodhur do ishte humbje jo vetëm e PD-së por e gjithë Shqipërisë.
Ai shtoi më tej se sot PD-është më e fortë se kurrë dhe se arritën t'i kthejnë shpresën e vërtetë shqiptarëve dhe pse jo sipas tij, të sigurojnë fitoren vitin e ardhshëm.
PJESË NGA FJALA E BERISHËS:
Të gjithë këto arritje epokale, të gjitha këto gëzime, këto marrëdhënie të jashtëzakonshme që kemi me njëri-tjetrin janë fat dhe privilegj. Por mbi të gjitha çfarë fati për ne të jemi në një parti që nuk lëshon kurrë të vërtetat që beson, interesin kombëtar edhe sikur e gjithë bota të dalë kundër nesh. Në çdo rrethanë, në çdo kusht, Shqipëria është e para.
Dhe kjo është dëshmuar, është faktuar në këto 3 vite që lamë pas. Sepse imagjinoni miq çfarë do ndodhte me ne nëse do ishim dorëzuar para të keqes apo nëse zjarri i përçarjes që frynte mbi ne të kishte arritur qëllimet e veta? Çfarë do ndodhte me ne nëse sot do kishim krijuar një parti të re, siç na kërkuan ato vite që na grabitën flamurin e partisë? Çfarë do ndodhte me ne nëse do dorëzoheshim para izolimit ku na futën? Çfarë do ndodhte me ne nëse do heshtnim kur gjykatat kriminale kërkonin të shkelmonin Kushtetutën, të kryenin për llogari të narkodiktatorit grushtin antikushtetues të shtetit?
Si do ishte sot ky 34-vjetor i PD nëse do ishim përkulur ndaj këtij grushti shteti që u krye ndaj opozitës shqiptare. Ne sot nuk do ishim këtu ose do ishim me një flamur tjetër të dorëzuar nga kundërshtari. Sigla, flamuri i vërtetë i PD do kishte humbur, do kishte mbetur pa zotërit, kalorësit e tij. Do ishim sërish të izoluar, një kryetar kukull që nuk do e zgjidhnit ju, që do na e diktonin me shantazh dhe presion. Do ishim pa identitet, do ishim pa fuqi, do ishim fasadë.
Dhe kjo humbje nuk do ishte vetëm e PD. Humbja më e madhe do ishte e Shqipërisë dhe shqiptarëve sepse bashkë me opozitën do të vdisnin ato vlera për të cilat ne qëndrojmë. Do vdiste pluralizmi i vërtetë politik. Do vdiste sovraniteti i brendshëm i kombit. Do shkonfigurohej familja, prindi dhe identiteti i shqiptarëve. Dhe duke konsoliduar për dekada pushtetin kriminel të narkoshtetit të parë në Europë, kjo e ardhme nuk do ndodhte kurrë për shqiptarët.
Sepse ne sot jemi në këmbë, ne sot jemi të bashkuar me flamurin tonë që valëvitet më krenar se kurrë ndonjëherë. Me tre rezoluta që na japin mbështetjen më të madhe ndërkombëtare që kemi pasur ndonjëherë gjer më sot. Na japin për betejat tona, për qëndresën tonë, për vlerat që mbrojmë, ku vetëm rezoluta e fundit e IDU, që kryesohet sot nga partia që drejton dhe udhëheq sot SHBA, Partia Republikane. Ne fituam. Ia dolëm që të shpëtojmë opozitën e vërtetë. Ta kthejmë atë në shpresën e vërtetë të shqiptarëve dhe të sigurojmë fitoren vitin e ardhshëm.
TIRANË- Kryetari i Partisë Demokratike, Sali Berisha ka mbajtur fjalën e tij në eventin e mbajtur për 34-vjetorin e themelimit të PD-së. Berisha përshëndeti në nisje të fjalimit, kreun e PL-së Ilir Metën e ish-deputetin Ervin Salianji të cilët aktualisht ndodhen në burg dhe Jamarbër Malltezin i cili ndodhet në "arrest shtëpie".
Kryedemokrati kujtoi edhe disa nga emrat themelues dhe figurat kryesore të PD-së që sipas tij kanë luftuar për lirinë dhe demokracinë. Ai shtoi më tej se kjo forcë politike kishte fatin që t'i jepte Shqipërisë pluralizmin, të rrëzonte diktaturën dhe të kontribuonte në lirinë dhe pavarësinë e Kosovës.
PJESË NGA FJALA E BERISHËS:
Të dashur themeluese, themelues të Partisë Demokratike, të pranishëm në këtë sallë dhe kudo që jeni sot. Të dashur drejtuese dhe drejtues të PD, anëtarë dhe mbështetës të kësaj partie, gëzuar 34-vjetorin e themelimit të PD. Një përshëndetje të përzemërt kam për të gjithë ata opozitarë e demokratë që në këto 34 vite, kanë derdhur lumenj djerse, guximi dhe kanë mbajtur gjallë, janë shndërruar në forcën jetësore të kësaj partie dhe e kanë sjellë atë këtu në prag të fitores, fitores së saj të tretë, fitores së merituar.
Por në emër tuaj dua të përshëndes kryetarin e Partisë së Lirisë, aleatin tonë, Ilir Meta, deputetin e PD, Ervin Salianji, drejtuesin e Departamentit të Mjedisit, Jamarbër Malltezi, për qëndresën e tyre, të arrestuar dhe në burgjet e diktaturës.
Dua të përshëndes përzemërsisht praninë e aleatëve tanë, me të cilët në 32 vite kemi ndarë betejat dhe fitoret, kemi qëndruar së bashku në kauzat e drejta që besojmë.
Miq dhe të ftuar, kur kthehesh mbrapa në kohë, në ditët më të para, kur rikthen në kujtime patosin, fuqinë e protestës studentore, studentët liberatorë, tribunin e lirisë, princin e pavdekshëm të shqiptarëve, Azem Hajdari, kur viziton në kujtime emocionet e themelimit të PD, njëherazi vendosjen e pluralizmit politik dhe ndarjen e epokave në Shqipëri, vendin më monist të planetit, kur kujton eposin qytetar të shembjes së kultit më të keq që shqiptarët kanë njohur në tërë historinë e tyre, kultin e Enver Hoxhës, Hitlerit shqiptar të pasluftës, kur kujton entuziazmin e ditës së bardhë, ditës së parë të demokracisë që PD dhe opozita shqiptare sollën me 22 mars të vitit 1992, zëvendësimin e shtetit diktatorial me shtetin ligjor, kur kujton krenarinë e anëtarësimit të Shqipërisë në KiE, anëtarësimin e Shqipërisë në NATO, kur kujton marrëdhëniet njerëzore të njerëzve të lirë, kur kujton trashëgiminë e atyre që sot nuk janë sot mes nesh, kur kujton tribunin e lirisë, prijësin e pavdekshëm Azem Hajdari, kujton Mandelën e Shqipërisë, Pjetër Arbnori, intelektualin vigan Ali Spahija, kujton intelektualin e shquar dhe guximtar, drejtues kryesor i PD, Gramoz Pashko, mençurinë e Sokol Olldashit, mirësinë dhe virtytet e Bujar Nishanit, qytetarinë e Gerti Bogdanit dhe mbi të gjitha dashurinë reciproke që anëtarët dhe mbështetësit e PD ndajnë njëri me tjetrin, kur fluturimthi kthehesh një kujtimet e pasura 34-vjeçare të historisë sonë, një gjë të vjen në mendje, çfarë fati për ne të jemi pjesë e kësaj partie.
Çfarë fati për ne të jemi pjesëmarrës në këtë histori të lirisë së Shqipërisë 3 herë me radhë. Çfarë fati për ne që na u dha mundësia t’i japim Shqipërisë pluralizmin, të rrëzonim diktaturën më gjakatare në Europë. Por jo më pak të jepnim kontributin tonë të pazëvendësueshëm në lirinë dhe pavarësinë e Kosovës. Ishim bashkë ne të gjithë këtu në Tiranë, krah mikut të shquar të shqiptarëve, presidentit Xhorxh Bush, kur u shpall për herë të parë pavarësia e shtetit të dytë të shqiptarëve, pavarësia e Kosovës.
TIRANË- Drejtuesi i Departamentit të Mjedisist në PD, Jamarbër Malltezi ka dhënë mesazhin e tij menjë lidhje live në ceremoninë e 34 vjetorit të themelimit të Partisë Demokratike.
Malltezi u shpreh se PD ishte partia që hapi Shqipërinë me botën, që solli lirinë dhe të drejtat njerëzore, tregun dhe iniciativën e lirë. Më tej ai thotë se PD nisi dhe realizoi anëtarësimin në NATO, dhe gjithashtu ishte promovuese e integrimit Evropian dhe pavarësisë së Kosovës.
Me një mesazh të presidentit të zgjedhur të ShBA-ve, Donald Trump, "Fight! Fight! Fight!" Malltezi thotë se "diktatura nuk është vetëm komuniste, ajo vjedh vullnetin e zgjedhësve".
MESAZHI I PLOTË I JAMARBËR MALLTEZIT
Të nderuar miq! Gëzohem që jam sonte mes jush, edhe pse prej një viti një i burgosur politik. Na kanë izoluar, por jo mposhtur. Para 34 vitesh, dolëm të protestojme kundër diktaturës. Nuk dinim asgjë tjetër, veçse nuk durohej mungesa e lirive bazë të njeriut. Dolëm veç me 2 thirrje që rezononin në çdo shqiptar: “Liri-Demokraci” dhe “E duam Shqipërinë si gjithë Evropa!“
Përballë kishim diktaturën, kishim Kristaqin e Edit që të varte në litar, nëse vjersha i dukej herezi, kishim vjehrrin e Fugës së Edit, që rrihte dhe burgoste Vasil Dhimitrin, pse protestonte në demonstratën e heshtur. Kishim hetuesin Arben Kraja që, dënonte protestuesin për veprime që: “bien ndesh me normat e moralit komunist.” Por ishim bashkë dhe kishim ndarë mendjen. Nuk pyesnim për palaçot e diktaturës se ishim bashkë dhe nuk kish’ pengesa, apo thika pas shpine mes nesh.
Besonim në “Freedom works!“ dhe “Today you can choose your own leaders”, derisa na erdhën kukullat e Soros.
As nuk protestuam për pushtet, e as nuk kishim njohuri. Por, PD ishte partia që hapi Shqipërinë me botën, që solli lirinë dhe të drejtat njerëzore, tregun dhe iniciativën e lirë, nisi dhe realizoi anëtarësimin në NATO, promovuese e integrimit Evropian dhe pavarësisë së Kosovës. Ka mijëra arsye pse ne jemi krenar me PD. Ndonëse edhe PD si çdokush ka thesin e gabimeve të veta, PD respektoi vullnetin e zgjedhësve dhe realizoi zgjedhje të lira e të ndershme. PO sot? Sot po shohim të njëjtit banditë: në vend të Kristaqit ka ardhur Edvini që vjedh toka publike për qoka, vjedh paratë publike me tendera fiktivë, lëviz drogën në Shqipëri dhe në botë, korrupton McGonigal dhe shkel 2 herë ligjet federale, por prapë krimi i organizuar i Soros e shpall burrë të mirë dhe e lejon të vjedhë zgjedhjet, paratë, tokat dhe të bëjë drogën, mjafton që të jetë “the Soros son of the bitch”.
Diktatura nuk është vetëm komuniste, pra ajo që nuk të le të flasësh kundra apo të kufizon lëvizjen e lirë, diktatura është ajo që vjedh dhe shpronon vullnetin e zgjedhësve. 1 në 4 persona pranuan haptazi se kanë ndryshuar votën nën presion zgjedhjet e fundit! Pra, pushteti korruptiv dhe arbitrar ndryshoi vullnetin e 24% të popullsisë!Sa % duhet t’a ndryshojë vullnetin që të quhet autokraci? Se edhe në komunizëm nuk ishte 100% ndryshimi i vullnetit pasi rreth 40% ishin shumë mirë me diktaturën. Bijtë e banditëve komuniste sot burgosin kundërshtarët pasi që Soros kapi dhe vendosi gjyqësorin nën urdhrat e Edi Ramës. Militantët e Taulant Ballës, Ulsi Manjës, Fatmir Xhafës dhe Bushkës janë emëruar si hetues në BKH si Besmir Karaxha, Andi Zyba, etj.
5 prokurorë nga qarku më i kriminalizuar promovoi si prokurorë në SPAK Taulant Balla kur ishte drejtues politik i PS në Elbasan. Prokurori Alfred Shehu që gënjeu publikisht për ngjarjen e Elbasanit në vend të disiplinohet promovohen në SPAK. Ndaj Taulant Balla nuk preket edhe kur del në përgjime të trafikut të drogës me SKY/ECC, në porositje vrasjesh, apo në pengim të drejtësisë dhe lirim të banditëve që vendosin tritol. Të njëjtit hetues të diktaturës janë sot prokurorë të Ramës. Taulant Balla bëri kallëzim të rremë, por në burg është Salianji që nuk bëri fare kallëzim. Edi Rama u vërtetua me vendim gjykate të formës së prerë që ka shpërdoruar detyrën dhe shkakoi mbi 340,000 euro dëm financave publike, por në arrest vendosen Berishën e Malltezin pa lidhje me asgjë publike, por “për cenim të moralit komunist”.
Edi Rama urdhëroi publikisht SPAK për ndjekje penale ndaj Sali Berishës si në kongresin e PS me 9 prill 2022, edhe në Asamblenë e PS me 7 maj 2022, dhe prokurorët politikë brenda 3 javësh nisën hetime 30 vjeçare dhe në 3 brezni deri tek mbesat e palindura të Sali Berishës. Sot të njëjtit prokurorë nuk pranojnë të fusin në dosje urdhrat publike të Edi Ramës e shpallin bamirësinë për korrupsion. Në komunizëm gjyqtarët survejoheshin nga Sigurimi i Shtetit, sot survejohen nga hetues dhe prokurorë të caktuar nga Rama, Taulanti, Ulsiu dhe Fatmir Xhafa. Kjo hedh në erë pavarësinë e gjykatave, por në diktatura drejtësia është një iluzion. Ç’të bëjmë? Kthim tek vlerat e lirisë. Bashkim me çdo opozitar kundër satrapit, të dëgjojmë njeri-tjetrin e sidomos studentët liberatorë, të flasim troç e me transparencë, të shkojmë me program në dorë në çdo familje me pyetje të thjeshta: “A të rrisim rrogat dhe pensionet apo të paguajmë për inceneratorë inekzistentë, anije që vjedhin 80 milionë euro e nuk prodhojnë gjë?” Fight! Fight! Fight! Gëzuar në mot-mote përvjetorin e PD!
TIRANË- Partia Demokratike përkujton ditën e sotme 34-vjetorin e themelimit të kësaj force politike. Në eventin e këtij përvjetori është lexuar edhe një mesazh i ish-deputetit demokrat, Ervin Salianjit. Ky i fundit shprehet në mesazhin e tij, se e nesërmja për demokratët është ditë beteje, pasi shqiptarët po largohen nga vendi për shkak të keqqeverisjes.
Salianji u shpreh më tej se Shqipëria po kalon ditë të këqija dhe sipas tij janë demokratet të cilët duhet të zgjidhjen dhe shpëtimin. Ish-deputeti tha se zgjedhjet po afrojnë dhe se duhet të bëhen të gjithë bashkë për të arritur fitoren.
MESAZH NGA BURGU DEPUTETI I PD, ERVIN SALIANJI NË 34-VJETORIN E PD
I nderuar z. Berisha, Kryetar i Partisë Demokratike të Shqipërisë. Dua t’ju përshëndes sot nga zemra çdo demokrat, të reja e të rinj, gra e burra në të gjithë Shqipërinë, me të cilët kemi vite që luftojmë e bëjmë beteja. Jeni Ju demokratët e palodhur që i keni dhënë dhe i jepni shpirt kësaj partie, kësaj force politike.
Do doja të isha sot aty me ju, e qoftë dhe për disa orë t’i gëzoheshim bashkë rrugës që demokratët ndërtuan për shqiptarët. Fatkeqësisht Shqipëria sot është larg asaj që mendohej kur Partia Demokratike u krijua. E duke e ditur këtë e nesërmja për ne demokratët është sërish betejë ku duhet të zotërojmë rrugët, në qëndresë, rezistencë e protest pikërisht sepse shqiptarët fatkeqësisht çdo ditë e më shumë marrin rrugët për shkak të keq qeverisjes. Nga ku unë jam, është vështirë të veprosh, por bëhet shumë e qartë se çfarë duhet të mendosh e ndërtosh.
Është kaq e qartë që goditjet presionet, represionet janë reflektimi i zi i gropës ku janë zhytur mes vetes socialistët e pushtetit e ku me këto forma e metoda të represionit kërkojnë të mbajnë pushtetin me forcë e me dhunë pasi nuk kanë asgjë që ti ofrojnë qytetarëve. Pasi bënë pakt me djallin dhe e shitën Shqipërinë në krim e korrupsion, sot përpëliten në frikë e në mjerim.
Është e qartë çdo çast që shqiptarët edhe kur na gjykojnë edhe kur na kritikojnë e bëjnë nën ankthin që presin që në të veprojmë. Të jemi më shumë, më të fortë sepse nga ne varet jeta e të gjithëve. Mos presim mbështetje nga ata që forcë nuk kanë, as mirëkuptim nga ata që fuqitë i kanë lënë. Është e qartë që Ata na presin, që qytetarët na presin e ne boll kemi pritur! Sepse sot më shumë se kurrë jemi politikisht më të rritur, më të fortë, më të bashkuar!
Kur e kam nisur rrugëtimin tim në këtë forcë politike që ne gjimnaz me angazhimet që një i ri mund të ketë nuk e kam menduar që sot në fund të vitit 2024 do ju përshëndesja nga një kabinë telefonike e burgut të Fierit ku po mbahem i dënuar për shkak të një denoncimi të një conference për shtyp, të një dëshmie e faktuar, e provuar si e vërtetë ç’ka solli brenda disa orësh dorëzimin e një trafikanti ndërkombëtar droge të lidhur me qeverinë në burgun e Italisë. Kjo nuk flet vetëm për mua por për ditët e vështira në të cilat Shqipëria po kalon dhe kur ka Shqipëria ditë të këqija kur kjo ndodh janë gjithnjë demokratët që duhet të gjejnë zgjidhjen, janë gjithnjë demokratët, që duhet të japin shpëtimin.
Dua të nxis sot të gjithë miqtë e mi, të angazhohen më shumë se asnjëherë më parë, për ta sjellë ndryshimin që i duhet vendit. Çdo minutë, çdo orë me pasion e përkushtim. Zgjedhjet po vijnë. Ne do të jemi bashkë për ta festuar triumfin e të mirës mbi të keqen. Asgjë nuk i ndal demokratët. Zoti i bekoftë demokratët! Zoti e bekoftë Shqipërinë!