Flamuri izraelit u hoq dhe u gris nga protestues të maskuar/ Reagojnë instritucionet: Komuniteti Hebraik, Ministria e Jashtme dhe ambasadorja Peleg: Akt dhune

Ambasadorja e Izraelit në Tiranë, Galit Peleg

TIRANË- Ambasadorja e Izraelit në Tiranë, Galit Peleg, ka reaguar pas incidentit të ndodhur mbrëmjen e së shtunës në kryeqytet, ku flamuri izraelit u hoq dhe u gris mbi Ambasadë.

Në një postim në platformën "X", diplomatja izraelite e ka dënuar këtë akt, duke e cilësuar si një veprim që turpëron popullin shqiptar dhe trashëgiminë e tij krenare. Sipas ambasadores, gjesti bie ndesh me vlerat dhe dinjitetin e shqiptarëve.

“Mbrëmë në Tiranë, protestues hoqën flamurin izraelit dhe e grisën atë mes brohoritjeve të turmës së mbledhur në vendngjarje. Si ambasador i një shteti demokratik, unë besoj në të drejtën e popullit shqiptar për të ushtruar të drejtën e tij qytetare për të protestuar. Megjithatë, një akt i tillë jo vetëm që nuk i shërben kauzës së protestës publike, por gjithashtu cenon dinjitetin e popullit shqiptar dhe trashëgiminë e tij krenare. Falënderoj @HoxhaFer për dënimin e menjëhershëm dhe të qartë të këtij akti.",shkroi ajo./Dosja.al

Reagon Komuniteti Hebraik

TIRANË- Komuniteti Hebraik në Shqipëri ka reaguar pas incidentit të mbrëmjes së kaluar pranë Ambasadës së Izraelit, ku protestuesit hoqën dhe grisën flamurin izraelit nga godina.

Në një deklaratë zyrtare, Komuniteti thekson se, ky akt është një "sinjal alarmi" dhe një shkelje e rëndë e së drejtës ndërkombëtare, e papranueshme për çdo formë proteste.

Gjuha e urrejtjes dhe importimi i konflikteve Përveç dënimit të aktit simbolik, Komuniteti shprehet tejet i alarmuar nga gjuha e përdorur gjatë tubimit, veçanërisht thirrjet si "Izraeli është armiku ynë".

Sipas deklaratës, këto narrativa ekstremiste tentojnë të importojnë në Shqipëri konflikte të huaja, të cilat bien ndesh me traditën historike të tolerancës dhe bashkëjetesës në shoqërinë shqiptare. Komuniteti Hebraik u bën thirrje institucioneve shtetërore dhe qytetarëve shqiptarë që të distancohen nga akte të tilla. 

DEKLARATË ZYRTARE E KOMUNITETIT HEBRAIK SHQIPTAR:

"Komuniteti Hebraik Shqiptar shpreh tronditjen, indinjatën dhe shqetësimin e tij më të thellë për aktin e rëndë të përdhosjes së flamurit të Shtetit të Izraelit pranë Ambasadës së Izraelit në Tiranë, si dhe për thirrjet publike të urrejtjes kundër Izraelit të artikuluara gjatë protestës së zhvilluar mbrëmjen e kaluar.

Ky nuk është thjesht një incident. Ky është një sinjal alarmi. Përdhosja e flamurit të një shteti sovran dhe mik të Republikës së Shqipërisë nuk është një formë proteste. Është një akt urrejtjeje, një sulm ndaj normave të së drejtës ndërkombëtare, ndaj misioneve diplomatike dhe ndaj vetë kulturës së tolerancës që ka bërë Shqipërinë të nderohet në mbarë botën.

Akoma më alarmuese janë deklaratat e dëgjuara nga foltorja e protestës, ku persona të caktuar shpallën publikisht se “Izraeli është armiku ynë.” Kjo është një gjuhë e rrezikshme, përçarëse dhe nxitëse e urrejtjes, e cila synon të importojë në Shqipëri konflikte dhe narrativa ekstremiste që nuk kanë pasur kurrë vend në shoqërinë shqiptare.

Komuniteti Hebraik Shqiptar e konsideron këtë zhvillim jashtëzakonisht shqetësues, pasi për herë të parë po vërehen përpjekje të hapura për të normalizuar gjuhën antisemitike në hapësirën publike shqiptare. Historia ka treguar se antisemitizmi nuk fillon me dhunë; ai fillon me fjalë, me propagandë, me demonizim dhe me heshtjen përballë tyre. Pikërisht për këtë arsye, çdo akt i tillë duhet të dënohet menjëherë dhe pa asnjë relativizim.

Shqipëria nuk mund dhe nuk duhet të lejojë që individë të maskuar apo grupe radikale të njollosin reputacionin ndërkombëtar të vendit tonë. Ky është vendi që gjatë Holokaustit mbrojti hebrenjtë kur pjesa më e madhe e Evropës i dorëzonte drejt vdekjes. Shqipëria u bë simbol i Besës, i humanizmit dhe i guximit moral. Ky është identiteti ynë kombëtar dhe askush nuk ka të drejtë ta zëvendësojë atë me gjuhën e urrejtjes.

Ne theksojmë qartë se e drejta për të protestuar është një e drejtë themelore në një shoqëri demokratike. Por kjo e drejtë përfundon në momentin kur ajo shndërrohet në nxitje të urrejtjes, në përdhosje të simboleve shtetërore, në sulme ndaj përfaqësive diplomatike dhe në thirrje që ushqejnë antisemitizmin.

Komuniteti Hebraik Shqiptar përshëndet reagimin e menjëhershëm dhe të qartë të Ministrisë për Evropën dhe Punët e Jashtme, e cila dënoi këtë akt të papranueshëm. Njëkohësisht, u bëjmë thirrje institucioneve përgjegjëse që të hetojnë me seriozitet maksimal këtë ngjarje, të identifikojnë autorët dhe organizatorët e këtyre akteve dhe të garantojnë se Shqipëria nuk do të bëhet terren për propagandën e urrejtjes, antisemitizmit apo ekstremizmit.

I bëjmë thirrje gjithashtu të gjithë spektrit politik, medias, shoqërisë civile, komuniteteve fetare dhe çdo qytetari të përgjegjshëm që të refuzojnë pa mëdyshje çdo përpjekje për të mbjellë urrejtje ndaj hebrenjve apo ndaj Shtetit të Izraelit. Heshtja përballë gjuhës së urrejtjes nuk është neutralitet; është rrezik.

Komuniteti Hebraik Shqiptar mbetet i vendosur të mbrojë vlerat mbi të cilat është ndërtuar marrëdhënia historike mes popullit shqiptar dhe popullit hebre: respektin, dinjitetin, solidaritetin dhe mbrojtjen e jetës njerëzore.

Shqipëria nuk është dhe nuk do të jetë kurrë vend i antisemitizmit. Ata që përpiqen të importojnë urrejtjen në vendin tonë nuk përfaqësojnë Shqipërinë, nuk përfaqësojnë popullin shqiptar dhe nuk përfaqësojnë historinë tonë. Historia e Shqipërisë është histori e Besës, jo e urrejtjes.", deklaron komuniteti./Dosja.al

TIRANË-  Një incident ka ndodhur i cili ka shkaktuar reagime të shumta në opinionin publik.

Mësohet se, një protestuese është ngjitur në tarracën e Ambasadës Izraelite në Tiranë, ku ka hequr dhe më pas ka grisur flamurin izraelit.

Gjesti është shoqëruar me brohorima nga një pjesë e turmës së pranishme, veprim i cili është filmuar dhe shpërndarë gjerësisht në rrjetet sociale./Dosja.al

Ministria e Punëve të Jashtme

TIRANË-  Ministria për Evropën dhe Punët e Jashtme (MEPJ) ka reaguar ashpër pas ngjarjes së ndodhur gjatë protestës së të shtunës në kryeqytet, ku një grup personash të maskuar kanë hequr dhe përdhosur flamurin e Shtetit të Izraelit, të vendosur pranë ambienteve të Ambasadës së Izraelit në Tiranë.

Nëpërmjet një deklarate për mediat, ministria ka dënuar me forcë këtë akt, duke e cilësuar si një shfaqje të papranueshme të intolerancës. Në qëndrimin e saj, Ministria nënvizon se veprime të tilla nuk përfaqësojnë në asnjë mënyrë vlerat e shoqërisë shqiptare dhe nuk mund të mbulohen nga parimet demokratike.

Reagim i Ministrisë për Evropën dhe Punët e Jashtme:

"Ministria për Evropën dhe Punët e Jashtme e Republikës së Shqipërisë dënon me forcë heqjen dhe përdhosjen e flamurit të Ambasadës së Shtetit të Izraelit në Tiranë nga protestues të maskuar gjatë protestës së mbrëmshme.

Veprime të tilla nuk kanë asnjë lidhje me lirinë e shprehjes, të drejtën legjitime për protestë paqësore apo me vlerat tona demokratike dhe standardet evropiane që kemi ndërtuar dhe po forcojmë çdo ditë. Ato janë shfaqje të urrejtjes, intolerancës dhe nxitjes së saj, dhe janë krejtësisht të papajtueshme me parimet e respektit dhe bashkëjetesës që Shqipëria i ka në themel dhe i çmon me përkushtim.

Ky akt i turpshëm bie ndesh me traditën e gjatë shqiptare të mikpritjes, harmonisë dhe respektit për tjetrin, vlera që kanë karakterizuar shoqërinë tonë për breza me radhë. Ato nuk përfaqësojnë as Shqipërinë, as popullin shqiptar. Përfaqësojnë vetëm ata që kërkojnë të provokojnë, të përçajnë dhe të përhapin urrejtje, duke shpërdoruar dhe keqpërdorur në mënyrë të qëllimshme të drejtat dhe liritë.

Ministria riafirmon angazhimin e palëkundur të Shqipërisë për mbrojtjen e misioneve diplomatike dhe simboleve të tyre, në përputhje të plotë me të drejtën ndërkombëtare dhe Konventën e Vjenës për Marrëdhëniet Diplomatike. Ne shprehim solidaritetin tonë me Ambasadën e Shtetit të Izraelit dhe theksojmë se dhuna, intimidimi dhe gjuha e urrejtjes nuk mund dhe nuk do të kenë vend në një shoqëri demokratike.", shkruan Ministria./Dosja.al