Aksident në Rrugën e Arbrit, vdesin 2 vëllezërit dhe një grua! Makinat përplasen 'kokë më kokë' dhe shkatërrohen plotësisht, 2 të plagosur rëndë

Pamje nga aksidenti

DIBËR- Zbulohen detaje të reja lidhur me aksidentin e ndodhur në rrugën e Arbrit që shkakoi 3 viktima dhe 4 të plagosur. Nga kqyrja paraprake e vendit të ngjarjes vihet re se mjeti tip Mercedes Benz 240 ku udhëtonin Kujtim dhe Murat Istrefi me dy bashkëshortet Lulzime dhe Firuze Istrefi, ka dalë nga një rrugë dytësore duke dalë nga fshati Gjoricë ku kishin qenë për vizitë me rastin e ndërrimit të viteve.

Por pikërisht në momentin që kanë dalë në rrugën nacionale i kanë prerë rrugën mjetit tip "Mercedez Benz" me targa angleze. Si pasojë e shpejtësisë, përplasja ka qenë shumë e fuqishme dhe mjeti ku udhëtonin viktimat është ndarë në 2 pjesë.

Përplasja ndërmjet makinave ka qenë aq e fortë saqë mjeti është ndarë më dysh. Rruga ku ka ndodhur aksidenti është problematike pasi nuk ka asnjë kufizim të shpejtësisë, ka mungesë sinjalistike si dhe mungesë ndriçimi. Por edhe shpejtësia e lartë mendohet se ka qenë një prej shkaqeve të aksidentit të ndodhur. Në natën e ndërrimit të viteve, po në aksin Bulqizë-Maqellare, shumë pranë vendit ku ndodhi aksidenti tragjik mbrëmjen e sotme, ndërroi jetë edhe 24-vjeçari Yllson Tasha.

Foto ilustruese

DIBËR- Tre persona humbën jetën dhe katër të tjerë u plagosën në një aksident të rëndë në Rrugën e Arbrit. Policia e Shtetit bën me dije se dy nga viktimat janë vëllezër dhe janë identifikuar si Kujtim Istrefi, Murat Istrefi ndërsa e treta është një grua, Lulzime Istrefi.

“Rreth orës 18:15, në aksin rrugor Fushë Bulqizë-Shupenzë, në vendin e quajtur 'Ura e Gjoricës', janë përfshirë në një aksident rrugor 2 automjete dhe për pasojë kanë humbur jetën në vendngjarje shtetasit K.I., dhe M.I. si dhe ka humbur jetën në spital shtetasja L.I. Gjithashtu janë transportuar për ndihmë mjekësore në spital shtetaset F.I., K.M., dhe shtetasit M.L., E.L., pasagjer në automjete. Grupi hetimor ndodhet në vendin e ngjarjes po punon zbardhjen e shkaqeve të aksidentit,"-bën me dije Policia e Shtetit lidhur me ngjarjen. 

Pamje nga aksidenti

DIBËR- Rëndohet bilanci i aksidentit në Dibër, një grua vdes rrugën për në spital. Deri më tani nuk dihet identiteti i saj, por nga aksidenti i ndodhur pasditen e sotme, kanë ndërruar jetë në vend edhe dy vëllezërit nga Maqellara, Kujtim dhe Murat Istrefi.

Pamje nga aksidenti

DIBËR- Identifikohen viktimat e aksidentit në Dibër, humbin jetën 2 vëllezër. Viktimat janë identifikuar si Kujtim dhe Murat Istrefi, nga Maqellara, të cilët qarkullonin në një prej mjeteve që u përplasën kokë më kokë. Ndërkohë që ende nuk dihen detaje lidhur me emrat e të plagosurve dhe gjendja e tyre shëndetësore. 

Pamje nga vendi i ngjarjes

DIBËR- Dalin pamjet e para nga vendi ku ka ndodhur aksidenti që shkaktoi 2 viktima mbrëmjen e sotme. Viktimat nuk janë identifikuar ende, ndërsa drejt vendit të ngjarjes janë nisur Policia dhe forcat zjarrfikëse.

Deri më tani flitet për 3 të plagosur nga përplasja e dy mjeteve. Nga fotot e kapura nga vendi i ngjarjes, dallohet se makinat janë përplasur kokë më kokë dhe janë shkatërruar plotësisht në vendin e quajtur ‘Fusha e Gjirocës’. Deri më tani nuk dihet as gjendja shëndetësore e të pplagosurve dhe as Policia e Shtetit nuk ka dalë me një njoftim zyrtar lidhur me ngjarjen.