Aksidenti MISTERIOZ në Fier/ 'Golfi' dyshohet se ka rënë në Seman, shoferit i del celulari i fikur! RENEA s'gjen asnjë shenjë të mjetit

Foto nga vendngjarja

FIER- Pjesë të mjetit tip 'Golf' që është aksidentuar mëngjesin e sotëm në urën e Mbrostarit janë gjetur në lumin e Semanit. Pjesët që janë gjetur janë të pjesës së përparme të mjetit. 

Polumbarët e Reneas kanë kërkuar mbylljen e digës së Gramshit, hapja e së cilës ka shtuar mbi një metër nivelin e lumit Seman duke vështirësuar kërkimet për gjetjen e mjetit.

Në vendin e aksidentit është gjetur një targë automjeti i cili rezulton të jetë e një makine të dhënë me qira, ndërkohë që kanë mbërritur polumbarë të Reneas dhe ekspertë të policisë. Sipas policisë, targa i përket një automjeti të marrë me qira nga personi M. L., 26 vjeç, banues në Fier.

Pamjet nga vendngjarja

FIER- Pamjet e mëposhtme janë nga aksidenti që ka ndodhur orët e para të mëngjesit në urën e Mbrostarit në Fier. Siç shihet nga fotot e mëposhtme, makina është përplasur me parmakët e urës dhe dyshohet se ka përfunduar në lum. 

Në vendngjarje kanë shkuar polumbarët të cilët po punojnë për të gjetur makinën nën ujë. 

Pamje nga aksidenti

FIER- Policia ka reaguar në lidhje me aksidentin që ka ndodhur orët e para të mëngjesit të sotëm në Fier. Mësohet se targat e gjetura i përkasin një makinë të marrë me qira nga një 26-vjeçar. Pasi është marrë në telefon, i riu nuk është përgjigjur dhe për këtë kanë shkuar polumbarët e Renea-s për të kërkuar në lum për makinën.  

Njoftimi i Policisë:

Fier/Informacion paraprak Në orët e para të mëngjesit të sotëm, në vendin e quajtur "Ura e Mbrostarit", janë konstatuar të thyer parmakët anësore të njërit krah të kësaj ure. Në anë të rrugës është gjetur targa e një automjeti. Nga verifikimet rezultoi se kjo targë i përket një automjeti të marrë me qera nga shtetasi M. L., 26 vjeç, banues në Fier, me të cilin nuk është bërë e mundur marrja e kontaktit pasi numri telefonit del i fikur. Priten polumbarët e Renea-s për të kontrolluar përgjatë lumit me qëllim gjetjen e automjetit nëse ka rënë në lum. Grupi hetimor po punon për sqarimin e rrethanave të kësaj ngjarjeje.

Foto nga vendngjarja

FIER- Një aksident ka ndodhur orët e para të mëngjesit ditën e sotme në Fier. Mësohet se një makinë tip 'Golf' ka rënë nga ura e Mbrostarit dhe ka përfunduar në lumin Seman. Nuk dihet shkaku i aksidentit, ndërkohë që në vendngjarje ka shkuar policia e cila po punon për zbardhjen e ngjarjes.

Momentalisht janë ngritur të gjitha pistat, ndërsa pranë vendit të ngjarjes është gjetur një targë automjeti e po tentohet kontakti me drejtuesin e automjetit që i përket, telefoni i të cilit rezulton i fikur. Por nga targat e gjetura është vërtetuar se makina e përplasur ka qenë marrë me qira. 

Zjarrfikësit po punojnë dhe po kërkojnë për makinën nën ujë, pasi ujërat e lumit Seman në këtë zonë janë relativisht të thella, por forca e rrjedhës nuk është e tillë sa për të larguar një automjet.