Aktivizohet një vatër zjarri në zonën malore mes fshatrave Dërmish dhe Rumanxa në Finiq, reshjet e shiut shuajnë flakët në pyjet e Fushë-Arrëzit

foto ilustruese

TIRANË- Ministria e Mbrojtjes ka dhënë përditësime lidhur me situatën e zjarreve në vend. Në njoftimin e mëposhtëm thuhet se gjatë orëve të fundit janë evidentuar 13 vatra zjarri, nga të cilat 9 janë shuar, 2 janë aktive dhe 2 janë në monitorim.

Aktualisht vatrat aktive janë në Pezë Helmës dhe Ibë në Tiranë; në Parkun Natyror Gërmenj në Leskovik dhe në fshatin Dërmish në bashkinë Finiq. Te kjo e fundit në terren po veprojnë 5 automjete zjarrfikëse me 20 efektivë të MZSH Finiq, 20 forca vullnetare dhe dy helikopterë të Forcave të Armatosura, të cilët po kryejnë operacione nga ajri për shuarjen e flakëve.

Bëhet me dije se aktualisht nuk ka rrezik për banesat nga zjarri. 

NJOFTIMI I PLOTË: 

Situata e zjarreve në vend

Forcat zjarrfikëse, me ndihmën edhe të Forcave të Armatosura po vijojnë ndërhyrjet në disa zona të vendit për shuarjen e vatrave të zjarrit. Në Finiq të Vlorës, dy helikopterë të FA janë duke kryer operacione intensive nga ajri, duke mbështetur forcat tokësore në shuarjen e flakëve.

Gjatë orëve të fundit janë evidentuar 13 vatra zjarri, nga të cilat:

- 9 vatra janë shuar,
- 2 vatra janë aktive,
- 2 vatra janë në monitorim.

Aktualisht aktive mbeten vatrat në:

* Pezë Helmës, njësia Pezë, Tiranë: Vatra e zjarrit po mbahet në mbikëqyrje deri në fikjen përfundimtare. Sot janë shfaqur disa vatra të vogla brenda perimetrit të djegur.
* Ibë, njësia Bërzhitë, Tiranë: Është aktivizuar një vatër zjarri në sipërfaqe me shkurre dhe mare, pranë zonës ku një vatër u shua një ditë më parë. Terreni është i paarritshëm për mjetet zjarrfikëse. Në ndërhyrje kanë marrë pjesë 12 forca zjarrfikëse me pajisje individuale dhe 4 forca të APR.

* Parku Natyror Gërmenj, njësia Leskovik: Vijon puna për shuarjen e zjarrit, me angazhimin e 3 mjeteve dhe 14 efektivëve zjarrfikës të MZSH Kolonjë, si dhe 6 forcave policore.

* Fshati Dërmish, njësia Finiq, Vlorë: Vijon puna për shuarjen e zjarrit në një sipërfaqe me shkurre. Në terren po veprojnë 5 automjete zjarrfikëse me 20 efektivë të MZSH Finiq, 20 forca vullnetare dhe dy helikopterë të Forcave të Armatosura, të cilët po kryejnë operacione nga ajri për shuarjen e flakëve. Momentalisht nuk ka rrezik për banesa.

foto nga vendngjarja

FINIQ- Një vatër zjarri është aktivizuar në zonën malore mes fshatrave Dërmish dhe Rumanxa në bashkinë Finiq. Sipas informacionve, era e fortë në zonë ka favorizuar përhapjen me shpejtësi të flakëve. 

Bëhet me dije se në vendin e ngjarjes për shuarjen e flakëve ndodhen forca zjarrfikëse. Gjithashtu po operohet edhe nga ajri me një helikopter për vënien nën kontroll të situatës.

foo ilustruese

FUSHË-ARRËZ- Disa vatrja zjarri në territorin e Bashkisë Fushë-Arrëz janë shuar plotësisht gjatë natës nga rrebeshi i shiut. Reshjet kanë ndihmuar në fikjen e flakëve në zonat e Lumit të Trunit, Kulumri dhe në pyjet e Kryeziut, ku prej ditësh zjarret kishin krijuar probleme serioze për mjedisin dhe komunitetin lokal.

Pavarsisht se vatrat janë shuar plotësisht, dëmet e shkaktuara janë të konsiderueshme. Vetëm në zonën pyjore Sakat – Laku i Hithit, janë djegur 60 hektarë me pyje, ndërsa rreth 130 hektarë të tjerë janë prekur nga flakët. Edhe në zonën e Kryeziut, zjarri ka shkrumbuar rreth 7 hektarë pyje me pisha, duke dëmtuar ndjeshëm florën dhe faunën vendore.

Ndërkohë, situata është përmirësuar edhe në qarkun e Vlorës, ku mbrëmjen e kaluar u raportua për përkeqësim të ndjeshëm të zjarreve. Vatrat janë shuar plotësisht në fshatin Vajzë dhe në Drashovicë të bashkisë Selenicë. Aktualisht, një vatër e vogël mbetet aktive në fshatin Mavrov, por autoritetet raportojnë se ajo është drejt shuarjes.

Foto

SELENICË- Një 43-vjeçar është vënë në pranga nga policia në Selenicë. Arrestimi i tij ka ardhur pasi 43-vjeçari ka ndezur një zjarr pas një konflikti me një bashkëfshatar të tij. Zjarri u ndez në fshatin Drashovicë.

Si pasojë e flakëve mësohet se është djegur një sipërfaqe e mbjellë me ullinj dhe janë rrezikuar të digjen bagëtitë e imta të personit që u konfliktua me të arrestuarin. 43-vjeçari është identifikuar si Elvis Bylyshi. Materialet procedurale i kaluan Prokurorisë pranë Gjykatës Vlorë për veprime të mëtejshme

Njoftimi i policisë;

Si rezultat i veprimeve hetimore të shpejta dhe profesionale për dokumentimin e rasteve të zjarrvënieve dhe vënien përpara përgjegjësisë ligjore të autorëve, specialistët për Hetimin e Krimeve të Stacionit të Policisë Selenicë bënë ndalimin me iniciativë dhe referuan materialet procedurale në Prokurori, për shtetasin:

E. B., 43 vjeç, banues në fshatin Drashovicë, Selenicë. Nga hetimet paraprake dyshohet se ky shtetas, më datë 21.08.2025, rreth orës 19:30, në vendin e quajtur “Fshati i Vjetër”, Drashovicë, ka ndezur zjarr në mënyrë të qëllimshme, pas një konflikti me bashkëfshatarin e tij, shtetasin F. N. Si pasojë e përhapjes së flakëve, është djegur një sipërfaqe toke e mbjellë me ullinj dhe janë rrezikuar të digjen bagëtitë e imta të shtetasit F. N.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme. Drejtoria Vendore e Policisë Vlorë apelon për të gjithë qytetarët që në asnjë rast të mos ndezin zjarre, pasi do të përballen me ligjin.

pamje nga zjarret

VLORË- Disa vatrja zjarri përfshinë mbrëmjen e kaluar zonat e Dukatit, Drashovicës  në qarkun e Vlorës. Zjarret raportohet se ishin të qëllimshme dhe kjo ngriti alarm tek autoritetet dhe banorët lokalë. Lidhur me situatën ka reaguar edhe Ministria e Mbrojtjes, e cila ka dhënë detajet e fundit se si paraqitet situata. Sipas njoftimit të Ministrisë së Mbrojtjes, dyshohet që zjarret janë shkaktuar nga një grup i strukturuar kriminal, që ka vepruar me qëllim dhe në mënyrë të koordinuar.

Konkretisht zjarret u shfaqën mes orës 20:15 dhe 22:15, në një periudhë kohe që konsiderohet kritike për shkak të pamundësisë për ndërhyrje ajrore. Dukat i Ri ishte një nga vatrat më të rrezikshme, por falë reagimit të menjëhershëm të emergjencave civile, zjarri u izolua dhe u shmang çdo rrezik për banesat. Ndërkohë, tre vatra aktive në lartësitë e Drashovicës dhe dy të tjera në Vajzë mbeten ende të pakontrolluara.

Reagimi:

Sonte, mes orës 20:15 dhe 22:15, është shfaqur një numër i konsiderueshëm vatrash zjarri në fshatrat Dukat, Drashovicë dhe Vajzë. Pas reagimit të shpejtë të emergjencave civile të Vlorës, zjarri në fshatin Dukat i Ri është izoluar plotësisht, duke evituar përkeqësimin e situatës dhe rrezikun ndaj zonave të banuara. Ndërkohë, 3 vatrat e shfaqura njëherazi në lartësitë e staneve të Drashovicës dhe 2 vatrat e shfaqura në orën e fundit në Vajzë mbeten aktive.

Forcat zjarrfikëse vendore dhe Forcat e Armatosura janë në terren në këto dy fshatra, duke krijuar perimetra sigurie. Tipologjia dhe kronologjia e këtyre vatrave krijojnë bindjen e arsyeshme se kemi të bëjmë jo vetëm me zjarrvënie të qëllimshme, por me një grup të strukturuar kriminal në veprim në këtë zonë, anëtarët e të cilit kanë zgjedhur të veprojnë në orët e natës, kur është e pamundur ndërhyrja nga ajri. Forcat operacionale do të mbeten të angazhuara në terren përgjatë gjithë natës, për të siguruar banesat dhe pronat e qytetarëve.