Biden i jep leje Ukrainës të përdorë në Rusi armët me rreze të gjatë! Zelenskyy: Raketat do të flasin vetë! Zyrtari rus: Ky vendim mund të çojë në Luftën e Tretë Botërore

foto ilustruese

LITUANI- Presidenti i Lituanisë Gitanas Nauseda ka reaguar pas vendimit të presidentit të SHBA-së, Joe Biden për të hequr kufizimet ndaj Ukrainës lidhur me përdorjen e armëve amerikane për të goditur më thellë Rusinë. Naudesa e përshkroi lëvizjen si një "moment vendimtar" në luftën e Ukrainës kundër Rusisë.

"Ka ardhur dita! Ukraina tani mund të synojë objektet ushtarake në Rusi duke përdorur raketa me rreze të gjatë. Ky është një moment vendimtar në luftën kundër Rusisë agresore. Paqja nuk mund të arrihet përmes dobësisë. Paqja është shpërblimi i të fortëve. Qëndro e fortë, Ukrainë.", thuhet në postimin e liderit lituanez.

Një reagim lidhur me vendimin e SHBA, ka ardhur edhe nga Polonia. "Autorizimi i Uashingtonit për Kievin për të goditur territorin rus me raketa me rreze të gjatë veprimi është një gjuhë që Putin e kupton," tha Ministri i Jashtëm polak Radoslaw Sikorski .

"Presidenti Biden iu përgjigj hyrjes së ushtarëve të Koresë së Veriut në luftë dhe sulmit masiv me raketa ruse në një gjuhë që Vladimir Putin e kupton - duke hequr kufizimet në territorin ukrainas. Një viktimë e agresionit ka të drejtë të mbrohet. Forca dekurajon, dobësia provokon.", thuhet në postimin e plotë në "X". 

Vendimi është një ndryshim i madh i politikës amerikane dhe vjen pasi Biden është gati të largohet nga detyra. Presidenti i sapozgjedhur Donald Trump është zotuar të kufizojë mbështetjen amerikane për Ukrainën dhe t'i japë fund luftës sa më shpejt të jetë e mundur.

Volodymyr Zelenskyy dhe shumë prej mbështetësve të tij perëndimorë kanë bërë presion ndaj Bidenit për muaj të tërë që të lejojë Ukrainën të godasë objektivat ushtarake brenda Rusisë me raketa të furnizuara nga perëndimi, duke thënë se ndalimi i SHBA-së e kishte bërë të pamundur që Ukraina të përpiqej të ndalonte sulmet ruse në qytetet e saj dhe rrjetet elektrike. Disa mbështetës kanë argumentuar se kjo dhe kufizime të tjera të SHBA-së mund t'i kushtojnë Ukrainës luftën.

foto ilustruese

SHBA- Pas SHBA-së, edhe Britania e Madhe dhe Franca raportohet se i dhanë sonte dritën “jeshile” Ukrainës për përdorimin e raketave me rreze të gjatë veprimi që do t’i mundësojë Kievit të godasë objektivat brenda territorit rus. Vendimi i tre aleatëve perëndimorë krijon përshkallëzime të reja në luftën me Rusinë, por mund të sjellë edhe ndryshime të reja lidhur me politikën që presidenti i zgjedhur amerikan Donald Trump synon të ndjekë për çështjen e Ukrainës. 

SHBA ishin të parat që dhanë dritën jeshile për përdorimin e raketave me rreze të gjatë. Armët ka të ngjarë të përdoren fillimisht kundër trupave ruse dhe koreano-veriore që mbrojnë forcat ukrainase në rajonin Kursk të Rusisë perëndimore, thanë zyrtarët amerikanë për The New York Times. 

Vendimi për të lejuar ukrainasit të përdorin raketat me rreze të gjatë veprimi, të njohura si Sistemet e Raketave Taktike të Ushtrisë, ose ATACMS , erdhi si përgjigje ndaj vendimit të befasishëm të Rusisë për të sjellë trupat e Koresë së Veriut në betejë, thanë të njëjtët zyrtarë. Vendimi i zotit Biden është një ndryshim i rëndësishëm në politikën amerikane dhe siç theksojnë mediat amerikane, kjo zgjedhje ka ndarë këshilltarët e tij pasi vendimi i tij vjen dy muaj para inaugurimit të Presidentit të zgjedhur Donald J. Trump , i cili ka premtuar të kufizojë mbështetjen e mëtejshme të Uashingtonit për Ukrainën.

Presidenti aktual amerikan filloi të lehtësojë kufizimet për përdorimin e armëve të furnizuara nga SHBA për ukrainasit pasi Rusia filloi ofensivën e saj në maj në Kharkiv, qyteti i dytë më i madh i vendit.

Për të ndihmuar ukrainasit të mbrojnë Kharkivin, Biden i autorizoi ata të përdorin Sistemin e Raketave të Artilerisë së Lëvizshmërisë së Lartë, ose HIMARS, të cilat kanë një rreze prej rreth 50 milje, kundër forcave ruse pikërisht përtej kufirit. Në atë fazë të luftës, Joe Biden nuk i lejoi ukrainasit të përdornin ATACMS me rreze më të gjatë. 

Ukraina planifikon të kryejë sulmet e para me rreze të gjatë në ditët në vijim, thanë të njëjtat burime, pa dhënë detaje për shkak të shqetësimeve të sigurisë operacionale. Shtëpia e Bardhë refuzoi të komentojë mbi informacionin specifik. Sulmet e para të thella ka të ngjarë të kryhen duke përdorur raketa ATACMS, të cilat kanë një rreze veprimi deri në 306 kilometra.

Ndërsa disa zyrtarë amerikanë kanë shprehur skepticizëm se lejimi i sulmeve me rreze të gjatë do të ndryshojë rrjedhën e përgjithshme të luftës, vendimi mund të ndihmojë Ukrainën në një kohë kur forcat ruse po bëjnë përfitime dhe ndoshta ta vendosë Kievin në një pozicion më të mirë negociues kur dhe nëse pushon- zhvillohen bisedimet për zjarrin.

Është e paqartë nëse Trump do ta anulojë këtë vendim të Bidenit kur të marrë detyrën. Trump ka kritikuar prej kohësh shkallën e ndihmës ekonomike dhe ushtarake të SHBA-së për Ukrainën dhe është zotuar t'i japë fund luftës shpejt, pa shpjeguar se si. Por disa republikanë të Kongresit i kanë kërkuar Bidenit që të lirojë rregullat se si Ukraina mund të përdorë armët e furnizuara nga SHBA. Rusia ka paralajmëruar se do të konsideronte një masë për të hequr kufizimet në përdorimin e armëve amerikane nga Ukraina si një përshkallëzim të madh.

volodymyr zelenskyy

UKRAINË- Presidenti ukrainas Volodymyr Zelenskyy tha këtë mbrëmje se raketat "do të flasin vetë dhe sulme të tilla nuk njoftohen", pas raportimeve se Uashingtoni i kishte dhënë leje Kievit të përdorë raketat me rreze të gjatë veprimi në Rusi.

Udhëheqësi ukrainas tha se plani për të forcuar Ukrainën ishte "plani i fitores" që ai ua prezantoi partnerëve dhe një nga "pikat kyçe" të tij ishin aftësitë me rreze të gjatë për ushtrinë ukrainase. 

"Sot flitet shumë në media se ne marrim leje për veprimet përkatëse. Por goditjet nuk bëhen me fjalë. Gjëra të tilla nuk lajmërohen. Raketat do të flasin vetë. Sigurisht që do të flasin," tha ai.

Duke iu drejtuar sulmit të Rusisë gjatë natës, Zelenskyy tha gjithashtu se sot shënoi një nga sulmet më të mëdha dhe më të rrezikshme ruse në të gjithë luftën. 

“Dhe kjo është përgjigja për të gjithë ata që donin të arrinin diçka me Putinin përmes bisedave, telefonatave, përqafimeve - qetësimit.  Sot, ky 'pëllumb i paqes' na dërgoi një tjetër breshëri raketash kinzhal dhe kalibr. Kjo është diplomacia e tij. Gjuha e tij është tradhti. Koha duhet të investohet "jo për të folur me dikë në Moskë, por për ta detyruar vërtetë Rusinë t'i japë fund luftës", vazhdoi Zelenskyy.

foto ilustruese

RUSI- Vendimi i Uashingtonit për të lejuar Ukrainën të godasë Rusinë me raketa amerikane me rreze të gjatë veprimi mund të çojë në Luftën e Tretë Botërore dhe do të marrë një përgjigje të shpejtë, tha Vladimir Dzabarov, nënkryetari i Komitetit të Punëve të Jashtme të Këshillit të Federatës, sipas agjencisë ruse të lajmeve TASS.

Raportet dhe deklaratat e zyrtarëve amerikanë thanë se Uashingtoni i kishte dhënë Kievit dritën jeshile për herë të parë për të bombarduar territorin rus me raketa me rreze të gjatë veprimi, të furnizuara për ushtrinë ukrainase nga SHBA.

Ukraina planifikon të kryejë sulmet e saj të para me rreze të gjatë në ditët në vijim, thanë burimet, pa zbuluar detaje për shkak të shqetësimeve të sigurisë operacionale. Masa e SHBA-së vjen pas disa muajsh kërkesash të Volodymyr Zelenskyy për të lejuar ushtrinë e Ukrainës të përdorë armët amerikane për të goditur objektivat ushtarake ruse larg kufirit të saj.

Ndryshimi vjen pas vendosjes së trupave tokësore të Koresë së Veriut nga Rusia për të plotësuar forcat e veta, një zhvillim që ka shkaktuar alarm në Uashington dhe Kiev.  Sulmet e para të thella ka të ngjarë të kryhen duke përdorur raketa ATACMS, të cilat kanë një rreze veprimi deri në 190 milje, sipas burimeve. Ndërkohë, Shtëpia e Bardhë ende nuk ka komentuar mbi këto raportime.

foto ilustruese

SHBA- Mediat amerikane kanë raportuar se administrata e presidentit amerikan, Joe Biden, ka hequr kufizimet që e parandalonin Ukrainën që të përdorte armët amerikane për të sulmuar thellë brenda territorit rus.

The New York Times, Associated Press dhe Reuters raportuan më 17 nëntor se Biden ka hequr këto kufizime, duke u thirrur në burime që kanë njohuri për këtë çështje.

Shtëpia e Bardhë ende nuk ka komentuar për këto raportime.

Nëse ky lajm konfirmohet, atëherë do të përbënte një ndryshim të madh në politikën amerikane, pasi Kievi që një kohë të gjatë i ka kërkuar Uashingtonit që ta lejojë që të përdorë armë me rreze të gjatë veprimi për të sulmuar Rusinë.

Reuters, duke cituar burime, raportoi se Kievi planifikon të kryejë sulmet e para me armë me rreze të gjatë veprimi pas disa ditësh, por nuk dha më shumë detaje.

Ukraina me gjasë do të përdorë raketat e sistemit ATACMS – që kanë rreze veprimi deri në 300 kilometra – tha Reuters, duke cituar tri burime që kanë informacione për këtë çështje.

ATACMS apo Sistemi Raketor Taktik Ushtarak është raketë e fuqishme hipersonike, balistike që mund të udhëtojë deri në 300 kilometra.

Administrata aktuale amerikane së fundi ka qenë duke kërkuar për mënyra se si të rrisë ndihmën për Ukrainën, para se Bideni të përfundojë mandatin më 20 janar 2025, kur presidenti i zgjedhur republikan, Donald Trump, të rikthehet në Shtëpinë e Bardhë.

Trump ka kritikuar mbështetjen e fuqishme që Bideni i ka dhënë Kievit dhe ka thënë se synon që t’i japë fund luftës sa më shpejt që të jetë e mundur, por nën kushte që me gjasë do të jenë të papranueshme për Ukrainën.

Sipas New York Times, lejimi që ukrainasit të përdorin armë me rreze të gjatë veprimi, ATCMS, erdhi si përgjigje ndaj vendimit të Rusisë për të përfshirë në luftë trupat koreanoveriore.

Burimet e kësaj media amerikane thanë se përderisa nuk pritet që ky vendim i administratës së Bidenit të ndryshojë në mënyrë thelbësore rrjedhën e luftës, një nga qëllimet e ndryshimit të politikës, sipas tyre, është që t’u dërgojë një mesazh koreanoveriorëve se ushtarët e tyre janë të cenueshëm dhe nuk duhet të dërgojnë më shumë në Rusi.

SHBA-ja, Ukraina, Koreja e Jugut dhe NATO-ja kanë thënë se Koreja e Veriut – e cila ka rritur bashkëpunimin ushtarak me Rusinë – i ka dërguar Rusisë mijëra ushtarë, për ta ndihmuar Moskën në luftën në Ukrainë.

SHBA-ja ka thënë se beson që 10.000 ushtarë koreanoveriorë gjenden në rajonin rus të Kurskut, i cili ndodhet në kufi me Ukrainën.

Armët amerikane me rreze të gjatë veprimi, sipas burimeve të The New York Times ka të ngjarë që fillimisht do të përdoren ndaj trupave ruse dhe koreanoveriore në Kursk.

SHBA-ja është mbështetësja më e madhe e Ukrainës, sa i përket ndihmës ushtarake dhe financiare, që kur Rusia nisi pushtimin e paprovokuar të shtetit fqinj më 2022.

Adminsitrata Biden fillimisht kishte hezituar që t'i jepte Ukrainës armë të fuqishme sikurse ATACMS, tanket Abrams dhe Sistemin raketor të artilerisë me lëvizshmëri të lartë (HIMARS), pasi kishte shprehur shqetësimin se Rusia mund t'i shihte si provokim.

Përveç SHBA-së, edhe shtete të tjera e kanë pajisuar Ukrainën me armë të fuqishme, sikurse janë raketat lundruese britanike me rreze të gjatë veprimi, Storm Shadow, që mund të udhëtojnë deri në 250 kilometra.

Kremlini ka paralajmëruar më herët se nëse SHBA-ja apo ndonjë nga aleatët e tjerë perëndimorë i japin leje Ukrainës që të përdorë armë me rreze të gjatë për ta sulmuar Rusinë, Moska do ta shihte si përshkallëzim të madh.

Që nga nisja e pushtimit rus të Ukrainës në shkurt të vitit 2022, Moska ka përdorur armë me rreze të gjatë veprimi dhe avionë luftarakë për të sulmuar thellë brenda Ukrainës, duke goditur civilët dhe infrastrukturën si dhe caqet ushtarake./REL