Deklaratat kërcënuese të Vuçiç, Kosova: Të dënohen ashpër nga SHBA dhe BE, Serbia do të dështojë sërish (REAGIMET)

KOSOVË- Në lidhje me deklaratat kërcënuese të presidentit serb, Aleksandar Vuçiç i cili u shpreh se nuk e përjashton mundësinë që Serbia të përdorë forcën në Kosovë ka ardhur edhe reagimi nga Qeveria e Kosovës. Në reagim Qeveria e Kosovës shkruan se retorika e Vuçiç është jo vetëm e papërshtatshme, por edhe një reflektim i qartë i qëndrimit të Serbisë ndaj procesit të paqes dhe marrëdhënieve me Kosovën.

“Në një rast të mëparshëm ka pasur si referencë konfliktin në Nagorno Karabakh ndërmjet Armenisë dhe Azerbajxhanit duke marrë si shembull veprimet e këtij të fundit. Kësaj radhe, ky kërcënim erdhi mu në përvjetorin e dakordimit në Ohër mbi Aneksin e Zbatimit të Marrëveshjes Bazike”, thuhet në reagim.

Më tej në reagim thuhet se Serbia vazhdon të deklarojë publikisht mosnjohjen e integritetit territorial dhe sovranitetit të Kosovës. Qeveria gjithashtu ka bërë thirrje që kërcënimet të mos konsiderohen si diçka e rëndomtë ose të lejohen të bëhen pjesë e retorikës së përditshme duke shtuar se kërkojnë një reagim dhe dënim të ashpër nga Shtetet e Bashkuara, Bashkimin Evropian, Mbretërinë e Bashkuar dhe ndërkombëtarë të tjerë.

“Si një peng i së kaluar që është e i dëshpëruar që nuk mund ta kthejë kohë mbrapa, Vuçiç shpreson rrezikshëm që metodat e së kaluarës një ditë mund të jenë zgjidhja në të ardhmen”, thuhet në reagim.

Michael Roth

KOSOVA- Kryetari i Komitetit për Punë të Jashtme në Bundestagun gjerman, Michael Roth ka reaguar në lidhje me deklaratën e presidentit serb, Aleksandar Vuçiç i cili u shpreh se Bashkimi Evropian duhet të zgjedh mes Kosovës dhe Serbisë. Deputeti gjerman përmes një postimi në platformën"X" u shpreh një gjë të tillë “ose Kosova ose Serbia” nuk ekziston.

“Presidenti Vuçiç keqkuptoi diçka. Perspektiva e anëtarësimit në BE nuk vlen vetëm për Serbinë, por për të gjitha shtetet e Ballkanit Perëndimor, përfshirë Kosovën. Nuk ka gjë të tillë si “ose Kosova ose Bashkimi Evropian”. Por, Vuçiç ka të drejtë, me të në krye nuk ka asnjë mënyrë që Serbia të hyjë në BE”, shkruan Roth.

Reagimi i Roth ka ardhur pasi Vuçiç tha se nëse ata zgjedhin Kosovën Serbia do të presë momentin më të mirë të mundshëm dhe ne do ta shfrytëzojmë mundësinë.

Osmani dhe Vuçiç

KOSOVË- Presidentja e Kosovë, Vjosa Osmani në një intervistë të zhvilluar së fundmi është përgjigjur rreth deklaratave kërcënuese të presidentit të Serbisë, Aleksandar Vuçiç i cili u shpreh se nuk e përjashton mundësinë që Serbia të përdorë forcën në Kosovë, për shkak të sjelljes së autoriteteve të Prishtinës dhe komunitetit ndërkombëtar. Osmani u shpreh se deklarata e Vuçiç është vetëm vazhdimësi e deklaratave të shumta publike që presidenti serb ka bërë në të ardhmen duke kërcënuar se do ta sulmojë Kosovën.

Gjatë fjalës së tij presidentja u shpreh se Vuçiçi do të dështojë, ashtu si të gjitha përpjekjet e dështuara të Serbisë deri tani.

“Njësoj si edhe në të kaluarën ai duhet ta dijë se do të dalë i dështuar, sepse të gjitha përpjekjet  e Serbisë nga viti 1998-99 e tutje që ta pushtojnë Kosovën dhe ta kenë territorin e Kosovës kanë dështuar. E para, për shkak të sakrificës së popullit të Kosovës dhe luftës sonë çlirimtare dhe e dyta, se në krah kemi pasur gjithmonë miq, popuj liridashës të cilët bashkë me ne kanë mbrojtur vlerat më të rëndësishme të lirisë dhe demokracisë”, ka thënë Osmani.

Gjatë intervistës për Telegraf, Osmani gjithashtu tha se Kosova është me fat dhe e bekuar që ka në krahë aleatët e saj.

“Edhe sot 25 vite pas kur në qershor do të festojmë këtë përvjetor jubilar të çlirimit të Kosovës jemi me fat e të bekuar si popull që në krahë kemi aleatët tanë të cilët bashkë me ne siç edhe kanë deklaruar së fundmi do ta mbrojnë çdo pëllëmbë të Kosovës. Kështu që Vuçiçi sërish do të dështojë, mirëpo përmes këtyre deklaratave ai po shpërfaq një fakt shumë të rëndësishëm, e kjo është që ai është vazhdimësi e mendësisë së Millosheviçit i cili kërkon territore dhe asnjëherë nuk i intereson për të drejtat dhe liritë e njerëzve”, u shpreh Osmani.

Aleksandër Vuçiç

SERBIA- Presidenti serb, Aleksandër Vuçiç ka bërë së fundi një paralajmërim ndaj Perëndimit, që sipas tij të zgjedhin mes Kosovës dhe Serbisë. Vuçiç la të kuptohej dje në një dalje të tij publike se nëse Perëndimi zgjedh Kosovën, do ta shfrytëzojnë rastin, sipas tij, siç bënë 25 vite më parë.

Kjo deklaratë e Vuçiç sipas përdoruesve të platformës 'X', konsiderohet kërcënim direkt luftarak për Kosovën.

”Nuk është problem i doni ata e nuk na doni neve, nëse i doni ata, nuk do të na keni neve. I doni ata dhe doni t’u ndihmoni atyre, do të mbijetojmë! Por jemi mjaftueshëm të edukuar dhe mjaftueshëm të mençur e trima dhe mjaftueshëm kemi marrë mësime dhe kemi fituar përvoja pas gjithë asaj që na keni bërë 25 vitet e kaluara që ta presim momentin më të mirë të mundshëm dhe ta shfrytëzojmë mundësinë, rastin tonë”, mësohet të ketë thë Vuçiç.