Gjyqi në Hagë/ Prokuroria le në paraburgim dy ish-krerët e UÇK-së, Selimi kërkon shkarkimin e avokatit, dëshmitari i pestë fillon dëshminë

Pjetër Shala

HAGË- Në gjykatën e Hagës ka filluar dëgjimi i dëshmitarit të pestë i prokurorisë në gjykimin kundër Pjetër Shalës. Dëshmitari, ish-ushtar i UÇK-së përmes video-lidhjes ka folur për rolin e tij gjatë kohës që ka qenë ushtar në Ushtrinë Çlirimtare të Kosovës.

Gjatë pyetjeve të Zyrës së Prokurorit të Specializuar, dëshmitari ka thënë se ka qenë ushtar i thjeshtë dhe ka bërë roje në shtabin e logjistikës në Kukës. Pjetër Shala po e ndjek këtë seancë nga qendra e paraburgimit, përmes video-lidhjes, shkruan Kosovapress.

Gjatë dëshmisë së tij në gjykimin kundër Pjetër Shalës, është paraqitur një skicë e shtabit të logjistikës, e cila nuk është shfaqur për publikun. ZPS ka kërkuar tre orë kohë për të intervistuar këtë dëshmitar. Në skicën e shfaqur lidhur me dhomat e fjetjes, dëshmitari tregoi se ushtarët flinin në katin e dytë, të gjithë në një dhomë, rreth 25-30 persona, kurse në katin e parë oficerët të cilët sipas tij, kishin dhoma të ndara të vogla.

Ai përmes fotografisë identifikoi edhe dritaret e zyrës së Sali Saramantit si dhe më pas magazinën apo depon (me numrin 2) si dhe ndërtesën ku sipas dëshmitarit mbaheshin njerëzit për 2-3 orë për tu marr në pyetje (me numrin 1). Për këtë, dëshmitari tha se ishin persona që dyshoheshin se i ka dërguar Serbia për informacione, të cilët tha se UÇK i merrnin në pyetje dhe i lëshonin.

Sipas prokurorisë “Krimet për të cilat akuzohet z.Shala u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”. Pjetër Shala u arrestua më 16 mars 2021 nga autoritetet belge dhe u transferua në Hagë më 15 prill të atij viti, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës. Shala po qëndron në qendrën e paraburgimit në Hagë prej marsit të vitit 2021.

Rexhep Selimi

HAGË- Në Hagë po mbahet gjykimi ndaj ish-krerëve të UÇK-së, por në kohën e zhvillimit të seancave Rexhep Selimi ka kërkuar që avokati i tij David Young të mos e përfaqësoj më atë. Selimi ka kërkuar të ndërpresë kontratën më të dhe njoftoi që Young të zëvendësohet nga avokati Geoffrey Roberts.

Në vendimin e dhënë nga gjykata speciale në Hagë thuhet se njëkohësisht edhe Young ka paraqitur një kërkesë për t’u tërhequr si avokat i emëruar për Rexhep Selimin.

“Në bazë të rregullit 26(1) të Rregullave1 dhe nenit 16(1) të Direktivës për avokatin, sekretari kërkon miratimin e Trupit Gjykues për ndërprerjen e parakohshme të shërbimeve të z. David Young (‘MrYoung’) si avokat i z. Rexhep Selimi. (‘Zoti Selimi’). Më 25 prill 2023, Zyra e Mbrojtjes mori një letër nga z. Selimi ku kërkonte që z. Young të tërhiqej si avokat i emëruar nga ai, dhe që është caktuar si avokat zëvendësues Geoffrey Roberts. Selimi përfshiu një përshkrim të shkurtër të motivimit të kërkesës së tij. Zyra e Mbrojtjes gjithashtu mori nga z. Selimi një formular të nënshkruar dhe datë kërkese për takim, si dhe një autorizim për z. Roberts. Në të njëjtën ditë, z. Young paraqiti një kërkesë përkatëse për t’u tërhequr si avokat i emëruar për z. Selimi bazuar në arsye të mira, dhe duke përshkruar arsyet për këtë”, -thuhet në vendimin e Speciales.

Gjyqi ndaj ish-krerë të UÇK-së, nisi më 3 prill pas më shumë se 2 vjet nga konfirmimi i aktakuzës. Për tre ditë palët mbajtën deklaratat e tyre hyrëse për rastin e Hashim Thaçit, Kadri Veselit, Jakup Krasniqit dhe Rexhep Selimit. Sipas aktakuzës, krimet e paraqitura në të u kryen më së paku prej marsit 1998 deri në shtator 1999 në disa vendndodhje në Kosovë, si edhe në Kukës dhe Cahan, në Shqipërinë Veriore.

Pretendohet se këto krime u kryen nga anëtarë të UÇK-së kundër qindra civilëve dhe personave që nuk merrnin pjesë në luftime. Në aktakuzë pretendohet se Thaçi, Veseli, Selimi dhe Krasniqi kanë përgjegjësi penale individuale për krime që u kryen në kontekstin e një konflikti të armatosur jo ndërkombëtar në Kosovë dhe ishin pjesë e një sulmi gjerësisht të përhapur dhe sistematik kundër personave që dyshoheshin se ishin kundër UÇK-së.

Rron Gjinovci, Jakup Krasniqi dhe Rexhep Selimi

HAGË- Deklaratat e analistit Rron Gjinovci të bëra në emisionin Konfront në televizionin KTV po përdoren nga Zyra e Prokurorit të Specializuar në Hagë si një nga argumentet pse duhet t’u vazhdohet paraburgimi Jakup Krasniqit e Rexhep Selimit, të cilët 

“Teksa po flas për UÇK-në po marr mesazhe kërcënuese, fyese në llogaritë e mia në rrjetet sociale. Nuk është se jam frikësuar ndonjëherë, por kjo tregon se ka një terror mbi popullin e Kosovës për këtë çështje”,-tha Gjinovci në emision.

Deklaratat e tij janë cituar dhe përkthyer në 14 faqe nga prokuroria e cila thotë duke iu referuar Gjinovcit: “i ftuari vazhdoi të tregojë reagimet ndaj një videoje që ai kishte postuar së fundmi në internet, e cila kishte marrë mbi 1400 komente, shumica e të cilave ishin negative, dhe shumë prej të cilave e etiketonin atë me termat e mësipërm, disa shkuan deri aty sa e kërcënonin fizikisht”.

Këto deklarata janë përdorur nga organi i akuzës si argumenta për vazhdimin e lënies në paraburgim të Jakup Krasniqit e Rexhep Selimit. 

Gjyqi ndaj ish-krerë të UÇK-së, nisi më 3 prill pas më shumë se 2 vjet nga konfirmimi i aktakuzës. Për tre ditë palët mbajtën deklaratat e tyre hyrëse për rastin e Hashim Thaçit, Kadri Veselit, Jakup Krasniqit dhe Rexhep Selimit. Më pas kanë vazhduar seanacat për dëgjimin e dëshmitarëve, të cilat janë zhvilluar me dyer të mbylluar. Ndaj ish-presidentit të Kosovës, Hashim Thaçi, ish-kreut të Partisë Demokratike të Kosovës, Kadri Veseli, ish-anëtarit të Shtabit të Përgjithshëm të UÇK-së, Rexhep Selimi dhe ish-zëdhënësit të UÇK-së, Jakup Krasniqit rëndojnë akuzat për krime lufte dhe krime kundër njerëzimit.