Nderimet për presidentin Nishani, Meta e Berisha i japin lamtumirën. Nesër ditë zie kombëtare

TIRANË- Qeveria ka shpallur ditë zie Kombëtare në nderim të presidentit të ndjerë Bujar Nishani datën 2 qershor. Këshilli i Ministrave vendosi që dita e nesërme të jetë ditë zie për shkak të humbjes së ish-presidentit. Në të gjitha institucionet shtetërore dhe publike të ulet flamuri kombëtar në gjysmështizë. Ceremonia e homazheve të organizohet ditën e enjte, nga ora 10:00 deri në orën 12:00, në mjediset e institucionit të Presidencës. Po ashtu, shpenzimet e varrimit dhe të ceremonialit të përballohen nga buxheti i miratuar për Kryeministrinë për vitin 2022.

VENDIMI:

'SHPALLJEN DITË ZIE KOMBËTARE NË NDERIM TË TË NDJERIT, Z. BUJAR NISHANI, ISH-PRESIDENT, ISH-MINISTËR DHE ISH-DEPUTET Në mbështetje të nenit 100 të Kushtetutës, të pikës 4, të nenit 4, të ligjit nr.8926, datë 22.7.2002, “Për formën dhe përmasat e flamurit kombëtar, përmbajtjen e himnit kombëtar, formën dhe përmasat e stemës së Republikës të Shqipërisë dhe mënyrën e përdorimit të tyre”, dhe në vijim të pikës 12, të kapitullit VI, të ceremonialit shtetëror të Republikës së Shqipërisë, miratuar me vendimin nr.420, datë 8.6.2016, të Këshillit të Ministrave, të ndryshuar, me propozimin e Zëvendëskryeministrit, Këshilli i Ministrave

V E N D O S I:

1. Shpalljen ditë zie kombëtare, ditën e enjte, datë 2.6.2022, në nderim të të ndjerit, z. Bujar Nishani, ish-President i Republikës së Shqipërisë, ish-ministër dhe ish-deputet.2. Në të gjitha institucionet shtetërore dhe publike të ulet flamuri kombëtar në gjysmështizë.3. Ceremonia e homazheve të organizohet ditën e enjte, datë 2.6.2022, nga ora 10:00 deri në orën 12:00, në mjediset e institucionit të Presidencës.4. Shpenzimet e varrimit dhe të ceremonialit të përballohen nga buxheti i miratuar për Kryeministrinë për vitin 2022.Ky vendim hyn në fuqi menjëherë.'

Nishani u nda nga jeta të shtunën, në një spital në Gjermani ku po trajtohej për pasojat post-Covid në mushkëri.

(A.B)/Dosja.al

TIRANË- Presidenti Ilir Meta ka ndarë pamjet nga brenda homazheve për ish-presidentin Bujar Nishanin. Në foto shihet familja e Nishanit, bashkëshortja Odeta, bashkë me dy fëmijët e tyre, Fiona dhe Ersi, presin ngushëllime të pikëlluar për ndarjen nga jeta të të dashurit të tyre.

Presidenti Meta i ka kushtuar një status këtij momenti, ndërsa thekson se u përkul me nderim të thellë para ish-presidentit.

“U përula sot me respekt dhe nderimin më të thellë para ish-Presidentit, Bujar Nishani. U shpreha ngushëllimet më të ndjera bashkëshortes Odeta, fëmijëve Ersit dhe Fionës, si dhe të gjithë familjarëve të tyre, për këtë ndarje të dhembshme dhe shumë të parakohshme nga jeta të ish-Presidentit Nishani. Ai, nuk ishte vetëm një bashkëshort dhe prind shembullor, por një nga politikanët dhe mbi të gjitha shtetarët më të përgjegjshëm dhe serioz të këtyre dekadave, në çdo detyrë, politike dhe shtetërore, ku shkëlqeu me korrektësinë, integritetin, principalitetin dhe konstruktivitetin që e karakterizonte, në mënyrë të veçantë si President i Republikës, ku spikati si një mbrojtës i shkëlqyer i Kushtetutës, i interesit publik dhe kombëtar, i demokracisë, parimeve dhe vlerave më të rëndësishme të saj.Ish-Presidenti Nishani, simbol i virtyteve më të mira dhe njerëzore, la pas një trashëgimi shumë pozitive dhe një kujtim të paharruar për të gjithë ata, të cilëve ju shërbeu me përkushtim dhe besnikëri.I paharruar kujtimi i Tij!”, shkruan Meta.

(a.b)/dosja.al

Sali Berisha

TIRANË- Kryetari i Partisë Demokratike, Sali Berisha kreu homazhet në ambientet e Presidencës për ndarjen nga jeta të ish-presidentit Bujar Nishanit. Për mediat, Berisha deklaroi se Nishani ishte një nga bashkëpuntorët e tij më të mirë e se miqësia mes tyre ishte gjithnjë e në rritje. Kreu i PD-së shtoi se edhe pse ka ndërruar jetë, Nishani është gjallë shpirtërisht dhe do të jetë gjallë në memorien e tij.

'Isha për të shpreh nderimin tim më të madh, shpreh dhimjen për të ndarë me familjen zinë e kësaj gjësë që i ka rënë atyre, miqve dhe të afërmëve dhe të shqiptrarëve të cilët kanë parë te Nishani një qytetar shembullor. Familja, një prind të shkëlqyer, një bashkëshort dhe baba fisnik. Shoqëria shqiptare dhe shqiptarët, Bujar Nishani, në dekada ka qënë një nga bashkëpunëtorët e mi më të cmuar, me të cilin më lidhi bashkëpunimi i ngushtë dhe miqësi e përsosur, miqësi e cila nuk njohu asnjëherë asnjëlloj rrënje, përkundrazi, erdhi në forcim. Kujtimet për Nishanin janë të shumta dhe ai sot fizikisht nuk është sot midis nesh. Ai është gjallë shpirtërisht, është përjetësisht gjallë në memorien time dhe të atyre që e njohin atë si miq dhe si bashkëpuntor të familjes që pati një prind të tillë. Ndaj dhe duke ndarë dhimbjen dhe zinë në familjen Nishani, shpreh ngushëllimet e mia atyre dhe shqiptarëve. I paharruar dhe i përjetshëm do mbetet kujtimi i tij.'- tha Berisha.

(a.b)/dosja.al

TIRANË-Trupi i pajetë i ish-presidentit Bujar Nishani ka mbërritur në Presidencë këtë mëngjes. Arkëmorti i tij do të vendoset në sallën “Skënderbeu” në Presidencë, ku familjarët do të presin vizita dhe homazhe nga të afërm, miq dhe dashamirës. Homazhet për ish-presidentin e vendit do të zgjasin 2 ditë. Ditën e nesërme ai do të prehet për në banesën e fundit. 

Sot paradite në orën 10:00-14.00 dhe pasdite 16.30-22.00, familja do të presë vizitat e rastit dhe homazhe nga të afërm, miq dhe dashamirës. Ndërsa nesër nga ora 10:00 – 12:00 do të përcillet për në banesën e fundit në varrezat e Sharrës.

(a.b)/dosja.al