Klodian Braho u zgjodh kreu i ri i SPAK/ Rama: Mbështetja jonë vijon e palëkundur. Ambasada e SHBA: Presim vazhdimin e partneritetit me kreun e ri

Klodjan Braho

TIRANË- Ambasadori i Gjermanisë, Karl Bergner ka uruar drejtuesin e ri të Prokurorisë së Posaçme, Klodian Braho. Ambasadori thekson se Lufta e vendosur kundër korrupsionit dhe krimit të organizuar ka një rëndësi të jashtëzakonshme nga këndvështrimi i Gjermanisë për procesin e anëtarësimit të Shqipërisë në BE. Bergner duke i uruar sukses në detyrë Brahos dhe prokurorëve të SPAK, shton se ndjehet mirënjohës edhe ndaj KLP-së për procesin transparent në zgjedhjen e kreut të ri.

Reagimi i ambasadori gjerman:

Urime drejtuesit të ri të zgjedhur sot të Prokurorisë së Posaçme SPAK, Klodjan Braho. Lufta e vendosur kundër korrupsionit dhe krimit të organizuar ka një rëndësi të jashtëzakonshme nga këndvështrimi i Gjermanisë për procesin e anëtarësimit të Shqipërisë në BE, të cilin ne e mbështesim. Për punën e rëndësishme të SPAK-ut mbeten thelbësore integriteti, pavarësia dhe respektimi i standardeve më të larta të shtetit të së drejtës.

I uroj shumë sukses Klodjan Brahos dhe të gjithë punonjëseve e punonjësve të SPAK-ut në detyrën e tyre ambicioze, si dhe një bashkëpunim të frytshëm me institucionet shqiptare dhe ato ndërkombëtare. Mirënjohja ime sot shkon edhe për Këshillin e Lartë të Prokurorisë për procesin transparent të zgjedhjes dhe për të gjitha institucionet e drejtësisë në Shqipëri, të cilat çdo ditë kontribuojnë për shtetin e së drejtës./Dosja.al

Foto Ilustruese

TIRANË- Ambasada e SHBA ka reaguar pas zgjedhjes së Klodian Brahos në krye të SPAK. Përmes një postimi në rrjetet sociale, Ambasada i ka uruar Kryeprokurorin e ri të Posaçëm, Klodian Braho, rolin e tij të ri në krye të SPAK.  Ambasada ka përgëzuar punën e Altin Dumanin, për shërbimin e tij të pashembullt si Kryeprokuror i SPAK.

Ata shkruajnë se integriteti dhe guximi i tij në mbajtjen e kriminelëve përgjegjës, ka forcuar bashkëpunimin mes Shteteve të Bashkuara dhe Shqipërisë. Kjo duke i bërë ata, më të sigurt nga kërcënimi i krimit ndërkombëtar dhe trafikut të drogës. 

"Shtetet e Bashkuara përgëzojnë Altin Dumanin për shërbimin e tij të pashembullt si Kryeprokuror i SPAK. Integriteti dhe guximi i tij në mbajtjen e kriminelëve përgjegjës kanë forcuar bashkëpunimin mes Shteteve të Bashkuara dhe Shqipërisë, duke na bërë më të sigurt nga kërcënimi i krimit ndërkombëtar dhe trafikut të drogës. Ne presim me kënaqësi të vazhdojmë partneritetin tonë të fortë me Kryeprokurorin e ri të Posaçëm, Klodian Braho, në rolin e tij të ri në krye të SPAK." shkruan ambasada./Dosja.al

Edi Rama

TIRANË- Kreyministri Edi Rama ka reaguar, pasi Klodian Braho u zgjodh kreu i ri i SPAK. Me anë të një postimi në rrjetin social "X", Rama i uron Brahos punë të mbarë në marrjen e detyrës si kreu i Prokurorisë së Posaçme dhe thekson se SPAK do të ketë mbështetjen e palëkundur për të përmbushur në pavarësi e kushte optimale misionin e vet.

REAGIMI i EDI RAMËS:

Punë të mbarë drejtuesit të ri të SPAK-ut, i cili u zgjodh sot mes katër kandidatësh për të çuar më tej punët e mandatit të tretë të institucionit, duke marrë stafetën nga drejtuesi aktual, që meriton përgëzime për arritjet e pamohueshme të SPAK-ut në tre vitet e drejtimit të tij. SPAK ka pasur, ka dhe do të ketë mbështetjen e palëkundur të shumicës sonë qeverisëse, për të përmbushur në pavarësi e kushte optimale misionin e vet./Dosja.al