Mandati i Xhaçkës, mblidhet Këshilli i Legjislacionit, eksperti kërkon 3 javë kohë për të përgatitur raportin, Korreshi: Po na bëni për budallenj

Olta Xhaçka

TIRANË- Këshilli i Legjislacionit vendosi të premten që t’i jepte 3 javë kohë një eksperti të kërkuar nga mazhoranca që të analizojë vendimet e Gjykatës Kushtetuese, pasi kjo gjykatë shfuqizoi si antikushtetuese dy vendime të Kuvendit për të bllokuar dërgimin në këtë gjykatë të mocionit për papajtueshmëri të mandatit për ministren e Punëve të Jashtme, Olta Xhaçka.

Eksperti i thirrur nga Kuvendi, Krenar Loloçi, një profesor i së drejtës kushtetuese, pranoi detyrën nga Kuvendi dhe kërkoi 3 javë kohë për të përgatitur një raport mbi dy vendimet e Kushtetueses të marra në janar. Por angazhimi i tij u kundërshtua nga deputetët e opozitës, që e cilësuan vendimin e shumicës parlamentare një tallje me ekspertin dhe me Gjykatën Kushtetuese dhe një synim për të mbrojtur kolegen e tyre nga heqja e mandatit të deputetit.

Kjo është një tjetër zvarritje e procesit për të zbatuar vendimet e Gjykatës Kushtetuese, pas një mbledhjeje në mars ku PS ngriti pikëpyetje për vendimet dhe në një mbledhje tjetër në fillim të prillit kërkoi ndihmën e ekspertëve.  Por Felaj, u justifikua me faktin se Kuvendi nuk ishte mbledhur gjatë muajit të fushatës zgjedhore.

Deputeti Gazmend Bardhi tha se zvarritja ishte e qëllimshme dhe akuzoi për këtë drejtuesen e këshillit, Ermonela Felaj për mosthirrjen e mbledhjes për 2 muaj.

“Eksperti është i juaji, ne s’kemi nevojë për të lexuar vendimet,” iu drejtua ai kolegëve të mazhorancës, duke shtuar se, se kjo rrugë e zgjedhur prej tyre ishte një sfidë ndaj Gjykatës Kushtetuese.

Një precedent të rrezikshëm e quajti këtë praktikë të re të Kuvendit edhe Enkelejd Alibeaj, i cili tha se “nuk mund të bëhet interpretim i vendimeve të GJK-së”.

Eksperti Loloçi tha se nuk kishte asnjë konflikt interesi me palët e përfshira në procesin në Gjykatën Kushtetuese dhe se do të bënte detyrën e tij e do të kthente përgjigjet sipas opinionit të tij për pyetjet që do t’i drejtonin deputetët.

Relatorja e çështjes nga PS, Klotilda Bushka, shtroi një dyzinë pyetjesh të cilat lidheshin kryesisht me detyrat që i lindnin Kuvendit  nga leximi i dy vendimeve të Gjykatës Kushtetuese  dhe nëse ishte e arsyeshme që për zbatimin e tyre, do të nevojiteshin amendime ligjore apo në rregulloren e Kuvendit.

“Ju garantoj që askush nuk do ta përdorë ekspertizën tuaj për arsye politike,” iu drejtua ajo Loloçit.

Ndërsa Bardhi e pyeti ekspertin nëse kishte pasur raste më parë kur Kuvendi kishte vënë në diskutim zbatimin e vendimeve të Kushtetueses.

Të ndarë në dy grupime, deputetët e opozitës bënë dy kërkesa të ndryshme për heqjen e mandatit të Xhaçkës, pasi bashkëshorti i saj, ish-deputeti socialist Artan Gaçi, u shpall investitor strategjik dhe me vendim qeverie iu dha e drejta e përdorimit të brigjeve në Dhërmi. Pasi mazhoranca votoi kundër dërgimit të papajtueshmërinë së mandatit në Kushtetuese, të dyja grupimet iu drejtuan me kërkesa të veçanta kësaj gjykate.

Gjykata vendosi të pranojë kërkesën e 1/10 së deputetëve dhe riktheu çështjen në Kuvend duke i cilësuar antikushtetuese vendimet e mazhorancës. Në vendimin tjetër GJK pushoi kërkesën e 1/5 së deputetëve që kërkonin trajtimin në themel të çështjes dhe marrjen e një vendimi për papajtueshmërinë e mandatit, duke mos e legjitimuar si subjekt që vë në lëvizje gjykatën për këtë çështje.

Marrë nga Reporter.al

Saimir Korreshi

TIRANË- Deputeti demokrat Saimir Korreshi ka ironizuar në mbledhjen e Këshillit të Legjislacionit, ku është diskutuar mandati i Olta Xhaçës. Duke folur në mbedhjen e Këshillit, Korreshi ka theksuar se sipas mazhorancës duhen 10 juristë për të lexuar një vendim gjykate.     

“Ne propozojmë, miratojmë ligje për 3 mln e kusur shqiptar dhe çuditërisht del e nevojshme për profesionist për të lexuar një vendim gjykatë. Pjesa më e madhe avokatë të mirë. Kam një kërkesë, propozoj një ekspert tjetër, neuro-psikiatër. Ore ne jemi apo bëjmë si budallenj? Nëse jemi për budallenj të ndryshojmë. 10 juristë të mos dinë të lexojnë një vendim gjykatë. Me duket e çuditshme, ore të ndryshojmë profesionin. Të na japë një raport mjeko ligjor që jemi të aftë për të ushtruar profesionin”, tha Korreshi.

Enkelejd Alibeaj

TIRANË- Këshilli i Legjislacionit është mbledhur ditën e sotme dhe është diskutuar mandati i Ministres së Jashtme Olta Xhaçka. Në mbledhje, deputeti demokrat Enkelejd Alibeaj u shpreh se Xhaçka sipas tij duket qartë që është marrë në mbrojtje nga mazhoranca, por shtoi se ekspertiza profesionale mund të keqpërdoret politikisht. Ndërkohë që deputatja socialiste Klotilda Bushka ka deklaruar se ata kanë vullnetin maksimal për të zbatuar vendimet e Gjykatës Kushtetuese, ndërkohë që ka theksuar se është ofenduese që thuhet se do të keqpërdoret eksperti.

Alibeaj: Kuptova që eksperti ka pranuar thirrjen nga departamenti juridik. Kam përshtypjet që askush nuk  e krijon dot idenë  e plotë të detyrës që do të marrë përsipër, Që të vendoset në kushte optimalë për të marrë vendime apo jo, i duhet t’i bëhen me dije edhe disa karakteristika të tjera të procesit. Pra brenda një organi politik, të jetë zemra e ekspertizës, por që nuk i shpëton dot lojës meskinë të politikës dhe këto duhet t’i bëhen me dije ekspertit. Ekspertiza e dhënë profesionale mund të keqpërdoret politikisht dhe ky është një rrezik. Me shumë gjasë herët apo vonë nuk besoj që do të ndodhë që kjo çështje të mos shkojë në GJK. Mazhorancë duket qartë që e ka marrë në mbrojtje përfaqësuesin e vet në qeveri dhe do të përdorë atje leximin që eksperti i ka bërë çështjes dhe do të jetë ky argumenti kryesor që do të përdoret. Këto janë çështje që ju duhet të ja kishit bërë me dije ekspertit. Më vonë do të komplikohet, këto kisha për të thënë drejtuar Këshillit.

Bushka: Është vullneti ynë maksimal për të zbatuar vendimet e Gjykatës Kushtetuese. Është ofenduese të thuhet që do të keqpërdoret eksperti. Kemi disa dilema që nuk lidhen me rastin konkret, por me balancat në demokraci. Askush nuk do ta përdorë as emrin dhe as ekspertizën tuaj, për lojëra politike.

Gazment Bardhi

TIRANË- Mandati i Olta Xhaçkës ka krijuar debate në mbledhjen e Këshillit të Legjislacionit. Deputeti demokrat Gazment Bardhi ka deklaruar se mazhoranca po kërkon që të zvarris zbatimin e vendimit të Gjykatës Kushtetutës. Bardhi tha se kjo është një tallje që po i bëhet Kushtetutës dhe ligjeve të Kuvendit.

“Siç e kemi paralajmëruar është thjesht strategji për të zvarritur zbatuar vendimin e Gjykatës Kushtetuese, strategji për të marrë në mbrojtje ministren Olta Xhaçkën. Thatë se do e zgjidhnit vetë ekspertin, duhet të bëni publik emrin e tij. Na japin leksione për reformën në drejtësi dhe në një sprovë për të zbatuar vendimin e gjykatës, ju po e zvarrisni. Kanë marrë dhe dy muaj kohë pushim, sot kanë ndryshuar atë çfarë kanë thënë herën e kaluar. Do marrin  dhe 3 muaj kohë se do thonë eksperti ka shumë punë. Tallje e marre me gjykatën dhe kushtetutën, zvarritje e procesit. Nëse keni vendosur ta sfidoni gjykatën duhet ta bëni vetëm. Nuk ka çfarë të përmirësojë kuvendi në ligjet e reformës në drejtësi kur ju talleni me vendimin e gjykatës kushtetuese. Nuk jemi ne që vendosim nëse Xhaçka ka shkelur kushtetutën, por Gjykata kushtetuese. Keni një vit që po e zvarritni çështjen. Është absurd kjo që po bëni, zbatoni vendimin e gjykatës kushtetuese. Nëse doni të bëni tallje, profesionisti që merr detyrën për të dhënë opinion është të bëhesh pjesë e talljes. Ju vazhdoni talluni me reformën në drejtësi, liruat Tahirin dhe po mbroni Xhaçkën. Po merrni në mbrojtje ministren që ka marrë statusin e investitorit strategjik, çojeni në gjykatë dhe të vendosë gjykata. Qytetarët nuk kanë bukë të hanë. ministrja ka 5 mln euro për të bërë hotel në bregdet. Zonja ministre ka vendosur të shkelë ligjin dhe do të duhet të shkojë dhe të përballet në Gjykatë Kushtetuese. Çojeni të GJK dhe të vendosë Gjykata Kushtuese. Vendimi i gjykatës Kushtetuese na ka dhënë të drejtë ne, ju shkelët Kushtetutën, tani duhet të zbatoni vendimin e gjykatës kushtetuese dhe t’ia kaloni çështjen asaj gjykate për shqyrtim”, tha Bardhi.