Takimi Shqipëri-Itali/ Për herë të parë mbledhje mes dy qeverive, firmosen 16 marrëveshje

pamje nga vendngjarja

ITALI- Në mbledhjen e dy qeverive Shqipëri-Itali u firmosen 16 marrëveshje dhe memorandume. Marrëveshjet e nënshkruara nga ministrat e dy kabineteve lidhen me Bashkëpunimi strategjik Itali Shqipëri në fushat e shëndetësisë, energjisë, mjedisit, sigurisë, arsimit dhe inovacionit.

Marrëveshjet e nënshkruara mes Italisë dhe Shqipërisë:

1. Memorandum mirëkuptimi për bashkëpunimin mbi sigurinë kibernetike

2. Marrëveshje ndërqeveritare në lidhje me koncesionin e një huaje ndihme për mbështetjen e krijimit të një sistemi të mbrojtjes civile shqiptare

3. Marrëveshje ekzekutive për nismën kundrejt përforcimit të aftësive të mbrojtjes civile në Shqipëri

4. Marrëveshje për realizimin e projektit në mbështetje të neonatologjisë, në mbrojtje të fëmijëve dhe nënave

5. Memorandum mirëkuptimi operativ kundër trafikut të drogës

6. Marrëveshje për bashkëpunimin në sektorin e mbrojtjes

7. Memorandum mirëkuptimi mes fondacionit MAXXI, Muzeu Kombëtar i Arteve i Shekullit të XXI dhe Galeria Kombëtare e Arteve e Republikës së Shqipërisë

8. Protokoll mirëkuptimi për bashkëpunimin në fushën e mbrojtjes civile

9. Marrëveshje teknike për dorëzimin e dy motovedetave të Guardia Costiera italiane për Forcën Detare Bregdetare Shqiptare

10. Deklaratë mirëkuptimi mes departamentit të Mbrojtjes Civile Italiane dhe Agjencisë Kombëtare të Mbrojtjes Civile shqiptare dhe Agjencisë Italiane për Bashkëpunim dhe Zhvillim, zyra e Tiranës

11. Marrëveshje financiare mes Cassa Depositi e Prestiti SpA dhe Këshillit të Ministrave të Republikës së Shqipërisë, për përmirësimin e rrjetit të transmetimit të energjisë eklektike në Shqipërinë veriore, pas tërmetit të vitit 2019

12. Memorandum mirëkuptimi me Cassa Depositi e Prestiti SpA dhe Ministria e Financave të Republikës së Shqipërisë

13. Memorandum mirëkuptimi me Simest SpA dhe Agjencisë për Zhvillimin e Investimeve Shqiptare, AIDA

14. Memorandum mirëkuptimi mes Fincantieri dhe KAYO, memorandum paraprak përpara krijimit të joint ventures për punimet në kantieret e Pasha Limanit

15. Memorandum mirëkuptimi mes Leonardo SpA dhe KAYO/Dosja.al

ROMË- Marrëveshjet e bashkëpunimit mes Shqipërisë dhe Italisë janë nënshkruar ditën e sotme. Marrëveshjet e bashkëpunimit përfshijnë sektorë si kujdesi shëndetësor, energjia, mjedisi, industria e sigurisë dhe mbrojtjes, menaxhimi i migracionit, arsimi, inovacioni dhe të tjera.

Marrëveshjet e nënshkruara:

-Bashkëpunimi strategjik në fushat e shëndetësisë, energjisë, mjedisit, sigurisë, arsimit dhe inovacionit
-Siguria kibernetike, përmes një memorandumi mirëkuptimi ndërmjet ministrive të jashtme
-Mbrojtja civile, me disa marrëveshje për grante dhe hua të buta, mbështetje në pajisje dhe trajnim, si dhe një deklaratë të përbashkët mbi koordinimin institucional
-Shëndetësia, me projekte për përmirësimin e kujdesit neonatal dhe maternal
-Mbrojtja dhe bashkëpunimi ushtarak, përfshirë transferimin e mjeteve detare dhe marrëveshje mes kompanive “Leonardo”, “Fincantieri” dhe partnerëve shqiptarë
-Lufta kundër trafikut të drogës, që përfshin një Memorandum mirëkuptimi të nënshkruar mes Institucioneve të punëve të brendshme respektive
-Zhvillimi ekonomik, përmes instrumenteve të “Cassa Depositi e Prestiti”, “SIMEST” dhe “AIDA”, në mbështetje të ndërmarrjeve të vogla dhe të mesme shqiptare
-Kultura dhe kreativiteti, me një marrëveshje bashkëpunimi midis Fondacionit MAXXI dhe institucioneve shqiptare të artit

Edi Rama dhe Giorgia Meloni

ITALI- Ceremonia e prtjes së kryeministrit Edi Rama nga homologia Giorgia Meloni është publikuar. Me anë të një postimi në Facebook, Rama ka publikuar pjesë nga momenti i pritjes si dhe nga takimi mes dy kabineteve qeveritare. 

Postimi i Plotë:

Mbledhja e parë e përbashkët mes qeverive Shqipëri–Itali. Romë – Ceremonia zyrtare e pritjes nga Kryeministrja e Republikës Italiane, Giorgia Meloni 

Giorgia Meloni dhe Edi Rama

TIRANË- Kryeministri Edi Rama është takuar sot me homologen italiane Giorgia Meloni. Takimi është bërë para disa minutash, kur dhe u mbajt ceremonia pritëse për kryeministrin dhe kabinetin qeveritar shqiptar në Itali. 

Pas ceremonisë nisi mbledhja e parë mes qeverisë Italine dhe asaj shqiptare. Kryeministria Georgia Meloni dhe homologu i saj Edi Rama janë ulur ballë përballë bashkë me ministrat e dy kabineteve në Villa Doria Pamphili./Dosja.al

Edi Rama dhe Giorgia Meloni

ITALI- Media prestigjoze italiane 'Domani' ka bërë një artikull mbi takimin e sotshëm të dy qeverive shqiptare dhe italiane. Në artikullin e shkruar nga gazetari Nello Trocchia, theksohet se ky takim do të mbahet pas dështimit të modelit italian për qendrat e emigrantëve në Gjadër.

Një pjesë e artikullit ndalet te lidhjet e mundshme mes politikës shqiptare dhe krimit të organizuar. Në artikull janë cituar deklarata të prokurorit të Napolit, Nicola Gratteri, i cili e përshkruan mafian shqiptare si një strukturë të fuqishme ndërkombëtare, të ngjashme me ‘Ndranghetën.

Po ashtu në shkrim është përmendur edhe një takim i vitit 2019 midis përfaqësuesve të qeverisë shqiptare dhe një karteli kriminal në Aruba. Domani shkruan se ky takim është konfirmuar nga autoritetet italiane, por kryeministri Rama ka heshtur.

Artikulli i Plotë:

Pas marrëveshjes së nënshkruar midis Italisë dhe Shqipërisë, me një vlerë prej gati një miliard euro, për menaxhimin e emigrantëve, kryeministri shqiptar, Edi Rama, kthehet në Romë për t’u takuar me Giorgia Melonin. Kryeministrja kishte premtuar, me një ton të prerë, se qendrat për emigrantët, të ndërtuara në tokën shqiptare, “do të funksionojnë”, por ai model ka dështuar.

Nuk është vetëm çështja e efektivitetit, për të cilën ‘Domani’ mund të zbulojë anomali të reja midis agjentëve të riatdhesuar dhe strehimeve të papërshtatshme, por edhe një temë në pjesën më të madhe të heshtur, ajo që lidhet me krimin e organizuar në atë vend.

Në heshtje shtrohet një pyetje: kujt i kemi dhënë 100 milionë euro para publike (të destinuara për mbikëqyrjen e jashtme)? Me cilin vend kemi nënshkruar një marrëveshje prej gati një miliard euro (parashikohet një shpenzim minimal prej 650 milionë euro), për pesë vjet?

Kundërshtarët e qeverisë ‘Rama’, vëzhgues ndërkombëtarë, një pjesë e së djathtës italiane, e kanë quajtur në të kaluarën e afërt Shqipërinë një narkoshtet.

A është ky përkufizim një ekzagjerim?

“Jo, përkundrazi. Grupet shqiptare filluan të trafikojnë marijuanë për të kaluar më pas te heroina, falë marrëdhënieve me mafian turke, dhe në fund te kokaina, për të cilën janë bërë ndërmjetës ndërkombëtarë. Të ardhurat nga këto veprimtari u dhanë grupeve shqiptare më shumë fuqi ekonomike dhe politike, të cilat kanë shumë ngjashmëri me ‘Ndranghetën, që nga familjarizmi deri te kodet e rrepta të sjelljes, të bazuara mbi besën, ndjenjën e nderit dhe të fjalës së dhënë, nga aftësia për t’u infiltruar në indin ekonomik-financiar deri te ndikimi në sektorin politik-administrativ”.

Kështu thotë prokurori i përgjithshëm i Napolit, Nicola Gratteri, i intervistuar nga autori i këtij artikulli për të treguar hegjemoninë ndërkombëtare të mafias shqiptare.

Fjalë të thëna nga një magjistrat ekspert, në vijën e parë kundër krimit, që shtojnë pyetjet mbi nevojën për të nënshkruar një protokoll me një vend jashtë BE-së, i cili nuk ka një kuadër ligjor të përshtatshëm për të luftuar krimin e organizuar dhe, aq më tepër, nuk ka një legjislacion të aftë për të goditur akumulimin e paligjshëm të pasurive ekonomike dhe financiare.

Një çështje edhe më e rëndë, nëse merret në konsideratë ajo që ka zbuluar ‘Domani’ lidhur me një takim të konfirmuar nga DIA midis një karteli kriminal dhe përfaqësuesve të papërcaktuar të qeverisë Rama. Ishte viti 2019. Një ngjarje, për të cilën Rama ka zgjedhur heshtjen, e cila shkaktoi një stuhi politike dhe mediatike në Shqipëri, por u errësua në Itali.

Kryeministrja e Italisë shprehet me fjalë të mëdha kundër mafies, pastaj zgjedh bashkëbisedues ndërkombëtarë, politikat e të cilëve në përballjen me pastrimin e parave, korrupsionin dhe infiltrimet gjykohen “jo të përparuara”, thotë përsëri Gratteri.

Në Villa Pamphili do të zhvillohet takimi midis Ramës dhe Melonit; është parashikuar nënshkrimi i një marrëveshjeje strategjike globale që përfshin sektorë si energjia, shëndetësia, mjedisi, mbrojtja, arsimi, inovacioni, migracioni dhe zhvillimi ekonomik.

Fotografi zyrtare, fjalë lavdëruese reciproke edhe për të fshehur fushatën e dështuar të Shqipërisë. Një vit më parë hapeshin qendrat për emigrantët, pothuajse gjithmonë bosh, të dobësuara nga e drejta ndërkombëtare dhe të shndërruara në monumente të mëdha të shpërdorimit. Në fakt, në një rast, makina burokratike shqiptare ka funksionuar shumë mirë. Është rasti i agjentit të riatdhesuar.

Në projektin e dështuar të ngritur nga qeveria italiane në anën tjetër të Adriatikut, ishte parashikuar edhe një burg me 20 vende. Një strukturë që ndodhet brenda kompleksit më të madh, i cili përfshin qendrën e ndalimit të kërkuesve të azilit dhe qendrën për riatdhesime. Destinuar për ata që, midis emigrantëve, do të kishin kryer krime në zonën e konsideruar nën juridiksionin italian. Aktualisht është i ruajtur nga 15 agjentë të policisë së burgjeve, një e treta e kontingjentit fillestar që ishte dislokuar në Shqipëri. Por çfarë faji ka agjenti i riatdhesuar?

Dyshohej se kishte fotografuar qentë endacakë që mblidheshin, të ushqyer nga policët, pranë burgut bosh. Kështu, pas një procedure disiplinore që u mbyll me pushim çështjeje, agjenti u dërgua përsëri në shtëpi. Pra, riatdhesimi funksionon për ata që dyshohet se ndërveprojnë me sindikatat.

Duke iu përgjigjur një kërkese që i kishte mbërritur departamentit të policisë së burgjeve nga sindikata UIL, zbulohet një mungesë strukturore: dhomat e agjentëve duhet të jenë për një person të vetëm, përndryshe nuk janë në përputhje me parashikimet e marrëveshjes kombëtare kuadër. Dhe, çfarë ndodh në të vërtetë?

“Dhomat e dedikuara për personelin, me një sipërfaqe prej 30 metrash katrorë, strehojnë për momentin maksimumi dy persona; çdo dhomë, e pajisur me sistem klimatizimi dhe banjo përkatëse, është e kompletuar me mobiliet e parashikuara në shtojcën A të Marrëveshjes Kuadër; është e arsyeshme të theksohet se nuk është regjistruar asnjë ankesë nga personeli”, shkruan Rita Russo, aktualisht drejtoreshë e personelit, dhe më parë ofruese në Piemonte, ku nënsekretari i Drejtësisë është Andrea Delmastro Delle Vedove.

Pikërisht Russo merrej me atë rajon kur kjo gazetë ngriti çështjen e truprojës së Delmastro-s, në veçanti arsyet e zgjedhjes dhe përzgjedhjes së tij, pavarësisht moshës së avancuar. “Nuk dua absolutisht të flas”, u përgjigj ajo.

Heshtje edhe kur e pyetëm për inspektimin e brendshëm të dështuar. Pas asaj përvoje ajo u transferua në Romë për të drejtuar personelin në departamentin që Delmastro menaxhon çdo emërim. Dhe tani përgjigjet për strehimet e papërshtatshme duke i qetësuar të gjithë: “Askush nuk ankohet”. Sepse nëse ankohen, i riatdhesojnë.

Edi Rama

TIRANË- Kryeministri i vendit, Edi Rama ka deklaruar se dita e sotme është një ditë historike në marrëdhëniet ndërkombëtare të Shqipërisë. Përmes një postimi në rrjetin social Facebook, Rama u shpreh se mbledhja mes dy qeverive, e cila zhvillohet sot në Romë, i hap rrugn 16 marrëveshjeve të reja.

Në fund Kreu i qeverisë, Rama shkruan se këto marrëveshje mundësojnë bashkpunim në kuadër të partneritetit të ngushtë strategjik mes dy vendeve.

“Mirëmëngjes dhe me krenarinë për një tjetër ditë historike në marrëdhëniet ndërkombëtare të Shqipërisë, mbledhjen e parë të përbashkët mes dy qeverive, e cila zhvillohet në Romë për t'i hapur rrugë 16 marrëveshjeve të reja konkrete të bashkëpunimit në kuadër të partneritetit të ngushtë strategjik me fqinjin tonë të çmuar perëndimor, ju uroj një ditë të mbarë”, shkruan Rama./Dosja.al

Foto ilustruse

ITALI- Italia dhe Shqipëria do të zhvillojnë sot një samit të përbashkët në Romë. Pala italiane shpjegon se organizimi i një samiti ndërqeveritar me Tiranën shërben për të mundësuar një bashkëpunim cilësor dypalësh, përmes planifikimit që do të përfshijë një dimension më të gjerë, më të strukturuar dhe strategjik të marrëdhënieve dypalëshe.

Marrëveshja kryesore që pritet të nënshkruhet, është hartuar për të krijuar një kuadër rregullator të qëndrueshëm dhe të strukturuar për zhvillimin e bashkëpunimit. Mbulohen fusha të shumta, nga bashkëpunimi ekonomik dhe infrastrukturor te mbrojtja dhe siguria, nga bashkëpunimi për migracionin te bashkëpunimi për energjinë dhe mjedisin, madje edhe sinergjitë në shëndetësi, inovacion dhe trajnim.

Megjithatë një vëmendje e veçantë do t'i kushtohet rolit që Italia dhe Shqipëria po marrin përsipër në zonë, si një qendër thelbësore për lidhjen e energjisë dhe infrastrukturës për Evropën. Ndër projektet prioritare është Korridori VIII Evropian, i cili synon të lidhë Detin Adriatik me Detin e Zi.

Mediat italiane shkruajnë se marrëveshjet teknike do të përqendrohen në rritjen e bashkëpunimit në fushat e mbrojtjes, energjisë dhe shëndetësisë. Ato do të trajtojnë gjithashtu ndërtimin e kapaciteteve në mbrojtjen civile, mbështetjen për bizneset e vogla dhe të mesme, luftën kundër trafikut të drogës dhe bashkëpunimin në projektimin dhe trajnimin e muzeve.

Italia është partneri kryesor ekonomik dhe tregtar i Shqipërisë, me një vëllim tregtar prej mbi 3 miliardë eurosh dhe një pjesë tregu prej 20%. Protokolli Itali-Shqipëri është një nga zgjidhjet inovative për çështjet e migracionit, duke tërhequr interes në rritje si nga Komisioni Evropian ashtu edhe nga Shtetet Anëtare./Dosja.al