Moti i keq pushton Kosovën/ Përmbytje në Pejë, Istog dhe Junik, bllokohen disa rrugë në Vushtri

Permbytje

KOSOVË- Që prej mbrëmjes disa qytete në Kosovë janë përfshirë nga reshje të shumta shiu, ku përmbytje ka patur dhe në  komunën e Vushtrrisë.

Në pamjet e publikuara nga Express, shihet swsi në disa lagje të Vushtrisë uji ka arritur nivele tepër të larta duke bllokuar dhe disa rrugë kalimi.

Pothuajse në gjithë territorin e Republikës së Kosovës ka patur përmbytje gjatë ditën së sotme, ndërkohë deri më tani nuk raportohet për të lënduar apo evakuime. 

Permbytje ne Kosove

KOSOVË- Shirat e rrëmbyer dhe erërat e forta që kanë nisur gjatë mbrëmjes së kaluar dhe vijojnë edhe sot kanë shkaktuar dëme të konsiderueshme materiale në Malishevë të Kosovës.

Nga komuna është njoftuar se ekipet përgjegjëse janë në terren që nga nata e mbrëmshme dhe gjatë ditës së sotme, në mbikëqyrje të situatës.

“Përveç dëmeve nga erërat edhe reshjet deri më tani një rrugë paraqet në qarkullim, ndërsa rrugët tjera janë të hapura”, thuhet në njoftim.

Sipas drejtorit të Drejtorisë për Mbrojtje dhe Shpëtim, Shqipron Shala, erërat e fuqishme gjatë natës së mbrëmshme, kanë shkaktuar dëme në disa objekte, kryesisht në kulme, të mbuluara me llamarinë, ndërsa gjendja e rrugëve është e mirë dhe aktualisht vështirësi në qarkullim ka vetëm në rrugën “Hamdi Berisha” në Malishevë.

Sipas Shalës, drejtoria me të gjitha njësitë përgjegjëse është në gatishmëri në rast të nevojës për reagim apo për t’iu dalë në ndihmë kujtdo që ka nevojë.

Permbytje ne Kosovë

KOSOVË- Reshjet e mëdha të shiut kanë pushtuar pothuajse të gjithë Kosovën duke krijuar përmbytje në disa zona të vendit.

Pamje të përmbytjeve janë publikuar nga Istogu e Peja, ndërkohë që raportohet se përmbytje ka edhe në Junik ku në disa zona është ndërprerë dhe uji i pijshëm.

Reshjet e shiut të cilat po vazhdojnë po rrezikojnë daljen nga shtrati të tri kanaleve në qytetin e Pejës me rrethinë. Situata aktualisht është e menaxhueshme dhe ekipet janë në gjendje gatishmërie.

Drejtori për Mbrojte dhe Shpëtim në Komunën e Pejës, Gëzim Gashi ka thënë për KosovaPress se për momentin situata në Pejë është nën kontroll por janë disa vende ku situata është me keq, siç është kanali i Çokolica, ku pretendon të dal nga shtrat por ekipi i zjarrfikësve dhe ekipet tjera të komunës janë në gjendje gatishmërie për çdo situatë të tillë

Sipas tij, edhe në lagjen “Fidanishte”, ka mundësi që ujë të dal prej shtratit, si dhe në fshatin Jabllanicë.

Ndërkohë Drejtori për Emergjenca dhe Shërbime Publike në Junik, Demokrat Ganijaj ka dhënë detaje për gjendjen në Junik ku tregoi se në disa lagje lumi ka dalë nga shtrati.

“Prej mëngjesit jemi në terren me një kompani dhe ekipet emergjente. Kemi reshje të jashtëzakonshme shiu, është rritur shumë shtrati i lumit ‘Erenik’, në disa pjesë në lagjen ‘Berisha’ ka dalë edhe prej shtratit”, tha ai

Kompania Rajonale e Ujësjellësit “Prishtina”, ka njoftuar se për shkak të turbullirës së ujit në kanalin e Ibrit ( NTU është mbi 90) si shkak i reshjeve të dendura atmosferike, e bën të pamundur trajtimin e ujit në Shkabaj, sepse uji është jashtë çdo standardi me të cilin mund të trajtohet në Impiant.

“Si pasojë e kësaj, Fushë Kosova mbetet pa furnizim me ujë duke filluar nga ora 10:00 dhe do zgjasë deri në përmirësimin e situatës me turbullirë e në të njëjtën kohë çrregullime të furnizimit me ujë do të ketë edhe komuna e Drenasit”, thuhet në njoftim.

Kosova sot për përfshirë nga një mot plotësisht i vranët dhe me reshje shiu ku në disa rajone priten reshje të dendura shiu dhe rrebeshe lokale shiu me vetëtima dhe bubullimë.