Shqipëria 'mes flakëve'/ 6 vatra zjarri aktive, shuhen 16, rrezikohen banesat në Shtiqën të Kukësit

Zjarr në Shijak

SHIJAK- Një zjarr ka rrezikuar mbrëmjen e së enjtes fshatin Shahinas të Shijakut. Zjarri që kërcënonte dhe banesat ka vënë në lëvizje dhe banorë të fshatit, të cilët i janë bashkuar zjarrfikësve për të shuar flakët që po u afroheshin banesave. Po ashtu, në ndihmë të tyre ka shkuar edhe një zjarrfikëse e portit detar të Durrësit.

Deri më tani sipërfaqja e djegur paraprakisht vlerësohet në afro 5 hektarë kryesisht me bimësi të ulët, por ende nuk dihet shkaku i zjarrit. Hetimet do të zbulojnë nëse ka qenë i qëllimshëm, apo ka nisur nga temperaturat e larta që kanë pushtuar vendin kohët e fundit. 

Zjarr

GJIROKASTËR- Një zjarr i përmasave të mëdha ka rënë ditën e sotme në fshatin Kalivaç, në Memaliaj. Si pasojë e flakëve janë shkrumbuar drurë frutorë dhe ullishte.

Në vendin e ngjarjes kanë shkuar forca zjarrfikëse të Tepelenës dhe Memaliajt. Përhapja me shpejtësi e flakëve, ka përfshirë edhe kabinën elektrike që furnizon fshatin me energji dhe zonën përreth duke shkaktuar edhe ndërprerjen e energjisë. Ka nisur puna për shuarjen e zjarrit dhe për riparimin e kabinës.

Pamje nga zjarri

TROPOJË- Zjarr në vendin e quajtur Gryka e Motinës Dragobi, brenda Parkut Kombëtar të Alpeve të Shqipërisë. Edhe pse në një terren të vështirë po punohet për izolimin dhe fikjen e plotë të saj. Nuk dihet nëse flakët e zjarrit rrezikojnë banesat pranë, mirëpo puna ka nisur për shuarjen e tyre.

Ekipet zjarrfikëse, punonjësit e Agjensisë së Zonave të Mbrojtura po punojnë për shuarjen e zjarrit.

Zjarre

TIRANË- Ministria e Mbrojtjes ka bërë bilancin e vatrave të zjarrit gjatë 24 orëve në vendin tonë. Sipas “Mbrojtjes” janë regjistruar 22 vatra, nga të cilat 16 janë shuar dhe 6 vijojnë të jenë aktive. 

Në fshatin Shtiqën të Kukës zjarri është rritur me shpejtësi dhe rrezikon që të djegë 4 banesa. Flakët po përhapen me shpejtësi pranë oborreve të shtëpive. Banorët po mundohen të shuajnë flakët së bashku me punonjësit e zjarrfikësen e Bashkisë Kukës.

NJOFTIMI I MINISTRISË:

IZOLOHEN VATRAT NË:

• Fshatin Melgush dhe fshatin Rranxa, bashkia Vau Dejës.
• Fshatin Çernen, bashkia Dibër.
• Fshatin Mukje, Fshatin Derven bashkia Krujë.
• Fshatin Plashnik i Madh, bashkia Poliçan.
• Në vendin e quajtur Uznovë, bashkia Berat.
• Fshatin Fier i Ri dhe në fshatin Saver bashkia Lushnjë.
• Fshatin Petov, bashkia Fier.
• Në njësinë administrative Rajoni Nr.5 dhe në lagjen “Partizani” bashkia Vlorë.
• Fshatin Shkozë, bashkia Selenicë.
• Fshatin Golem, bashkia Kavajë.
• Fshatin Çerkezë dhe në fshatin Mjull Bathore, bashkia Tiranë.
• Njësia administrative Postribë, bashkia Shkodër.
• Fshatin Mal i Bardhë, bashkia Kurbin.

Në aksionet për shuarjen e flakëve gjatë 24 orëve të fundit janë angazhuar 562 efektivë zjarrfikës, Forca të Armatosura, forca bashkiake, forca policore, punonjës të Administratës së Zonave të Mbrojtura, shërbimi pyjor, forca vullnetare, 47 mjete zjarrfikëse.
Aktualisht janë aktive vatrat në:

• Në Maje të Zorgjit, njësia administrative Shalës, sipër fshatit Nderlysa, bashkia Shkodër. Aktualisht po vijon puna nga forcat e pushtetit vendor.

• Në vendin e quajtur “Liqeni i Zi German”, në fshatin German, bashkia Mat. Gjatë ditës së djeshme kanë punuar forca të pushtetit vendor, vullnetarë dhe forca Armatosura të cilët kanë mundur të bëjnë izolimin e disa vatrave të zjarrit, operacioni do të vazhdoj edhe sot ku do të angazhohen forcat e pushtetit vendor dhe 50 efektive nga FA.

• Në fshatin Shetaj, bashkia Durrës, vijon puna në terren për shuarjen zjarrit të rënë më datë 19.07.2022. Gjate natës janë shfaqur dhe tre vatra te tjera zjarri qe janë ne distance rreth 500 m nga vatra kryesore. Nga bashkia e Durresit po punohet per hapjen e rrugëve per futjen e mjeteve zjarrfikëse. Operacioni vazhdon.

• Në fshatin Dragobi, bashkia Tropojë zjarri i rënë në një sipërfaqe malore me pemë ahu vijon të digjet me intensitet të ulët brenda vatrave të saj. Ditën e sotme kanë filluar punën për izolimin e vatrave aktive nga forcat e bashkisë dhe ADZM.

• Në fshatin Skuraj, vijon puna nga bashkia Kurbin, intensiteti i vatrave është më i ulët.

• Fshatin Mal i Bardhë, bashkia Kurbin po mbahet ne monitorim nga bashkia.
U bëjmë thirrje qytetarëve të tregojnë kujdes gjatë këtyre ditëve të nxehta, të njoftojnë për çdo vatër zjarri në kohë të shpejtë pranë strukturave te sistemit te mbrojtjes civile.
Të gjitha forcat e sistemit të Mbrojtjes Civile janë në gatishmëri të plotë, me kapacitetet e nevojshme për ndërhyrje nga toka dhe nga ajri.
Kujtojmë se zjarr vënia e qëllimshme dënohet sipas ligjit.