Takimi në Romë/ Meloni: Forcimi i bashkëpunimit mes dy vendeve, kundër migracionit të paligjshëm. Rama: Asnjë qeveri italiane nuk ka vënë në lëvizje një program kaq strategjik

Giorgia Meloni dhe Edi Rama

TIRANË- Takimi i 6 muajve më parë mes kryeministrit Edi Rama dhe kryeministres italiane Giorgia Meloni ka lënë disa objektiva që duhet që të plotësoheshin në disa sektorë të vendit. Gjatë një takimi u prezantuan disa objektiva të rëndësishëm bashkëpunimi mes dy vendeve, përfshirë krijimin e një forumi ku do të përfaqësoheshin shoqëri dhe ndërmarrje të sistemit prodhues, si dhe thellimin e bashkëpunimit në sektorë strategjikë si energjia dhe transporti.

Një nga pikat kryesore të përmendura ishte edhe fokusi tek “Korridori 8”, i cilësuar si një bosht i rëndësishëm lidhës që kalon nga Puglia në Shqipëri dhe vijon drejt Maqedonisë së Veriut dhe Bullgarisë, me synimin për të rritur rolin logjistik dhe ekonomik të rajonit. Në takim u fol dhe për afrimin e brigjeve të Adriatikut dhe shndërrimin e tij në një korridor strategjik ekonomik dhe energjetik, duke përfituar nga infrastruktura e jugut të Italisë dhe duke e pozicionuar këtë hapësirë si një nyje të rëndësishme për zhvillimin rajonal dhe europian.

“Edhe për këtë me kryeministrin Rama që tani kemi caktuar, kemi lënë një tjetër takim, një tjetër objektiv, atë të vendosjes dhe krijimit të një forumi, ku do të përfaqësohen shoqëri, ndërmarrje që përfaqësojnë sistemin prodhues brenda 6 muajve të parë nga sot. Kemi përcaktuar drejtimet ku do të vijojë bashkëpunimi ynë në sektorë si: energjia, transporti, duke u përqendruar sidomos, sidomos në veçanti, tek “Korridori 8”, ai damar, ajo rrugë e cila vjen nga Puglia, duke kaluar në Shqipëri dhe duke vazhduar më tej drejt Maqedonisë dhe Bullgarisë. Sigurisht, përafrimi i brigjeve të Adriatikut dhe shndërrimi i Adriatikut në një korridor strategjik, vë në dispozicion të të gjithëve, infrastrukturat ekonomike, logjistike, energjike që janë të pranishme në jugun e Italisë dhe bëjnë që jugu i Italisë të jetë një hap shumë i rëndësishëm për këtë zonë. Kjo do të thotë të sigurosh më shumë mirëqenie dhe zhvillim, jo vetëm për Italinë, jo vetëm për Shqipërinë, por dhe për mbarë Europën në tërësinë e saj,“ tha Meloni.

Megjithatë, 6 muaj pas këtyre deklaratave, nuk ka ende njoftime zyrtare apo konfirmime të qarta mbi krijimin e forumit të premtuar, as mbi hapat konkretë të ndërmarrë për realizimin e objektivave të përmendura në energji, transport apo zhvillimin e “Korridorit 8”. Në mungesë të informacionit të detajuar mbi progresin, mesa duket këto premtime mbetën në letra, si shumë premtime të tjera./Dosja.al

Giorgia Meloni dhe Edi Rama

ITALI- Kryeministrja e Italisë, Giorgia Meloni është takuar ditën e sotme me kryeministrin Edi Rama në Romë, ku dhe kanë zhvilluar një takim në Pallatin Chigi. Përmes një postimi në rrjetet sociale, Meloni shkruan se ky takim ka mundësuar të bëhet një pasqyrë mbi forcimin e partneritetit mes dy vendeve, në sektorë me interes të përbashkët. 

Kryeministrja italiane shkruan se fokus i tij, ishte lidhshmëria infrastrukturore, mbrojtja dhe bashkëpunimin në luftën kundër migracionit të paligjshëm.

“Pesë muaj pas Samitit Ndërqeveritar të nëntorit, takimi i sotëm në Pallatin Chigi me Kryeministrin e Republikës së Shqipërisë, Edi Rama, ka mundësuar të bëhet një pasqyrë mbi forcimin e partneritetit mes vendeve tona në sektorë me interes të përbashkët, me fokus të veçantë në lidhshmërinë infrastrukturore, mbrojtjen dhe bashkëpunimin në luftën kundër migracionit të paligjshëm”, shkruan Meloni.

ITALI- Kryeministri Edi Rama ka vlerësuar angazhimin e qeverisë italiane duke theksuar se qeveria e Melonit ka nisur programin më startegjik të bashkëpunimit me Shqipërinë.

Përmes një postimi në rrjetet sociale, pas takimit me homolgen e tij italiane, Rama nënvizoi se ky afrim po konkretizohet me projekte të mëdha që premtojnë më shumë zhvillim dhe siguri për vendin. Ai e ka cilësuar qeverinë Meloni si një partner kyç në rrugëtimin e mëtejshëm të Shqipërisë.

"Të gjitha qeveritë e Italisë në 35 vitet e fundit kanë qenë posaçërisht dashamirëse ndaj Shqipërisë, por asnjë qeveri italiane nuk ka vënë në lëvizje një program kaq të ngjeshur bashkëpunimi strategjik me Shqipërinë, sa qeveria e Giorgia Melonit. Afrimi i mëtejshëm me Italinë përmes projekteve të mëdha e konkrete sjell më shumë zhvillim e siguri për Shqipërinë.",shprehet Rama./Dosja.al  

ITALI-Kryeministri Edi Rama ndodhet sot për një vizitë zyrtare në Itali, ku u prit me një ceremoni shtetërore nga homologia e tij, Giorgia Meloni, në Pallatin Chigi.

Një moment që tërhoqi vëmendjen gjatë pritjes ishte përshëndetja e veçantë e Ramës, i cili u ulej sërish në gjunjë para kryeministres italiane.

Mësohet se, dy liderët zhvilluan një takim me fokus thellimin e bashkëpunimit strategjik, integrimin evropian dhe sfidat rajonale. Kjo vizitë, e cila vijon më tej drejt Barcelonës, synon forcimin e raporteve me partnerët kyç ndërkombëtarë./Dosja.al

TIRANË- Kryeministri Edi Rama ndodhet sot në Itali, ku pritet të zhvillojë një takim me kryeministren italiane Giorgia Meloni. Para takimit me kryeministren Meloni, Rama ka postuar një foto në rrjetet sociale ku shkruan "duke përsëritur mësimet përpara takimit, se motra e Italisë nuk të fal me njohuritë që ka për çdo projekt".

Sot në orën 15.00 kryeministri  pritet të zhvillojë një takim në Romë me Kryeministren italiane, Giorgia Meloni, e më pas me Ministrin e Mbrojtjes, Guido Crosetto. Ky takim vjen pas mbledhjes se dy qeverive të mbajtur në Itali nëntorin e shkuar, ku u nënshkruan marrëveshje të rëndësishme bashkëpunimi.

Më pas Rama do të udhëtojë drejt Barcelonës ku do të marrë pjesë me ftesë të kryeministrit Pedro Sanchez, në punimet e mbledhjes së katërt të Samitit “Në Mbrojtje të Demokracisë”. Në fokus të tij do të jenë tema kyçe si “Institucionet dhe multilaterizmi” si edhe “Dezinformimi dhe teknologjia digjitale”. Në kuadër të Samitit, Kryeministri Rama do të zhvillojë edhe takime bilaterale me kryeministrin Sanchez dhe Presidentin e Këshillit Evropian, António Costa./Dosja.al

Edi Rama, Meloni

SPANJË- Kryeministri Edi Rama nisi një vizitë pune në Itali dhe Spanjë, ku pritet të mbajë takime të nivelit të lartë me objekt diskutimi disa fusha me rëndësi të ndërsjelltë, mes tyre edhe procesi i integrimit të Shqipërisë. Takime të nivelit të lartë për ecurinë e projekteve të bashkëpunimit me Italinë dhe në Samitin për Mbrojtjen e Demokracisë në Spanjë.

Kryeministria njofton se Rama do të zhvillojë një vizitë pune në Romë dhe Barcelonë në datat 16–18 prill, në kuadër të angazhimeve ndërkombëtare dhe forcimit të bashkëpunimit me partnerët evropianë. Gjatë qëndrimit në Itali, Kryeministri do të zhvillojë një takim me Kryeministren italiane, Giorgia Meloni, e më pas me Ministrin e Mbrojtjes, Guido Crosetto.

Ndërsa në vijim të vizitës, Kryeministri Rama do të marrë pjesë me ftesë të kryeministrit Pedro Sanchez, në punimet e mbledhjes së katërt të Samitit “Në Mbrojtje të Demokracisë”, që zhvillohet në Barcelonë, Spanjë.

Punimet e samitit do të përqendrohen në tema kyçe si “Institucionet dhe multilaterizmi” si edhe “Dezinformimi dhe teknologjia digjitale”, ku një vëmendje e veçantë do t’i kushtohet rregullimit të mjedisit dixhital për të luftuar dezinformimin, forcimit te institucioneve demokratike dhe multilateralizmit, si dhe luftës ndaj  pabarazive si themel për një demokraci të fortë. Në kuadër të Samitit, Kryeministri Rama do të zhvillojë edhe takime bilaterale me kryeministrin Sanchez, Presidentin e Këshillit Evropian, António Costa./Dosja.al