Përjashtohen me 10 ditë nga seancat plenare 6 deputetët e PD, Spaho: Hyj në Kuvend sa herë të dua, do thyej edhe karrige

Saimir Korreshi

TIRANË- Deputeti i Partisë Demokratike, Saimir Korreshi tha se vendimi për përjashtimin e 6 deputetëve të opozitës ishte marrë paraprakisht dhe mbledhja e sekretariatit të Etikës ditën e sotme, ishte thjesht formale. Jashtë sallës së Kuvendit, ai deklaroi se Kuvendi ka nisur fushata elektorale.

“Vendimet janë marrë paraprakisht pavarësisht se formalisht mblidhet sekretariati. Vendimet janë marrë që në grupin parlamentar të PS që u mblodh ditën e djeshme. E njëjta histori, kalojnë afatet, Kuvendi ka shumë punë se ka filluar fushata elektorale dhe më shumë merren me ‘Aktivistin’ sesa më punët. Ata pretendojnë se ka rregullore ndërkohë që janë të parët që kanë shkelur rregulloren. Kur ne kërkojmë interpelancë thonë se është bashkuar me mocionin për debat ndërkohë që duhet të bëhen veçmas”-tha Korreshi.

I pyetur nëse opozita do organizojë protestë dhe do bllokojë seancën e kësaj te enjte, Korreshi tha se do të kishte protestë por është e kotë sepse kryeministri Edi Rama ndodhet në Japoni.

“Do protestojmë edhe në seancën e rradhës. Por i bie të protestosh kot sepse ai është duke bërë lufta me shpata në Japoni. Koçi i Teto Ollgës po bën luftë me shpata në Japoni, edhe këtë javë na mbetet të protestojmë me bilbila ”-tha deputeti.

Kuvendi

TIRANË- Partia Socialiste ka përjashtuar për 10 nga seancat plenare edhe gjashtë deputetë të të tjerë të PD këtë të hënë, pas seancës së të enjtes së javës që kaloi. Deputetët demokratë akuzohen se bllokuan foltoren, i ranë bilbilit dhe vunë zhurmues në seancë. 

Sekretariati për Proçedurat dhe Votimet votoi pro përjashtimit për 6 deputetët e PD:

1.      Edmond Spaho
2.      Elda Hoti
3.      Sorina Koti
4.      Oerd Bylykbashi
5.      Lindita Metaliaj
6.      Greta Bardeli

Edmond Spaho

TIRANË- Deputeti i Partisë Demokratike,Edmond Spaho, mori pjesë ditën e sotme në mbledhjen e Komisionit të Etikës, e cila po shqyrton kërkesën e PS për përjashtimin nga seancat plenare të 6 deputetëve të PD-së. Spaho u revoltua duke thënë se po bëhet grusht shteti ndaj do të bëjë zhurmë e do të hyjë në Kuvend sa herë të dojë dhe do guxojë të thyejë dhe karrige për shkak se kanë refuzuar ngritjen e Komisionit Hetimor për çështjen McGonigal.

Spaho: Në Kuvend hyj sa herë të dua unë. Komisioni Hetimor është i detyrueshëm të ngrihet dhe s’ka ndodhur që të refuzohet ngritja e një komisioni. Dhe kur është refuzuar nga ana juaj ka ndërhyrë Gjykata Kushtetuese. Unë të mos ngrihem për këtë të drejtë timen që po ma merr kryeministri për dhunë? Të pezullosh të drejtat kushtetuese të deputetëve do të thotë grusht shteti. Ky është grusht shteti. Unë po të shpjegoj pse po revoltohem unë.

Bushka: Nuk është ky vendi.

Spaho: Sjellja ime është si rrjedhojë e grushtit të shtetit që ka bërë kryeministri. Do bëj zhurmë, do i bie bilbilit, do thyej edhe karrige se të drejtat kushtetuese janë më të rëndësishme se figura etike. Do pranoj të shkel mbi etikën time për të mbrojtur një cështje më të madhe që është e gjithë shqiptarëve. Jeni kryetare e Komisionit të Ligjeve dhe e Drejtave. Doni të shkatërroni opozitën. Ju duhet të flisni seriozisht. Unë po të shpjegoj sjelljen time. Ju po merrni masë për mua, po më përjashtoni 20 ditë që nuk ka ndodhur kurrë. Unë kërkoj ngritjen e Komisionit Hetimor, janë paguar para për të eliminuar opozitën. Firmat i keni, s'doni t'i thërrisni ju ata deputetë. Po shkel Kushtetutën me të dyja këmbët duke u bërë kukull e Edi Ramës.

TIRANË- Partia Demokratike ka bërë publike një video ku shihet deputeti i PS Baftjar Zeqaj, i cili u kap duke votuar për kolegen në seancë parlamentare. Ai është një nga deputetët që ka firmosur për përjashtimin e deputetëve të opozitës. Deputetë të PS kërkojnë përjashtimin e 6 deputetëve të tjerë të opozitës pas seancës së fundit. PD deklaron se socialistët në mungesë argumentash mbrojtës për skandalin e lidhjeve korruptive të Edi Ramës dhe McGonigal, kanë zgjedhur që çdo seancë të përjashtojnë deputetë të opozitës.

DEKLARATA E PD:

Kërkesa mban firmëtar të parë Baftjar Zeqajn i cili u kap nga media duke shkelur Rregulloren e Parlamentit pasi votoi hapur për kolegen socialiste e cila nuk ndodhej në seancë.

Me këtë kërkesë rreth gjysma e grupit parlamentar të PD është përjashtuar nga seancat e fundit parlamentare. Seancën e së enjtes nuk do të jenë prezentë 8 deputetë mes tyre Kryetari i PD Sali Berisha dhe Sekretari i Përgjithshëm i PD Flamur Noka. Me një akt të papreçedentë, socialistët në mungesë argumentash mbrojtës për skandalin e lidhjeve korruptive të Edi Ramës dhe McGonigal, kanë zgjedhur që çdo seancë të përjashtojnë deputetë të opozitës.

Socialistët sërish në shkelje kërkojnë mbledhjen e Sekretariatit jashtë afatit, 4 ditë pas dorëzimit të kërkesës. Sipas Rregullores, sekretariati duhej të ishte mbledhur 48 orë pas dorëzimit të kërkesës së deputetëve socialistë, pra më datë 19 shkurt. Sekretariati për Proçedurat dhe Votimet e  pritet të përjashtojë deputetët e PD.

1.      Edmond Spaho
2.      Elda Hoti
3.      Sorina Koti
4.      Oerd Bylykbashi
5.      Lindita Metaliaj
6.      Greta Bardeli