Abazoviç në Kosovë, nënshkruan marrëveshjen me Kurtin për shfrytëzimin e hapësirës ajrore: Jam si në shtëpinë time

Dritan Abazoviç

KOSOVË- Kryeministri në detyrë i Malit të Zi, Dritan Abazoviç ka thënë sot se raportet e Malit të Zi me Kosovën janë të shkëlqyera. Abazoviç në konferencën e përbashkët me kryeministrin Albin Kurti, theksoi se qasja e Malit të Zi ndaj Kosovës nuk do të ndryshojë, pavarësisht se atje kanë ndodhur disa procese politike.

“Mali i Zi dhe Kosova janë duke dhënë shembull se si funksionojnë dy shtete fqinje. Jemi në rrugë të duhur që të bëjmë disa projekte që do t’i quaja historike. Ideja jonë është me kriju qasje më të lehtë për dy popujt e vendeve tona. Na vijmë me një mesazh paqësor, miqësor edhe në të ardhmen do të kemi një atmosferë ku do të japim shembull. Në Mal të Zi kanë ndodhë disa procese politike, por kjo nuk do të ndryshon qasjen ndaj Kosovës. Ne jemi të gatshëm me kapacitetet tona të përkrahim Kosovën”, theksoi ai.

Kurti dhe Abazovic

KOSOVË- Kryeministri i Kosovës Albin Kurti pas takimit me homologun e tij nga Mali i Zi Dritan Abazoviç tha se fokus i takimit ishte raportet ndërshtetërore mes dy vendeve. Kurti në një konferencë për media ka thënë se e gëzon fakti që Mali i Zi i ka ratifikuar tri marrëveshjet në kuadër të Procesit të Berlinit. Ai po ashtu tha se marrëveshja e nënshkruar për shërbime ajrore është hap i rëndësishëm dhe i domosdoshëm për rregullimin e hapësirës e ajrore mes dy republikave Kosovë–Mali i Zi.

“Marrëveshja me Malin e Zi, mundëson shkurtimin e rrugëve ajrore e kohës së fluturimit për 15 minuta”, ka thënë Kurti.

Kurti po ashtu tha se është mirënjohës ndaj shtetit malazez i cili në luftën e fundit në Kosovë u bë strehë e shumë refugjatëve nga Kosova. Ai po ashtu tha se sot qytetarët e Kosovës, jo vetëm që shkojnë në Mal të Zi për të pushuar në bregdet, por edhe janë investitorë ekonomik.

“Pata kënaqësinë të mirëpres në takim kryeministrin Abazoviç me të cilët biseduam për marrëdhëniet e mira fqinjësore mes dy vendeve. Mundësitë e mira për dy vendet tona ishin në fokus të këtij takimi. Mali i zi e njohu Kosovën në vitin 2008. Jemi mirënjohës që në kohëra më të vështira Mali i Zi u bë strehë për Kosovën në shpëtimin për mbi 100 mijë qytetarë të Kosovës që u dëbuan nga regjimi i Millosheviqit…Qytete të shumta i hapën zemrat duke i strehuar refugjatët nga Kosova…Sot qytetarët e Kosovës jo vetëm që kanë pushuar në bregdetin e Malit të Zi, por janë edhe investitorë të rëndësishëm të cilët i kontribuojnë ndërlidhjes ekonomike mes dy vendeve tona…Sot punojmë ngushtë si dy shtete fqinje për të promovuar paqen e sigurinë”, ka thënë Kurti

Abazovic dhe Kurti

KOSOVË- Kryeministri i Kosovës Albin Kurti priti sot në takimin kryeministrin e Malit të Zi, Dritan Abazoviç me të cilin kanë nënshkruar marrëveshjen bilaterale për korridorin e qiellit të hapur, me të cilin parashihet lejimi i shfrytëzimit të hapësirës ajrore të Malit të Zi nga aeroplanët që fluturojnë nga Aeroporti i Prishtinës.

Pas takimit, kryeministrat Kurti dhe Abazoviç do të kenë një deklaratë për media. Abazoviç dhe delegacioni që e shoqëron, para takimit me Kurtin u prit nga kryetari i Komunës së Prishtinës, Përparim Rama, i cili ia dhuroi “Çelësin e Prishtinës”.

Dritan Abazoviç dhe Perparim Rama

KOSOVË- Kryetari i Komunës së Prishtinës, Përparim Rama priti në takim kryeministrin e Malit të Zi, Dritan Abazoviç bashkë me delegacionin e tij. I pari i Prishtinës në shenjë nderimi ia dhuroi “Çelësin e kryeqytetit”, kryeministrit në detyrë të Malit të Zi, Dritan Abazoviç.

Rama tha se është i nderuar që ta pres në vizitën e tij të parë në Prishtinë, kryeministrin Abazoviç. Ai tha se këtë Çelës po ia dhuron si simbolik që Abazoviq ta ndjejë veten si në shtëpinë e tij, si dhe siç u shpreh Rama të lidh më shumë dy shtetet.

“Na keni nderu me vizitën tuaj në kryeqytet, prandaj dëshirojmë të ju dhurojmë Çelësin e Prishtinës…  kjo është shtëpia juaj dhe jeni të mirëseardhur kurdoherë. Shpresoj që ky Çelës të lidhë shtetet tona edhe më shumë, pra Kosovën me Malin e Zi. Po ashtu edhe personalisht për ju që ta ndjeni veten si në shtëpinë e juaj”, ka thënë Rama.

Ndërsa kryeministri i Malit të Zi, Dritan Abazoviq, tha se e ndjen veten si në shtëpinë e tij.

“Falënderoj kryetarin e Prishtinës. Ky Çelës është simbolik që të bëhem qytetar i Prishtinës dhe me të vërtetë e ndjejë veten si në shtëpinë time…”, ka thënë kryeministri i Malit të Zi.

Kurti dhe Vucic

KOSOVË-  Kryeministri malazez Dritan Abazoviç do të takohet me homologun e tij në Kosovë Albin Kurti ditën e sotme. Në takimin ndërmjet dy kryeministrave, i paraparë për në orën 09:00, Kurti dhe Abazoviç do të nënshkruajnë marrëveshjen bilaterale për korridorin e qiellit të hapur, me të cilin parashihet lejimi i shfrytëzimit të hapësirës ajrore të Malit të Zi nga aeroplanët që fluturojnë nga Aeroporti i Prishtinës.

Pas takimit, kryeministrat Kurti dhe Abazoviç do të kenë deklaratë për mediat. Para takimit me Kurtin, rreth orës 08:15, Abazoviç dhe delegacioni që e shoqëron, do të pritet nga kryetari i Komunës së Prishtinës, Përparim Rama, nga i cili do të pranojë edhe “Çelësin e Prishtinës”.

Abazoviç ka mbërritur në Prishtinë gjatë së enjtes dhe vizitoi objektet fetare e kulturore, përfshi Xhaminë e Çarshisë në Prishtinë si dhe Katedralen Nënë Tereza. Kryeministri i Malit të Zi gjithashtu takoi edhe ish-presidenten e Republikës së Kosovës, Atifete Jahjaga. Në vijim të vizitës së tij, që pritet të mbyllet të shtunën, Abazoviç ka paralajmëruar takim edhe me drejtues të partive politike parlamentare. Ai do të takohet me kryetarin e PDK-së, Memli Krasniqi, me kryetarin e LDK-së, Lumir Abdixhiku.