Agresori ndodhej 150 metra larg tij, Trump pas atentatit: U rrotullova në kohën e duhur, plumbi mund të më godiste në tru! Biden bën thirrje për reflektim

Trump

SHBA- Pas përpjekjes për ta vrarë, ish-presidenti amerikan, Donald Trump, tha se e ka rishkruar krejtësisht fjalimin që do ta mbajë në Konventën e Partisë Republikane. Në vend se ta kritikojë presidentin aktual, Joe Biden, ai tha se do të përçojë mesazhe uniteti.

“Do të jetë një fjalim krejt ndryshe. Kjo është një mundësi për ta bashkuar vendin. Mua më është dhënë kjo mundësi”, tha Trump për gazetën Washington Examiner.

Trump arriti në shtetin e Uiskonsinit, ku, nga sot deri më 18 korrik, zhvillon punimet Konventa e Partisë Republikane. Në këtë ngjarje, Trumpit pritet t’i konfirmohet nominimi i partisë si kandidat presidencial në zgjedhjet e 5 nëntorit.

Ai do ta mbajë fjalimin të enjten. Pritet, po ashtu, të bëjë të ditur se kush do të jetë kandidati për zëvendës të tij. Trump, 78 vjeç, u qëllua në vesh në një tubim në Pensilvani, të shtunën. Sulmuesi i dyshuar i tij, Thomas Crooks, 20 vjeç, u qëllua dhe u vra nga Shërbimi Sekret, por motivi i tij mbetet i paqartë. Nga të shtënat u vra një spektator, ndërsa dy të tjerë u plagosën rëndë.

Duke folur për gazetën Washington Examiner, Trump tha se provat për atë që ndodhi në Pensilvani, janë duke u mbledhur.

“Energjia që vinte nga njerëzit atje, në atë moment... Është e vështirë ta përshkruash se si ndihej, por e dija se bota po shikonte. E dija që historia do ta gjykojë këtë dhe e dija se duhej t’ua bëja me dije se jam mirë”, tha Trump.

Në zgjedhjet e nëntorit, Trump pritet të garojë kundër presidentit aktual, Joe Biden. Biden, në një fjalim nga Zyra Ovale të dielën mbrëma, bëri po ashtu thirrje për unitet kombëtar.

“Në Amerikë, ne i zgjidhim mosmarrëveshjet në kutitë e votimit, e jo me plumba”, tha Biden, duke shtuar se “urrejtja nuk duhet të ketë port të sigurt”./ REL

Thomas Matthew Crooks

SHBA- Informacione të reja po dalin në dritë për 20-vjeçarin, Thomas Matthew Crooks i cili qëlloi ndaj Donald Trump gjatë një fjalimi në fushatën e tij elektorale në Pensilvani. Ndërkohë ende motivi se pse i riu vendosi të kryente një akt kaq të rëndë.

Sipas mediave amerikane, Crooks ishte përpjekur t'i bashkohej ekipit të qitjes së shkollës së tij të mesme, por ishte refuzuar sepse ishte shumë keq në qitje. Dy ish-shokët e klasës të 20-vjeçarit, të cilët folën për New York Post, thanë se 20-vjeçar kishte marrë pjesë në prova për çitje duke qëlluar nga pozicioni më i lehtë, por ai nuk ishte aspak mirë dhe u përjashtua që në ditën e parë. Njëri prej tyre, Jamieson Murphy, pohoi se Crooks kishte humbur objektivin me rreth gjashtë metra.

"Ai mori pjesë në prova dhe gjuajtja e tij ishte aq komike saqë ai nuk e bëri kurrë ekipin dhe ishte jashtë që nga dita e parë."

“Ai nuk mundi as të qëllonte. Ishte një goditje vërtet e keqe”, tha studenti i dytë i Crooks, i cili foli për New York Post.

Dy të rinjtë përshkruanin gjithashtu shqetësimet e trajnerit të gjuajtjes pas provës së Crooks.

"Ai kishte stërvitur snajperë, kështu që ai mund të dallonte kur dikush nuk ishte personi më i mirë. Ne kishim vënë re disa gjëra që kishte thënë Thomas dhe se si ai ndërvepronte me njerëzit e tjerë. Ai po thoshte gjëra që ishin disi shqetësuese”, shtoi një nga të rinjtë që foli për Crooks.

Një tjetër shok klase i Crooks-it, i cili foli për BBC- në tha se ai dukej fëmijë i mirë por askush nuk e njihte mirë.

"Ai ishte në shkollë, por nuk mbaj mend askënd që e njihte mirë. Gjithsesi ai dukej si një fëmijë i mirë. Ai nuk ishte shumë i popullarizuar, por nuk e kishte problem apo diçka të tillë”, shtoi ai. 

pamje nga atentati

SHBA- FBI ka publikuar një përditësim lidhur me hetimet për atentatin e kryer ndaj ish-presidentit Donald Trump. Byroja ka përsëritur se nuk ka gjetur ende arsyen konkrete se pse Thomas Matthew Crooks mund të ketë tentuar të vrasë ish- presidentin.

FBI tha se po punon për të përcaktuar sekuencën e ngjarjeve dhe lëvizjet e sulmuesit përpara të shtënave dhe po shqyrton provat e mbledhura.

“Ndërsa hetimet e deritanishme tregojnë se sulmuesi ka vepruar i vetëm, FBI-ja vazhdon të kryejë aktivitet logjik hetimor për të përcaktuar nëse ka pasur ndonjë bashkëpunëtor të lidhur me këtë sulm”, thuhet në deklaratë.

Crooks nuk kishte asnjë shkelje të njohur në të kaluarën dhe arma që ai përdori në të shtënat ishte blerë legalisht. Më tej FBI shton se nuk shqetësime për sigurinë publike. 

Autori i atentatit

SHBA- Një video e re e momenteve para atentatit ndaj Donald Trump në Pensilvani është publikuar nga mediat amerikane duke ngritur pikëpyetje të reja në lidhje me boshllëqet e sigurisë që lejuan të ndodhte incidenti. Në video shihet se qytetarët kanë parë 20-vjeçarin Thomas Mattheë Crooks teksa është ngjitur në çatinë nga ku ka qëlluar drejt ish-presidentit amerikan.

“Ai po ngjitet në çati, e shihni? A është shtrirë?”, “ta shohim, është shtrirë,” dëgjohen të thonë qytetarët.

“Policia këtu, është dikush në çati”, bërtet dikush me uniformë.

Vihet re se sipas Associated Press duke cituar burime sigurie, një oficer i policisë lokale u ngjit në çati dhe pa Crooks që i drejtoi pushkën. Më pas, sipas të njëjtave burime, oficeri u tërhoq me Crooks që qëlloi në sekondat e ardhshme drejt Trump.

Një përfaqësues i Shërbimit Sekret që foli për Neë York Times fajësoi policinë lokale për të shtënat . Sipas Anthony Giulemi, 20-vjeçari ishte jashtë perimetrit që agjentët e Shërbimit Sekret ishin ngarkuar të ruanin.

Sipas tij, Shërbimi Sekret ishte përgjegjës për sigurinë në vendin e tubimit të Trump, ndërsa policia lokale në Pensilvani kishte për detyrë të siguronte zonën jashtë vendit. Megjithatë, sipas Neë York Post, banorët vendas thanë se ata nuk u vizituan nga askush me uniformë as para dhe as gjatë tubimit të Trump.

donald trump

SHBA- Ish-presidenti, Donald Trump ka folur së fundmi për "Washington Examiner" ku ka rrëfyer për momentet e atentatit ndaj tij të shtunën. Trump në intervistën e tij të parë për atë që ndodhi në Pensilvani u shpreh se ai lëvizi në kohën e duhur për tiu shmangur plumbit gjë të cilën e cilësoi të pabesueshme.

“Gjëja më e pabesueshme ishte se më ndodhi jo vetëm të rrotullohesha, por të rrotullohesha saktësisht në kohën e duhur dhe në shkallën e duhur”, tha Trump në një intervistë gjatë një fluturimi për në Milwaukee për fillimin e Konventës Kombëtare Republikane.

“Nëse kthehem vetëm pas, ajo mund të më godiste në pjesën e pasme të trurit. Nëse do të isha kthyer nga ana tjetër, do të kishte kaluar drejt e në kafkë. Dhe meqenëse sinjali ishte i lartë, unë shikoj lart. Shanset që unë të bëj një kthesë perfekte janë ndoshta një e dhjeta e 1%, kështu që nuk duhet të jem këtu”, tha ish-presidenti amerikan.

“Isha pikërisht në këndin e duhur. Sepse gjëja ishte larg. Fakti që unë do të lëvizja pikërisht në atë sekondë ku ai (qitësi) nuk do të ndalonte së shtëna është shumë e mahnitshme. Mjaft e mahnitshme. Unë me të vërtetë nuk duhej të isha këtu”, vazhdoi Trump për lëvizjen që i shpëtoi jetën.

Sipas botimit, Trump foli me fjalët më të mira për agjentët e Shërbimit Sekret që e mbuluan atë ndërsa ai ishte në skenë. Në një moment, në fakt, ai ka ngritur mëngën e djathtë dhe ka shfaqur një mavijosje të shkaktuar nga rrëzimi i agjentëve mbi të.

“Kjo është vetëm nga një djalë që më kapi. A e dini se sa i fortë duhet të jeni për ta bërë këtë?," tha ai.

Trump gjithashtu përshkroi se ishte ai që insistoi të ngrihej dhe të dilte nga skena: "Ai u tha atyre: "Duhet të largohem". Nuk doja të tërhiqja zvarrë. Unë e kam parë këtë të ndodhë dhe nuk ishte një foto e mirë. Nuk e kisha problem të ecja”.

Siç tha ai, duke qeshur, “Doja të vazhdoja të flisja - doja të vazhdoja të flisja, por sapo u qëllova. Ishte një përvojë shumë surreale dhe kurrë nuk e dini se çfarë do të bëni derisa të ndodhë."

Trump gjithashtu pranoi se ajo që ndodhi në Pensilvani po ndryshon fushatën e tij zgjedhore. Siç shpjegoi ai, para këtyre ngjarjeve kishte planifikuar një fjalim shumë agresiv.

"Mendoj se do të ishte shumë keq nëse do të filloja të them se sa të këqij dhe të korruptuar janë të gjithë, edhe nëse është e vërtetë. Nëse kjo nuk do të kishte ndodhur (përfshirë atentatin) do të kisha pasur një fjalim që do të ishte shumë i ashpër. Tani do të kem një fjalim që do të jetë më unifikues,” tha ai.

“Do të doja shumë të arrija unitetin, nëse kjo është e mundur. Ka shumë njerëz të mirë në anën tjetër... Por ka edhe njerëz që përçajnë. Disa duan vërtet kufij të hapur dhe disa të tjerë nuk duan kufij të hapur. Pyetja është, a mund të bashkohen këto dy palë? A mund të ketë anë ku ka njerëz që duan të shohin burra të luajnë në sportet e grave dhe ka një anë që nuk e kupton as konceptin e lejimit të kësaj?''

foto ilustruese

SHBA- Shërbimi Sekret i Shteteve të Bashkuara po heton se si autori i atentatit ndaj ish-Presidentit Donald Trump arriti të afrohej aq pranë saqë arriti të hapë zjarr dhe ta plagosë atë me një armë të stilit AR të shtunën në Pensilvani.

Ngjarja po konsiderohet si një dështim i thellë i agjencisë. FBI-ja identifikoi të dielën 20 vjeçarin Thomas Matthew Crooks si "subjektin e përfshirë" në atentatin e së shtunës ndaj ish presidentit Trump, një nga aktet e profilit më të lartë të dhunës politike në disa dekada.

Agjencia tha se Crooks ishte nga Bethel Park i Pensilvanisë, rreth një orë larg nga vendi i tubimit politik ku zoti Trump u qëllua në vesh, ndërsa mbante një fjalim për fushatën. Crooks u vra nga personeli i Shërbimit Sekret. Ai ishte vetëm 150 metra larg vendit ku po fliste ish-Presidenti Trump kur hapi zjarr.

Presidenti Joe Biden tha të dielën se ai ka kërkuar një analizë të pavarur të masave të sigurisë në tubim. Zoti Biden tha se ai ka udhëzuar gjithashtu Shërbimin Sekret të SHBA-së që të rishikojë të gjitha masat e sigurisë për Kuvendin Kombëtar Republikan, që fillon të hënën në Miluoki.

Zoti Biden u bëri thirrje amerikanëve që të mos spekullojnë lidhur me motivin e autorit të sulmit. FBI po e heton atentatin si një akt të mundshëm terrorizmi të brendshëm. Sulmi tronditi majat e sistemit politik amerikan dhe solli si rezultat - të paktën përkohësisht – një zbutje të fushatës së nxehtë presidenciale të 2024-ës.

Motivi i autorit mbetet i paqartë. Familja e tij po bashkëpunon me autoritetet. Në makinën e autorit të dyshuar të sulmit u gjetën materiale për prodhim bombash dhe të tilla materiale u gjendën edhe në shtëpinë e tij.

Prirjet politike të tij nuk ishin të qarta. Ai ishte regjistruar si votues republikan. Por, sipas të dhënave të Komisionit Federal Zgjedhor kur ishte 17 vjeç, ai pati dhënë edhe një kontribut prej 15 dollarësh për organizatën politike “ActBlue”, e cila mbledh fonde për kandidatë demokratë dhe me prirje të majta.

Kevin Rojek, agjent i posaçëm i FBI-së i ngarkuar me zyrën në terren në Pittsburgh, u tha gazetarëve se "është e habitshme" që personi i armatosur qëlloi katër ose pesë herë përpara se të vritej.

“Aktualisht nuk kemi një motiv të identifikuar, megjithëse hetuesit tanë po punojnë pa u lodhur në përpjekje për të gjetur se cili ishte ai motiv”, tha agjenti Rojek, duke vënë në dukje se hetimi mund të zgjasë me muaj./VOA

Autori

SHBA- Ndërsa hetuesit federalë po përpiqen të përcaktojnë motivacionin e atentatit ndaj i ish-presidentit Donald Trump, një ish-shok klase i 20-vjeçarit Thomas Matthew Crooks, personit të identifikuar si vrasësi i mundshëm, po hedh dritë mbi temperamentin e tij.

Jason Kohler u tha gazetarëve se kishte qenë në shkollë të mesme me autorin dhe e cilësoi atë si vetmitar.

“Si fëmijë ai ishte gjithmonë vetëm. Atë e ngacmonin gjithmonë”, u tha zoti Kohler gazetarëve të dielën.

Ai shtoi se nuk kishte pasur shumë komunikim me vrasësin e mundshëm Crooks, i cili vihej në shënjestër për mënyrën se si vishej apo për faktin që vazhdonte të mbante maskë pasi u hoqën detyrimet për maskën e COVID-it.

Zyrtarët e agjencive të rendit thanë të dielën se gjetën materiale për prodhim bombash në makinën dhe shtëpinë e autorit të dyshuar Crooks dhe se arma e stilit AR që ai përdori ishte blerë nga babai i tij./ VOA

Biden

SHBA- Presidenti amerikan Joe Biden duke folur nga Zyra Ovale e Shtëpisë së Bardhë theksoi të dielën nevojën për bashkim pas atentatit ndaj rivalit të tij republikan Donald Trump. Sulmi ndaj ish-Presidentit Trump është një “thirrje ndaj të gjithëve ne, që të reflektojmë”, tha zoti Biden.

“Fatmirësisht (presidenti) Trump nuk u lëndua rëndë”, tha ai.

Biden paralajmëroi lidhur me rreziqet e dhunës politike në Shtetet e Bashkuara, duke thënë se dhuna nuk është zgjidhje.

“Nuk ka vend në Amerikë për këtë lloj dhune – për asnjë lloj dhune”, tha zoti Biden.

“Në demokracinë amerikane –argumentet paraqiten në mirëbesim. Në demokracinë amerikane -- respektohet sundimi i ligjit”, tha ai.

Ishte hera e tretë që zoti Biden fliste nga Zyra Ovale për të komentuar mbi çështje me rëndësi kritike për amerikanët që kur mori detyrën në vitin 2021. Tetorin e kaluar ai mbajti një fjalim mbi konfliktet në Gazë dhe Ukrainë, ndërsa në qershor 2023 ai iu drejtua amerikanëve për një marrëveshje me republikanët lidhur me buxhetin.

Dhuna me armë është diçka që ndodh shpesh në Shtetet e Bashkuara, por dhuna politike është shumë më e rrallë. Katër presidentë amerikanë janë vrarë dhe disa u kanë shpëtuar atentateve. Shumë kandidatë presidencialë janë vënë në shënjestër, disa prej të cilëve kanë humbur jetën.

Biden dhe ekipi i tij po përpiqen të modifikojnë mesazhin e fushatës pas atentatit ndaj zotit Trump. Disa orë pas atentatit, fushata e zotit Biden tërhoqi reklamat televizive dhe po pezullon komunikimet e tjera politike./ VOA