Bisedimet për Qeverinë e re malazeze/ Takimi me presidentin Milatoviç, kreu i PES optimist: Do të kemi shumicën për mandatin

Mal i Zi

MAL I ZI- Kryetari i Partisë Demokratike të Socialistëve (DPS), Danijel Zhivkoviç tha se nga takimi me kreun e shtetit Jakov Milatoviç arriti në përfundimin se aktualisht askush nuk ka nivelin e duhur të mbështetjes për të marrë një mandat për formimin një qeveri të re. I pyetur nëse ka pasur negociata mes Lëvizjes Evropa Tani (PES) dhe DPS-së për konstituimin e pushtetit ekzekutiv, Zhivkoviç u përgjigj se nuk ka pasur, shkruan Vijesti. 

"Duhet të jemi seriozë dhe të përgjegjshëm ndaj interesave shtetërore. Ne nuk nxitojmë të jemi qeveri në Mal të Zi, duam të jemi pjesë e asaj qeverie që respekton parimet dhe vlerat themelore. Ato parime përfshijnë ruajtjen e karakterit civil të shoqërisë dhe arritjen e një objektiv kyç i politikës së jashtme, që është anëtarësimi i Malit të Zi në BE. Këto janë parime vlerash mbi të cilat ne mund të bashkëpunojmë, nëse do të kishim marrë ftesë për këtë, sigurisht që do të kishim biseduar. Deri më tani nuk ka pasur bisedime të tilla. Nëse ka, do të informoheni”, u tha Zhivkoviç gazetarëve pas konsultimit me Milatoviq për mandatin që u mbajt në Cetinje.

Zhivkoviç vlerësoi se pa DPS-në dhe listën e koalicionit të udhëhequr nga ajo parti në zgjedhjet parlamentare të qershorit, nuk ka qeveri të qëndrueshme evropiane.

"Nëse dikush dëshiron të përfshihet në manovra të caktuara politike, nëse dëshiron të eksperimentojë përsëri - nuk ka problem. Ne do të jemi përsëri një opozitë shtetformuese, e fortë, kritike," përfundoi ai. 

Milatoviç sot ka nisur konsultimet për zgjedhjen e përfaqësuesit për përbërjen e qeverisë. Në takim, përveç Danjiel Zhivkoviç morën pjesë edhe Boris Pejoviç, anëtar i Kryesisë së PES-së, Seid Haxhiç, deputet nga lista e asaj lëvizjeje dhe Jelena Nedoviç, deputete nga lista e PES dhe anëtare e Alternativës. 

Milojko Spajiq

MAL I ZI- Lideri i Lëvizjes Evropa Tani (PES), Milojko Spajiç shpreh bindjen se do të ketë shumicën për mandatin, por edhe për formimin e qeverisë, shkruan Vijesti. 

“Mendoj se e kemi bindur presidentin e Malit të Zi Jakov Milatoviç se e kemi shumicën për mandatin, por edhe për formimin e qeverisë”, tha ai. 

I pyetur nëse pret të ketë mbështetjen e dyzet e një deputetëve, e cila është e nevojshme për zgjedhjen e qeverisë, Spajiç është përgjigjur pozitivisht.

“Ne jemi të bindur që kemi shumicën për mandatin dhe se pas kësaj do të kemi edhe shumicën për të formuar qeverinë... Detyra e mandatit është të kërkojmë shumicën prej 41, pra pjesëmarrjen aktive të Dyzet e një deputetë.Ne pamë që qeveria e shumicës dhe jo pakicës është një skenar optimal.Për të mos përsëritur gabimet e paraardhësve mendojmë se duhet të synojmë një qeveri të shumicës dhe një qeveri që do të kanë mbështetje të qëndrueshme në parlament”, u tha ai gazetarëve në Cetinje, pas takimit me Milatoviç.

Milatoviç sot ka nisur konsultimet për zgjedhjen e përfaqësuesit për përbërjen e qeverisë. Në takim, përveç Spajiçit, morën pjesë edhe Boris Pejoviç, anëtar i Kryesisë së PES-së, Seid Haxhiç, deputet nga lista e asaj lëvizjeje dhe Jelena Nedoviç, deputete nga lista e PES dhe anëtare e Alternativës. 

Jakov Milatoviç

MAL I ZI - Presidenti i Malit të Zi, Jakov Milatoviç, sot do të fillojë konsultimet me partitë politike për mandatin e formimit të qeverisë së re malazeze. Në rezidencën e presidentit në Cetinje, Milatoviç do të flasë me përfaqësuesit e Lëvizjes Evropa Tani në orën 9:00, me Partinë Demokratike të Socialistëve (DPS) në orën 12 dhe me përfaqësues të Demokracisë së Re Serbe (Nova) në orën 15:00.

Milatoviç ka thënë më herët se edhe pse ka një afat prej 30 ditësh, pret që konsultimet të përfundojnë më shpejt, pra brenda 15 ditëve të ardhshme.

“Ne duhet të kemi një qeveri të qëndrueshme dhe evropiane sa më shpejt të jetë e mundur. Unë do të bëj pjesën time dhe mendoj se duhet të ketë përgjegjësi dhe seriozitet të mjaftueshëm nga të gjitha anët e spektrit politik,”- tha Milatoviç.

Përfaqësuesit do të shpallin programin e tyre në Kuvend dhe do propozojnë përbërjen e qeverisë. Parlamenti vendos njëkohësisht për programin e mandatit dhe propozimin për përbërjen e qeverisë. Në mbledhjen e re të Kuvendit, Lëvizja Evropa Tani (PES), e udhëhequr nga Milojko Spajić kishte më së shumti deputetë - 24, ndërsa koalicioni Zajedno, ka 21 deputetë. Sipas rezultateve të zgjedhjeve të mbajtura më 11 qershor, Koalicioni për Ardhmërinë e Malit të Zi mori 13 mandate; ndërsa Koalicioni i Demokratëve dhe Lëvizja Qytetare URA kanë nga 11 vende dhe Partia Boshnjake, 6.

Koalicioni i Partisë Popullore Socialiste dhe Demos dhe Forumi Shqiptar kanë nga 2 përfaqësues në parlament dhe Nisma Qytetare Kroate dhe Aleanca Shqiptare kanë nga 1.

Por duhen së paku 41 deputetë që të krijojë shumicën e thjeshtë parlamentare. Kriza e tejzgjatur politike ka lënë në pushtet si kryeministër Dritan Abazoviçin që në parlament zotëron 12 mandate.

Abazoviç u ka kërkuar prokurorëve të hetojnë pretendimet se tregtari i arratisur i kriptomonedhave nga Koreja e Jugut Do Kwon kishte marrëdhënie financiare me Milojko Spajiç të cilit i ka financuar fushatën. Pas akuzave të Abazoviç drejtuar Spajiç ky i fundit ka përjashtuar mundësinë për bisedime me Lëvizjen Ura. Nga sa duket deri tani, pakicat kombëtare do të jenë vendimtare në fatin e krijimit të qeverisë së re malazeze në të kundërt në vjeshtë zgjedhësit mund t`ju drejtohen sërish kutive të votimit.