Pas 3 ditësh përfundon greva e urisë e invalidëve në Elbasan! Arrihet marrëveshja për paketën higjieno-sanitare, nesër jepen detaje

Pamje nga greva

TIRANË- Përfundon greva e urisë e invalidëve në Elbasan. Kjo sepse mbrëmjen e kësaj të hënë, grevistët kanë arritur një marrëveshje me Ministrinë e Shëndetësisë. Nuk dihet ende si kanë rënë dakord pasi invalidët kërkonin që t’i kthenin pagesën prej 16 mijë lekë në muaj pjesë e paketës higjieno-sanitare, e cila u ishte hequr.

Ndërkohë kanë njoftuar se nesër në orën 09:10 do të flasin për mediat lidhur me marrëveshjen pasi ende nuk dihen detaje dhe kushtet e akordit që kanë rënë.

Greva e invalidëve të Elbasanit vjen pasi KEMP epror iu hoqi paketën higjieno-sanitare 10 mijë lekë. Invalidët merrnin një pagesë prej 40 mijë lekë në muaj, por me heqjen e paketës higjieno-sanitare tashmë ata marrin 24 mijë lek në muaj. Ndarja e pagesës bëhet 12 mijë lekë në muaj për paaftësinë për të punuar, 10 mijë lekë shkojnë për shoqëruesin dhe 2 mijë lekë për pagesën e dritave. 

Gruaja

ELBASAN- Sot bëhen 3 ditë nga greva e Paraplegjikëve. Nëna e një prej invalidëve kërkon që të takohet me kryeministrin Edi Rama. Për mediat, ajo u shpreh se kempi iu është hequr djalit në mënyrë të padrejtë, ndaj kërkon shpjegim nga kreu i Qeverisë.

'I thashë doktor kam ardhur për të pyetur se përse na e keni hequr kempin. Doktori më tha ia ka hequr Rama. Pse ia hoqën? E panë në këmbë? Unë nuk i du paret, unë dua djalin, kam 40 vjet që e shikoj kështu të shtrirë. Nuk e shoh dot kështu, ia bëj thirrje Ramës që të vijë dhe të më takojë mua si nënë. Unë dua djalin tim, jo lekun'- tha nëna e një prej paraplegjikëve, të cilëve iu është hequr një pjesë e kempit. Atyre iu është thënë se do të bëhet një projekt pilot, ku ndryshimet e para do të ndodhin në Elbasan. 

Greva

ELBASAN- Tre prej invalidëve që u futën në grevën e urisë janë zëvendësuar. Kështu kanë zbuluar për mediat, grevistët e tjerë, duke shpjeguar se gjendja e atyre ishte shumë kritike. Ata janë të vendosur t'i shkojnë deri në fund grevës, për të marrë sërish pjesën tjetër të kempit që ia hoqën.

'Gjendja është shumë e keqe, i kemi zëvendësuar 3 pasi ishin keq me shëndetin. Situata është shumë kritike, nuk kemi marrë asnjë lloj kontakti. Jemi të vendosur për ta vazhduar grevën. Ne kërkojmë që personat që kanë shkelur ligjin të dalin para drejtësisë'- tha një prej tyre. 

Invalidi

ELBASAN- Invalidët futen sot në ditën e tretë të grevës. Për mediat, dy grevistë që vijojnë ende rezistencën kanë treguar se kanë pasur përkeqësim në shëndet. Gjatë orëve të fundit ata nuk kanë konsumuar ushqim dhe vetëm marrin medikamente. 

Grevistët invalidë u shprehën se edhe pse janë në ditën e tretë nuk ka shkuar askush nga institucionet shtetërore që t`i vizitojë. Ata thonë që nuk kanë pasur ndihmë mjekësore, ndërsa të vetmit që u rrinë afër janë familjarët.

Invalidët ndihen të dëshpëruar për braktisjen që po u bëhet, ndërsa dëshpërimin e tyre e shton më tej fakti se në këto ditë festash, ata nuk kanë mundësi të jenë pranë familjeve dhe të gëzojnë si gjithë të tjerët.

Nëna e një djali invalid, bëri një denoncim duke deklaruar se KEMPI epror i ka prerë pagesën të birit duke i thënë se ai mund të ngrihet në këmbë, ndërkohë që është e kundërta.