Atentati në Lezhë! Disa të shoqëruar për vrasjen e Entjan Nikulajt, dyshohet për 3 autorë, 'gjakmarrja' pistë hetimi!

Lekastaj

LEZHË- Vendi u trondit mbrëmjen e djeshmë nga një atentat me armë zjarri në Lezhë, ku mbeti i vrarë 40-vjeçari Entjan Nikulaj. Nga dinamika e ngjarjes zbulohet se ekzekutimi i tij ka qenë i mirëorganizuar dhe autorët kanë ndjekur të njëjtën skemë për të humbur gjurmët, djegien e çdo prove që mund të zbulojë ata.

Pista kryesore e hetimit është gjakmarja, pasi kjo ngjarje i është shtuar një zinxhiri atentatesh të ndodhura ndër vite mes dy fiseve në Lezhë, Nikulajve dhe Lekstakajve. 

Entjan rezulton kushëriri i Ardian Nikulajt, ky i fundit u vra brenda lokalit të tij në Shëngjin më 19 prill të këtij viti. Ardiani u ekzekutua nga portugezi Ruben Saraiva pasi u financua dhe u porosit nga Edmond Haxhia i cili ishte kthyer nga Britania, aty ku jetonte. Haxhia është kushëri i Lekstakajve, konkretisht djali i dajës së Elton Lekstakaj. 

Por si nisi konflikti mes fiseve?

Fisi Lekstakaj dhe fisi Nikulaj ishin në gjakmarrje që prej vitit 1996. Historia e përplasjes mes fiseve në fjalë, ka nisur që para 27 viteve, në një karburant në dalje të qytetit të Lezhës për 10 mijë lekë të vjetra.

Asokohe, vëllai i Ardian Nikulaj bashkë me një person tjetër ishin shitës në karburantin në fjalë dhe një nga pjesëtarët e familjes Lekstakaj po furnizonte makinën dhe pas kësaj, shitësit kanë debatuar me drejtuesin e mjetit me pretendimin se nuk kishte bërë pagesën prej 10 mijë lekësh të vjetra të furnizimit me karburant.

Në debat e sipër, drejtuesi i mjetit është larguar për pak çaste, duke u rikthyer në karburant i armatosur dhe ka qëlluar në drejtim të dy punonjësve duke i lënë të vdekur në vend mes të cilëve dhe vëllain e Ardian Nikulaj.

Kjo ngjarje ishte dhe zanafilla e hasmërisë së fiseve Lekstakaj dhe Nikulaj, e cila pas disa muajsh të po atij viti, do të vijonte me vrasjen e Gëzim Lekstakaj dhe Laurent Gjetja, ky i fundit nip i familjes. Ndërkohë në vitin 1999 u vra Gjovalin Lekstakaj dhe u plagos rëndë Pjetër Lekstakaj./Dosja.al 

Makina

LEZHË- Detaje të reja janë zbardhur për atentatin në Lezhë mbrëmjen e djeshme, ku u shënjestrua dhe u vra 40-vjeçari Entjan Nikulaj. Pasi kanë kryer vrasjen, autorët janë larguar nga vendi i ngjarjes me një automjet tip BMW ngjyrë gri, e cila rezulton të jetë me targa të vjedhura.

Mësohet se automjeti me targa AB138HT rezulton i vjedhur më 29 nëntor në Tiranë. Pas vrasjes, autorët i kanë vënë zjarrin automjetit në rrugën e Rinasit në vendin e quajtur “Ura e Tubit” në fshatin Larushk. Makinës i është vënë zjarri në vendin ku u vra Admir Murataj dhe brenda saj janë gjetur të paktën një armë zjarri kallashnikov. 

Vrasja e Admir Murataj

Admir Murataj ka pasur mbi 10 identitete por identiteti i tij i vërtetë është Admir Nikaj. Ai ishte nga Tropoja. Admir Murataj mbeti i vrarë në aeroportin e Rinasit, gjatës grabitjes spektakolare të ndodhur mesditën e 9 prillit të vitit 2019, ku u morën 4.6 milionë euro. Grabitja u krye me një furgon pa targa mbi të cilin shkruhej “Hetimi Tatimor”, por gjatë largimit me paratë, grupi u përplas me efektivët e policisë dhe Murataj mbeti i vrarë. Në këtë grabitje, Murataj kishte zgjedhur të dukej si një efektiv policie nga Fushë Kruja dhe përmes një maskimi të posaçëm, ishte shndërruar në një qeros me syze të zeza dhe mjekër katrore. Deri më tani, Gjykata e Posaçme vendosi të dënonte me 122 vite burg të 7 të pandehurit, ndërsa në kërkim vijon të mbetet Talo Çela. Paratë nuk janë gjetur ende.  

Viktima

LEZHË- Disa persona janë shoqëruar nga policia në Lezhë ku do të merren në pyetje lidhur me vrasje e Entjan Nikulajt mbrëmjen e djeshme në Lezhë, ndrësa në cilësinë e provës materiale janë sekuestruar 25 gëzhoja automatiku. 

Ngjarja ndodhi mbrëmjen e djeshme rreth orës 21:30 në aksin Lezhë-Shkodër, në vendin e quajtur 'Ura e Trenit'. Persona të paidentifikuar kanë qëlluar me kallashnikov drejt Entjan Nikulajt, kushëririt të Ardian Nikulajt. Ky i fundit u vra brenda lokalit të tij në Shëngjin më 19 prill të këtij viti. Autorët e atentatit janë ende në kërkim. Entjan Nikulaj ndërroi jetë në spitalin rajonal të Lezhës. Raportohet se autorët e atentatit janë larguar nga vendngjarja me një BMë me targa të cilat ishin vjedhur në Tiranë. Një makinë e djegur është gjetur në Rinas, ku dyshohet se i përket autorëve të vrasjes së 40-vjeçarit. Ende nuk dihen shkaqet e vrasjes, ndonëse dyshohet se motivi është gjakmarrja.