"Institucion thashethemesh", debate në Komisionin e Sigurisë Kombëtare, kryetarja e SHISH: Shërbimet serbe dhe ruse, qëndrime armiqësore ndaj nesh!

Vlora Hyseni

TIRANË- Drejtoresha e SHISH-it, Vlora Hyseni, ka raportuar sot në komisionin e Sigurisë. Ajo u shpreh se ka pasur akuza të pabaza kundrejt SHISH, ndërsa ka shtuar se nuk ka takime të dyshimta të drejtorit të Shërbimit.

Hyseni u shpreh se është rritur bashkëpunimi me Prokurorinë e Posaçme dhe Byronë Kombëtare të Hetimit. Kreu i SHISH ka folur edhe në lidhje me aktivitetet e shërbimeve ruse dhe serbe, të cilat ipas saj kanë qëndrim armiqësor ndaj vendit tonë.

"Kemi rritur bashkëpunim dhe mbështetjen informative për agjencitë ligjzbatuese referuar kompetencës së tyre lëndore, si më SPAK, BKH, Drejtorinë e Përgjithshme të Policisë së Shtetit, Prokurorinë e Përgjithshme dhe institucione të tjera. Referuar bashkëpunimit dhe informacionit të SHISH janë realizuar kundërvënie konkrete ndaj veprimtarive të jashtëligjshme si brenda dhe jashtë vendit. Kryesisht jemi fokusuar në operacione që kanë të bëjnë me krimin e organizuar, antiterrorin, spiunazhin, ku përfshihet kundërvënia ndaj aktiviteteve të shërbimeve të inteligjencës ruse, serbe dhe shteteve të tjera, me qëllime armiqësore në raport me Shqipërinë," tha Hyseni

Ndërkohë ka pasur “përplasje” mes saj dhe deputetëve të opozitës.

“Jeni këtu bazuar në përcaktimin që ju jep Kushtetuta si krye e SHISH apo në bazë të përcaktimit që ju ka bërë kryeministri më 5 shtator 2023 duke ju quajtur si kryedispeçer e Shërbimit Shtetëror të Thashethemeve”, u shpreh deputeti i PD, Ferdinant Xhaferri.

ervin salinji

TIRANË- Mbledhja e Komisionit për Sigurinë Kombëtare vijon me dyer të mbyllura, ku po raporton drejtuesja e SHISH Vlora Hyseni. Në mbledhje nuk kanë munguar edhe debatet mes deputetëve të opozitës dhe kreut të komisionit, Nasip Naços. 

Deputeti Ervin Salianji tha se në këtë komision, drejtuesit e institucioneve të cilët paraqiten për të raportuar, trajtohen sikur të jenë pronë e mazhorancës.

“U bë e disata herë, sepse e dini nuk e keni vetëm këtu, e keni personal shtetin, e keni ves të drejtimit në çdo institucion që trajtoni drejtuesit e institucioneve sikur janë pronë tuaja, sikur institucioni është në pronësi tuaj dhe sikur bëni ç’të doni, dhe e katra sikur po bëni nder e po i jepni ndonjë të drejtë deputeteve. Institucionet janë këtu për të raportuar me vonesë në këtë rast, për herë të parë pas shumë kohës, nuk e kam vetëm me drejtuesen e SHISH. Kush jeni ju që përcaktokeni certifikatë sigurie apo jo. A e prishët mbledhjen e parë se nuk ka certifikatë sigurie? Se sot thoni nuk ka. Apo ligji është siç e interpretoni ju?

A ka mundësi t’u thoni personave që nuk zbatojnë ligjin dhe pastaj hyjnë njerëzit e marrin të dhënat e TIMS, këta të DSIK-së të pajisin deputetët me certifikata sigurie. Kanë tre muaj që i kanë plotësuar dhe nuk marrin përgjigje. Bëni punën tuaj insitucionalisht që mos vini drejtuesit e institucioneve pa përgjegjësisë nëse duhet thënë diçka apo jo. Ose bëjmë mbledhje ose mos të tallemi sikur po bëjmë nder. Çfarë jeni ju pronar jeni këtu?”, u shpreh ai.

Më herët u zhvillua një tjetër debat kësaj here mes Naços dhe deputetit demokrat Flamur Noka. Ky i fundit akuzoi drejtuesin e komisionit se po kryen krim politik duke penguar anëtarët e opozitës t'i drejtojnë pyetje kreut të SHISH, Vlora Hysenit.

flamur noka

TIRANË- Sekretari i Përgjithshëm i PD-së, Flamur Noka gjatë seancës dëgjimore të Shërbimit Informativ Shtetëror për vitin 2023, në Komisionin për Sigurinë Kombëtare, ka shprehur kritika për kryetarin e Komisionit, Nasip Naçon. Noka tha se ai po pengon opozitën të drejtojë pyetjet duke i kërcënuar se do të vijojë pa transparencë, por me dyer të mbyllura.

Deputeti i PD-së teksa rikujtoi shprehjen e Edi Ramës se "SHISH është institucion thashethemesh", e cilësoi një gabim të rëndë politik pengimin e opozitës për të drejtuar pyetje.

"Çfarë përfaqëson zonja, Shërbimin Informativ të Shtetit apo institucionin e thashethemeve siç e ka cilësuar kryeministri. Kjo është një pyetje korrekte dhe zonja duhet të përgjigjet. Z. Kryetar. Ju bëtë një gabim shumë të madh dhe shumë të rëndë politik. Ju na kërcënuat se nëse nuk do të bëjmë pyetjet që kërkoni ju, ju do ta mbyllni Komisionin për mediat. Pra, ju kërcënoni deputetët se në rast se nëse nuk bëhet pyetje që do ‘Lartmadhëria e tij - Sulltan Surreli’, do të ndërpritet e drejta e fjalës së lirë të deputetëve. Kjo që sapo thatë është një krim i rëndë dhe nëse e përsërit do e ndjekim këtë çështje. Nuk mund të kërcënosh kurrë deputetët e opozitës dhe nuk mund t'u kërkosh kurrë t'u ndërpresësh të drejtën dhe lirinë e fjalës deputetëve", tha Noka.

Ai tha më tej se kupola e Policisë së Shtetit është e zhytur në krim, drogë dhe korrupsion. "Sot policia e shtetit ka një narko-kupolë dhe i ka dhënë damkë policisë si narko-polici", tha Sekretari i Përgjithshëm Flamur Noka.