Mbështesim Kosovën, qytetarët shqiptarë protestë para Kryeministrisë: Rama të bojkotojë Serbinë, na jepni armët se e mbrojmë ne Mitrovicën

Sazan Guri

TIRANË- Aktivisti Sazan Guri i është bashkuar protestës së qytetarëve shqiptarë në në mbështetje të Kosovës. Guri për Panorama TV tha se kryeministri Edi Rama duhet të bashkohet me homologun Albin Kurti, dhe ta mbështesë Kosovën pasi kjo e fundit është gati në gjendje lufte. Po ashtu Guri theksoi se Serbia duhet të njohë kufijtë e Dardanisë.

“Si mos bashkohesh vëllezërve tanë që janë gati në gjendje lufte, jo për faj të tyre dhe sot kërkojnë ti ndodhemi pranë. Qytetarët e Kosovës janë duke kërkuar të drejtat e tyre, dhe ngrihen ca turma serbe që boll i kanë kërcënuar dhe dhunuar. Kërkojmë kufijtë e Dardanisë. I them kryeministrit Rama, që si dy marrëdhënie vëllezërish duhet të ulet dhe të bisedojë me Kurti, s’mund të ketë kurrë minishengen pa qenë vëllai jonë dhe të njihet republika e Dardanisë. Kosova kërkon të drejta të barabarta, si kërkon Serbia elementë shtetërorë pa njohur Kosovën. Pse duhet ta lejojmë ne këtë. Shqipëria duhet ti japë mbështetje morale, me vëllain duhet të ulesh këmbë kryq dhe të ndash hallet. Jemi për të mbështetur  Kurtin, sepse ka të drejtë. Ne zbatojmë atë që na ka mësuar SHBA drejtësi dhe krenari. Ne vijmë për ti dhënë zemër në atë që ka”, tha ai.

Qytetaret

TIRANË- Qytetarët sot kanë dalë në protestë para kryeministrisë duke kundërshtuar qëndrimin që qeveria shqiptare po mban ndaj Kosovës. Një prej qytetarëve u shpreh për Panorama TV se Rama duhet të dalë hapur dhe të thotë nëse është më popullin e Kosovës apo me serbët.

“Unë kam një thirrje për kryeministrin, SHBA dhe BE: Jepuni shqiptarëve dhe kosovarëve armët siç i ka dhënë rusi dhe kinezi Serbisë dhe ti marrin ushtarët e EULEX dhe ata që rrihen si gomerë në veri. E mbrojmë vetë Kosovën. Nëse Kosova ishte nën pushtimin serbo sllav tani kërkojnë ta kenë nën pushtimin evropian dhe amerikan. Rama të mos bëjë strucin në rërë, të dalë dhe të thotë është më vëllezërit kosovarë apo me serbët. Kosovarët janë në trevat e tyre shekullore. Të na japin armët dhe ne e mbrojmë vetëm Mitrovicën”, tha qytetari.

Qytetaret

TIRANË- Qindra qytetarë kanë dalë në protestë ditën e sotme para kryeministrisë në mbrojtje të Kosovës. Qytetarët i kanë bërë thirrje kryeministrit Edi Rama që të mbështesë qeverinë Kurti pa asnjë kusht, ndërkohë që i kanë kërkuar të shkëpusë marrëdhëniet me sllavvët gjithashtu.  

“I lutem kryeministrit shqiptar të mbështesë pa kushte Albin Kurtin, o sot o kurrë. Ne me sllavët po të njëjtin problem kemi. I lutemi kryeministrit të shkëputet nga marrëdhëniet me sllavët, të mbështesë qeverinë e Kosovës pa kushte. Duhet ta mbështesë Albin Kurtin”, tha një qytetar për Panorama TV.

TIRANË- Protesta para kryeministrisë ka nisur në mbështetje të Kosovës. Qytetarë të shumtë janë mbledhur para kryeministrisë dhe njëzëri kanë bërë thirrje për lirim të menjëhershëm të tre policëve të rrëmbyer nga Serbia.   

Më fjalët "As Jug as Veri, Mitrovica është Shqipëri", ata i kanë bërë thirrje qeverisë që të mbështes Kosovën dhe të mos e lërë vetëm. Kjo protestë ka ardhur edhe pas bojkotimit të mbledhjes së përbashkët Shqipëri-Kosovë, e cila u anulua nga kryeministri Edi Rama disa ora para se të mbahej. 

TIRANË- Protesta e paralajmëruar nga qytetarët në rrjetet sociale ka nisur para kryeministisë ditën e sotme. Qytetarë të shumtë me flamuj të Shqipërisë, Kosovës dhe të UÇK-së kanë dalë para kryeministisë në mbështetje të Kosovës, pas tensioneve në veri të saj.

Siç shihet dhe nga fotot e mëposhtme, qindra shqiptarë janë mbledhur dhe kanë kërkuar lirimin e e policëve të rrëmbyer nga Serbia. Kjo protestë ka ardhur edhe pas bojkotimit të mbledhjes së përbashkët Shqipëri-Kosovë, e cila u anulua nga kryeministri Edi Rama disa ora para se të mbahej.