“Përmirëso gjuhën”, Bullgaria përplaset me Ramën, kryeministri: Hiqni veton ose më duroni

Edi Rama

TIRANË- Kryeministri Edi Rama ka vijuar replikat me ministrinë e jashtme të Bullgarisë. Në një tjetër postim në rrjetet sociale, Rama shkruan se i është dashur vetëm një telefonatë me liderin e Opozitës në Bullgari, ish-kryeministrin Boyko Borissov për të zgjidhur çështjen e minoritetit bullgar. Referuar debatit për veton ndaj Maqedonisë së Veriut që bllokon dhe integrimin e Shqipërisë në BE, Rama shkruan se miqtë e vërtetë nuk e dëmtojnë njëri-tjetrin, po i japin dorën.

“Dhe meqë ra fjala, më lejoni t'ju kujtoj të dashur miq bullgarë se u desh një telefonatë e shkurtër me Boyko Borissov për të zgjidhur miqësisht dhe sinqerisht çështjen e minoritetit bullgar në Shqipëri! Miqtë e vërtetë nuk e dëmtojnë njëri-tjetrin, por flasin me të vërtetë me njëri-tjetrin dhe i japin dorën!”- shkruan Rama.

Ç’ka ndodhur mes Ramës dhe Bullgarisë?

Kryeministri Edi Rama e konsideroi një turp mos heqjen e vetos së Bullgarisë ndaj Maqedonisë së Veriut. Nga Brukseli ku mori pjesë në Samitin me Bashkimin Evropian, Rama tha se Bullgaria ka marrë peng dy vende të NATO-s ndërsa 26 vendet e tjera të BE-së vetëm vëzhgojnë pasi janë ‘impotentë’ për të vepruar. Një ditë më pas, Ministria e Jashtme e Bullgarisë ju përgjigj me kritika Ramës duke i kërkuar që të ndryshojë mënyrën e të folurit dhe të mos vijojë me ofendime. Por, Rama nuk ndalet. Në një tjetër reagim, kryeministri shkruan se Bullgaria ose duhet të heqë veton, ose duhet të durojë mënyrën sesi ai i drejtohet.

Edi Rama

TIRANË- Kryeministri Edi Rama i është përgjigjur Ministrisë së Jashtme të Bullgarisë që e kritikoi për gjuhën e përdorur në Samit. Në një postim në rrjetet sociale, Rama shkruan se është mjaft e drejtë që Bullgaria ta ketë problem faktin që ai u thotë se duhet të kenë turp që po marrin peng Maqedoninë e Veriut e Shqipërinë.

Por, kryeministri shton se edhe ai e ka shumë problem mënyrën se si Bullgaria dëshiron të zgjidhë çështjet biletarale duke përdorur procesin e zgjerimit në BE. Ndaj, e mbyll me ultimatum dhe i kërkon Bullgarisë të heqë Veton ndaj Maqedonisë së Veriut ose të durojnë mënyrën se si ai flet.

"Oh! Ministria e Jashtme e Bullgarisë ka një problem me mënyrën time të të folurit! Mjaft e drejtë. Edhe unë kam një problem me mënyrën se si Bullgaria dëshiron të zgjidhë çështjet biletarale duke përdorur procesin e zgjerimit si mjet për rrëmbimin e dy vendeve të NATO-s! Me qetësi miq: Hiqni VETO-n ose më duroni mua!"- shkruan Rama.

Më herët, Ministria e Jashtme e Bullgarisë i bëri thirrje kryeministrit Edi Rama që të përmirësojë mënyrën e të shprehurit duke iu përshtatur një vendi që synon integrimin në Bashkimin Evropian. Reagimi i Bullgarisë erdhi pas kritikave të forta që bëri Rama në Samitin e Brukselit ku e konsideroi një turp faktin që Bullgaria nuk e heq veton ndaj Maqedonisë së Veriut dhe bllokon rrugën e integrimit të Shqipërisë në BE. 

Edi Rama

BULLGARI- Ministrja e Jashtme e Bullgarisë i ka bërë thirrje kryeministrit Edi Rama që të ndryshojë mënyrën e të shprehurit referuar kritikave e akuzave që bëri një ditë më parë në Samitin e Brukselit. Në një reagim në faqen zyrtare, Ministria e Jashtme Bullgare shkruan se nuk është ehra e parë që dëgjon fyerje të tilla, por që Rama duhet të flasë me një gjuhë që i përshtatet kreut të qeverisë së një vendi që kërkon të anëtarësohet në BE. 

Reagimi zyrtar:

Bullgaria ka qenë gjithmonë ndër ato shtete anëtare të Bashkimit Evropian që mbështesin përkatësinë evropiane të popullit shqiptar. Ne kemi mbrojtur perspektivën evropiane të Shqipërisë dhe fillimin e negociatave për anëtarësim në BE, edhe kur ishte shumë më e vështirë se sot. Ndër vite nuk ka pasur shumë zëra të tjerë me ne në këtë kauzë. Ne e mbrojmë atë sot, pavarësisht gjithçkaje, në emër të një të ardhmeje të përbashkët evropiane. Si kundërpërgjigje, nuk është hera e parë që dëgjojmë komunikime të paprovokuara të ashpra, fyese nga një kryetar qeverie. Presim që kryeministri shqiptar t’i përshtatë mjetet e tij shprehëse në një gjuhë që i përshtatet një politikani të një vendi kandidat për anëtarësim në BE. Në këtë nivel, më shumë se çdo tjetër, ne insistojmë të mbajmë një ton të mirë komunikimi. Në këtë nivel ne kemi treguar gjithmonë gjithë respektin që kërkon një pozicion të përgjegjshëm dhe nivel të marrëdhënieve ndërshtetërore. Ne kemi një të ardhme të përbashkët me Shqipërinë. Politikanët po largohen. Kombet mbeten. Popujt tanë kanë një interes të përbashkët, i cili nuk duhet të cenohet nga një gjykim i gabuar i politikanit. Është e papranueshme që marrëdhëniet mes shteteve të bëhen peng i ekscentricitetit të kryeministrit aktual shqiptar.

Reagimi i Bullgarisë erdhi pas kritikave të forta që bëri Rama në Samitin e Brukselit ku e konsideroi një turp faktin që Bullgaria nuk e heq veton ndaj Maqedonisë së Veriut dhe bllokon rrugën e integrimit të Shqipërisë në BE.