Propozimi francez – Deputetët e RMV presin dokumentet nga Qeveria, paralajmërohen sërish protesta

Jovan Mitreski

MAQEDONIA E VERIUT- Koordinatori i grupit parlamentar të LSDM-së Jovan Mitreski tha se materialet në lidhje me propozimin francez do t’iu dorëzohen deputetëve përmes kryetarit të Kuvendit.

“Nëse këto materiale nuk janë të kapshme, atëherë çka kemi bërë ne 3-4 orë, në bazë të cilave dokumente kemi biseduar. Në bazë të cilave dokumente krijohet përshtypja ose në bazë të cilave dokumente mbahen konferencat për media nga ana e partisë opozitare, kështu që për këtë edhe një herë këtë mund ta quaj vetëm folklor politik”, tha Mitreski.

Sa i përket asaj nëse do të mbahet takim i ri i grupit të punës së partive politike kuvendore në lidhje me propozim-kornizën negociuese, Mitreski informoi se ideja në takimin e parë ishte që të dakordohen konkluzionet sa i përket Informacionit dhe pas përfundimit të diskutimit për të, ato konkluzione të jenë mjet i votimit.

Ai shtoi se me ato propozim-konkulzione do të hiqen të gjitha dilemat në publik, në pjesën e gjuhës, edhe pse është i pastër, edhe për pjesën e historisë, çështjet bilaterale, për arsimin, për veçantinë e popullit maqedonas, për veçantinë me të gjitha elementet e saj, për identitetin.

Në lidhje me protokollin bilateral me Bullgarinë, Mitreski potencoi se përmbajtja e tij ende nuk është dakorduar dhe një dokument i tillë nuk është nënshkruar.

“Kur do të nënshkruhet dhe kur do të dakordohet atëherë do të publikohet për të gjithë publikun dhe besoni se me këtë që tani flitet do të shihni se atëherë kur do të publikohet do të përgënjeshtrohet”, shtoi Mitreski.

Më 30 qershor, qeveria e Maqedonisë së Veriut pranoi një propozim të modifikuar nga presidenca franceze, pas së cilës filloi një proces konsultimi, fillimisht me qeverinë dhe partnerët e koalicionit, e më pas me presidentin, parlamentin, opozitën, si dhe me sektorin civil. Kryeministri i Maqedonisë së Veriut, Dimitar Kovaçevski, deklaroi se propozimi i modifikuar përfshin vërejtjet dhe qëndrimet e konstruktuara qartë të palës maqedonase, parasheh një pranim të qartë dhe pa mëdyshje të gjuhës maqedonase, si dhe atë që protokolli me Bullgarinë të mos jetë pjesë e kornizës negociuese.Presidenti francez, Emmanuel Macron, presidenca e të cilit hartoi propozimin, beson se me propozimin është gjetur një zgjidhje kompromisi për të dyja palët.Propozimi francez është një dokument që duhet të çojë në heqjen e vetos 2-vjeçare të Bullgarisë për integrimin e Maqedonisë së Veriut në BE.

Kuvendi i Maqedonise se Veriut

MAQEDONIA E VERIUT- Deputetët do të marrin edhe dokumentet të cilat qeveria tashmë i ka publikuar e që kanë të bëjnë me informacionin për përmbajtjen e propozimit francez.

Vendimi u mor gjatë koordinimit të zakonshëm të së hënës në Kuvend pasi për opozitën, vetëm informacioni prej një flete ishte i pamjaftueshëm.

Protokolli mes Shkupit dhe Sofjes është i vetmi nga katër dokumentet e pakos të cilin nuk do ta marrin as deputetët dhe deri tek i cili nuk ka qasje akoma as opinion.

VMRO-DPMNE-ja kërkon debat më të gjerë në Kuvend.

“Kërkojmë urgjentisht të dorëzohet protokolli mes Maqedonisë dhe Bullgarisë i cili paraqet dokumentin më të rëndësishëm në këtë proces dhe i cili është kyç për t’u diskutuar rregullat e lojës mes dy vendeve në periudhën e ardhshme. Po ashtu, Kuvendi duhet të jetë i gatshëm t’i dëgjojë reagimet e qytetarëve, ekspertëve, sektorit civil dhe palëve të përfshira dhe të organizojë debat dhe shqyrtim të këtij propozimi”, tha Nikolla Micevski, koordinator i grupit parlamentar të VMRO-DPMNE-së.

Por për shumicën, nuk ka arsye për t’u pritur më shumë.

“Kur të vlerësojë kryetari i Kuvendit, në korniza të Rregullores por nuk ka nevojë për të pritur, nuk shoh arsye. Meqë diskutojmë çdo ditë për këtë çështje nuk e shoh kontestuese që të diskutohet edhe në institucionin ligjvënës. Protokolli nuk është finalizuar. Si të shpërndahet me opinionin diçka që nuk është finalizuar dhe nuk është firmosur?”, u shpreh Arbër Ademi, koordinator i grupit parlamentar BDI-së.

VMRO-DPMNE-ja nuk sheh më arsye që të vazhdojnë bisedimet e grupeve të punës për propozimin francez dhe përpilimin e propozim-konkluzioneve të Kuvendit. Por, shumica është e hapur edhe nëse opozita maqedonase ndryshon mendim.

“Sa i takon pyetjes a do të vazhdojnë ata negociata, ja e them hapur se ne jemi të gatshëm edhe sot, nesër ose kurdo që të vendosin deputetët e opozitës të bisedojmë për propozim-konkluzionet. Me ata propozim-konkluzione do t’i heqim të gjitha dilemat në opinion, edhe për gjuhën, edhe për historinë, edhe për çështjet bilaterale, arsimin, për veçantinë e popullit maqedonas me të gjitha elementet e tij”, theksoi Jovan Mitreski, koordinator i grupit parlamentar të LSDM-së.

Seanca plenare nuk është caktuar akoma por mund të caktohet në cilindo moment që të vendosë kreu i Kuvendit.