RIKTHEHEN zjarret në Shqipëri! Digjen 70 ha kashtë në Maliq, jashtë kontrollit flakët në malin e Gjallicës: Duhet ndërhyrje nga ajri!

Foto ilustruese

KORÇË- Dy vatra zjarri janë izoluar në fushën e Maliqit, por "lufta" ndaj flakëve do të vazhdojë edhe gjatë natës. Deri më tani zjarri në Maliq ka përfshirë rreth 70 hektarë kashtë.

Maliq

MALIQ- Riaktivizohen vatrat e zjarrit në zonën e fushës së Maliqit, ku deri më tani zjarri që ka përfshirë rreth 70 hektarë kashtë. Për shuarjen e flakëve në terren kanë shkuar 3 mjete të shërbimit zjarrfikës të bashkisë së Maliqit që si fillim kanë izoluar zjarrin.

Por aktualisht duket se e kanë të vështirë pasi zjarri favorizohet nga era. 

Pamje nga mali i Gjallicës

KUKËS- Alarm në Kukës për zjarrin që është riaktivizuar në malin e Gjallicës. Zjarri, pasi u shua më 25 korrik, u aktivizua gjatë ditës së djeshme, ka qenë një vatër, ndërsa sot janë krijuar edhe katër të tjera.

Si pasojë, është djegur një sipërfaqe e madhe me pishë dhe bredha, ndërsa autoritetet lokale të zjarrfikësve kërkojnë ndihmë nga ajri. Sipas tyre, ndërhyrja nga toka është thuajse e pamundur për shkak të terrenit të vështirë që e bën të pamundur ndërhyrjen me automjete.

Foto Ilustruese

GJIROKASTËR- Një person është arrestuar në Gjirokastër ditën e sotme për zjarrvinie. Në pranga ka rënë Nonda Andoni, i cili ndezi zjarr me pajisjen e bletëve, por për shkak të teperaturave të larta zjari u përhap duke djegur sipërfaqe e madhe toke me barishte dhe pisha. Andoni dyshohet ka djegur vendin e quajtur “Kodra e fshatit Arshi Lengo”.

Njoftimi i Policisë:

GJIROKASTËR Ndezi zjarr me pajisjen e bletëve (tymësen), si pasojë e përhapjes së flakëve u dogj një sipërfaqe e madhe toke me barishte dhe pisha, Policia identifikon, kap dhe vë në pranga autorin. Strukturat e Komisariatit të Policisë Gjirokastër, në zbatim të planit të masave të hartuar nga Drejtoria e Përgjithshme e Policisë së Shtetit “Për marrjen e masave me qëllim përballimin e situatave që mund të krijohen si rezultat i zjarreve në fondin pyjor e kullosor përgjatë sezonit veror 2023”, kanë ushtruar kontrolle të vazhdueshme në territor, me qëllim parandalimin e zjarrvënies, identifikimin dhe arrestimin e shtetasve që ndezin zjarre, si në tokat e tyre, ashtu edhe në sipërfaqet pyjore apo në kullota. Si rezultat i kontrolleve është evidentuar një rast i zjarrvënies, për të cilin është arrestuar në flagrancë shtetasi N. A., banues në Gjirokastër.

Ky shtetas dyshohet se në vendin e quajtur “Kodra e fshatit Arshi Lengo”, duke u kujdesur për parkun e bletëve, ka ndezur pajisjen e tyre (tymësen) dhe si pasojë është djegur një sipërfaqe e konsiderueshme toke me barishte dhe pisha. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme. Drejtoria Vendore e Policisë Gjirokastër apelon për të gjithë banorët, që në asnjë rast të mos ndezin zjarre, pasi do të përballen me ligjin. Policia fton qytetarët që të denoncojnë në numrin 112, për çdo rast të zjarrvënies apo të paligjshmërisë në tërësi, duke iu garantuar anonimatin dhe reagim të shpejtë e të paanshëm nga strukturat policore.