Marrëveshje me Kosovën? Vuçiç merr dokumentin: S'jam as i lumtur, as i trishtuar. Kurti kërkon opozitën. Vetëm Haradinaj i shkon

Haradinaj dhe Kurti

KOSOVË- Ditën e sotme kryeministri i Kosovës Albin Kurti ka zhvilluar një takim me kreun e Aleancës për Ardhmërinë e Kosovës Ramush Haradinaj.

Pas përfundimit të takimit, zyra e kryeministrit ka dhënë detaje lidhur me takimin e sotëm ku në njoftim thuhet se Kurti e Haradinaj kanë folur për procesin e dialogut, idetë, modelet dhe opsionet për elementet kryesore të marrëveshjes ndërmjet Kosovës dhe Serbisë.

“Në këtë takim përmbajtësor në të cilin Kryeministri Kurti ishte i shoqëruar nga zëvendës-kryeministri i parë, Besnik Bislimi, u diskutua për procesin e dialogut, idetë, modelet dhe opsionet për elementet kryesore të marrëveshjes ndërmjet Kosovës dhe Serbisë të cilat po qarkullojnë nga e nëpër kancelaritë perëndimore e demokratike, e që në këtë periudhë funksionojnë si sprova dhe testime”, thuhet në njoftimin e ZKM-së.

Në fund thuhet se Kurti e ka falenderuar Haradinajn për interesimin e vazhdueshëm dhe të qenurit aktiv për këtë çështje.

Ndërkohë dhe Haradinaj ka folur para gazetarëve ku është shprehur se në këtë takim me kryeministrin Albin Kurti kanë diskutuar për përmbajtjen e një marrëveshje potenciale në mes të Kosovës dhe Serbisë.

“Diskutuam procesin dhe marrëveshjen vetë, diskutuam sfidat. Ishte një takim me përmbajtje sepse kemi diskutuar përmbajtjen e një marrëveshje potenciale  Kosovë-Serbi”, ka thënë Haradinaj.

Ai shtoi se kanë diskutuar në detaje për këtë marrëveshje të mundshme duke kaluar nen për nen dhe se do të japë kontributin e tij.

“Në diskutim për krejt nenet e marrëveshjes. Preambulën për nenet. Kemi provuar të japim kontributin tonë si AAK që Kosova të arrijë sukses. Besoj se duhet të vazhdojmë më tutje me aleatët tonë, Amerikën dhe evropianët”, ka shtuar Haradinaj.

Kryeministri Kurti ditën e djeshme njoftoi se kishte ftuar krerëtr e opozitës në një takim por ka qenë vetëm Haradinaj ai që ju përgjigj pozitivisht ftesës pasi Memli Krasniqi dhe Abdixhiku e refuzuan atë.

BE

KOSOVË- Ambasadorët e vendeve të Quint-it kanë thënë të premten se në takim me presidentin e Serbisë, Aleksandar Vuçiq, i kanë shprehur shqetësimin për prishjen e mundshme të stabilitetit në rajon, para përfundimit të afatit të Qeverisë së Kosovës për riregjistrim të makinave me targa serbe në RKS, Republika e Kosovës.

Vendet e Quintit janë: Shtetet e Bashkuara, Mbretëria e Bashkuara, Italia, Franca dhe Gjermania. Afati për riregjistrim të makinave në RKS ka nisur më 1 shtator dhe përfundon më 31 tetor. Deri më tani, Qeveria e Kosovës ka thënë se afati për riregjistrim nuk do të shtyhet dhe se nga 1 nëntori nuk do të mund të qarkullojnë më makinat me targa të lëshuara nga Serbia.

Këto targa konsiderohen të paligjshme nga autoritetet në Kosovë, mirëpo deri më tani janë toleruar në veri të Kosovës.

Sipas Presidencës serbe, edhe vetë presidenti, Aleksandar Vuçiq ndan shqetësimet për tensionet e mundshme dhe ka thënë se Serbia është e përkushtuar për dialogun si “mënyrë për zgjidhjen e çështjeve të hapura”. Megjithatë, ai ka konsideruar se tensionet janë shkaktuar për shkak të lëvizjeve të njëanshme të Prishtinës.

Qeveria e Kosovës ka thënë se e ka për obligim zbatimin e ligjit, kushtetutshmërinë dhe vendimet qeveritare, kur është pyetur nga Radio Evropa e Lirë, lidhur me kërkesën e të dërguarit të Shteteve të Bashkuara për Ballkanin Perëndimor, Gabriel Escobar për shtyrje dhjetëmuajshe të afatit për riregjistrimin e makinave me targa serbe.

Esbobar ka thënë të mërkurën për televizionin lokal, Kanal 10, se këtë kërkesë për shtyrje e kanë bërë të gjitha vendet e Kuintit – Shtetet e Bashkuara, Mbretëria e Bashkuar, Franca, Gjermania dhe Italia.

“Ne jemi shtetet që e përkrahim më së shumti Kosovën. Besojmë se është e rëndësishme që kur ne bëjmë rekomandime, njerëzit t’i dëgjojnë ato", ka thënë Escobar.

Deri më tani, Qeveria e Kosovës ka thënë se afati për riregjistrim nuk do të shtyhet dhe se nga 1 nëntori nuk do të mund të qarkullojnë më makinat me targa të lëshuara nga Serbia.

Këto targa konsiderohen të paligjshme nga autoritetet në Kosovë, mirëpo deri më tani janë toleruar në veri të Kosovës.

Më 31 korrik dhe 1 gusht serbët lokalë në veri të Kosovës kanë vendosur barrikada si shenjë pakënaqësie ndaj vendimit të Qeverisë së Kosovës për zbatim të dy vendimeve: për targat e makinave dhe dokumentet serbe.

Video nga arkivi: Pse duhet të regjistrohen makinat në RKS?

Vendimi për zbatim të këtyre dy vendimeve është shtyrë për 1 shtator, edhe me kërkesë të mekanizmave ndërkombëtarë. Ndërkohë është arritur marrëveshje për dokumentet për hyrje/dalje.

Kosova dhe Serbia kanë nisur negociatat për normalizimin e marrëdhënieve më 2011, me ndërmjetësimin e Bashkimit Evropian. Procesi i negociatave pritet të përfundojë me marrëveshje ligjërisht të detyrueshme.

Ndonëse Kosova deklaron se kjo marrëveshje duhet të përfshijë njohjen e ndërsjellë, Serbia nuk pranon, duke insistuar në “zgjidhje kompromisi”./REL/

Qeveria gjermane

GJERMANI- Qeveria gjermane ka mohuar se është e përfshirë në përgatitjen e një drafti për Asociacionin e Komunave me shumicë serbe. Në një përgjigje me shkrim për Telegrafin thuhet se Qeveria e Gjermanisë nuk është e përfshirë në draftimin e statutit të Asociacionit të Komunave me Shumicë Serbe, i cili është përmendur në disa kanale të mediave të enjten.

“Qeveria Gjermane nuk është e përfshirë në draftimin e statutit të Asociacionit të Komunave me Shumicë Serbe, i cili është përmendur në disa kanale të mediave dje. Fondacioni Friedrich Ebert, në bashkëpunim me partnerët e tij punon vazhdimisht në tema të rëndësishme shoqërore-politike. Me sa jemi në dijeni ne, ky projekt i veçantë është duke vazhduar dhe rezultatet e tij do të ndahen me hisedarët dhe opinionin publik në kohën e duhur. Ambasada shprehimisht e mirëpret secilin kontribut, i cili e çon përpara dialogun publik për këtë çështje të rëndësishme. Në rast se keni pyetje të tjera, ju lutemi t’i drejtoheni Zyrës së Fondacionit Friedrich Ebert në Prishtinë”, thuhet në përgjigje.

Fondacioni Fridrich Ebert kishte përgatitur një draft të statutit të Asociacionit të komunave me shumicë serbe, por i cili nuk është finalizuar.  Të mërkurën në mediat e Kosovës ka qarkulluar një “Draft gjerman”, për Asociacionin. Drafti përmban 17 nene dhe parasheh që ky Asociacion t’i ketë 10 komuna me mundësi zgjerimi. E lidhur me këtë, zëdhënësi i Qeverisë së Kosovës, Përparim Kryeziu, ka thënë për Telegrafin se qëndrimi qeveritar për Asociacionin është i pandryshueshëm.

Memli Krasniqi, Lumir Abdixhiku dhe Ramush Haradinaj

PRISHTINË- I vetmi prej opozitarëve që do të shkojë në takimin e sotëm të thirrur nga kryeministri Albin Kurti, është kreu i Aleancës për Ardhmërinë e Kosovës, Ramush Haradinaj. Liderët e tjerë të partive opozitare, Memli Krasniqi e Lumir Abdixhiku e kanë refuzuar ftesën për takimin që do të nisë sot në orën 12.00, ndërkohë që ftesa u ishte nisur që 2 ditë më parë, menjëherë pas takimit me të dërguarin e Posaçëm të Shteteve të Bashkuara të Amerikës për Ballkanin Perëndimor, Gabriel Escobar.

Krasniqi e ka quajtur ftesën e Kurtit si joserioze, pa përmbajtje, duke refuzuar kështu pjesëmarrjen në takim dhe ka lajmëruar se nuk do të shkojë në zyrën e tij për ta takuar për çështje teknike, por vetëm kur të flitet për një marrëveshje finale mes Kosovës dhe Serbinë. 

“Vetëm pasi kërkuam sqarime, kuptuam me një fjali përmes emailit se bëhej fjalë për një temë shumë serioze – siç është Dialogu Kosovë-Serbi. Pa asnjë detaj konkret e pa specifikuar asgjë. Po jua rikujtoj që s’keni asnjë arsye që të na ftoni në takime për çështje teknike. Ndërsa, kur të ketë diskutim konkret për marrëveshjen finale, ne do të jemi aty. Ka ditë që në opinion flitet për një dokument që ju e keni në tavolinë rreth marrëveshjes për normalizimin e marrëdhënieve mes dy vendeve, të ofruar nga partnerët ndërkombëtar të Kosovës. Krasniqi ka thënë se për tema të tilla, vendi i diskutimit duhet të jetë salla e Kuvendit të Kosovës, e jo zyrat. Por, për tema të tilla, për vendime të mëdha, ju së pari duhet të bëheni serioz dhe ta kuptoni se vendi i diskutimit nuk është një zyrë, por është salla e Kuvendit të Kosovës, sepse Kuvendi i Kosovës është adresa e popullit. Prandaj, diskutimet që i keni menduar për të premten në zyrën tuaj, ju ftoj që t’i bartni në Kuvend,”- tha Krasniqi nëpërmjet një video selfie të publikuar në faqen e tij në Facebook.

Në këtë takim s’do të shkojë as Abdixhiku. Zëdhënësja e Lidhjes Demokratike të Kosovës, Sibel Halimi, ka thënë se për çështjen e dialogut, që u përfol se do të diskutohej të premten në takim, Kurti duhet të raportojë vetëm në Kuvend.

“Për temën e dialogut, Kryeministri i Kosovës duhet të raportojë vetëm në Kuvendin e Kosovës. Aty LDK do t’i ritheksojë dhe qëndrimet e saja. Ky ka qenë dhe dakordimi i liderëve nga takimi paraprak…Për LDK-në, marrëveshja finale me Serbinë duhet të bëhet vetëm rreth njohjes reciproke. Në këtë marrëveshje të njohjes, rendi kushtetues, integriteti territorial e sovraniteti i vendit janë të panegociueshme,"-deklaroi ajo.

Pas takimit, Escobar ka deklaruar se më e rëndësishme për Kosovën është anëtarësimi në NATO, si dhe njohja nga pesë shtetet mosnjohëse të BE-së. Ndërsa shtoi se njohja nga Serbia mund të vijë në një moment të dytë. Lidhur me propozimin franko-gjerman, për të cilin tha se e mbështesin plotësisht Shtetet e Bashkuara të Amerikës. Ndërsa e konsideroi çështjen e Asociacionit si një element i rëndësishëm i marrëveshjes finale. E po ashtu la edhe një lajmërim, çështja e Kosovës do të zgjidhet për javë...jo për vite. 

Aleksandër Vuçiç

BEOGRAD- Presidenti i Serbisë, Aleksandër Vuçiç, sot pritet të presë përfaqësuesit e Quinta-s, të cilët sipas spekulimeve mund t'i paraqesin planin për zgjidhjen e përshpejtuar të çështjes së Kosovës. Kështu të paktën shkruajnë mediat serbe.

Sipas informatave jo-zyrtare të këtyre mediave, ambasadorët e QUINT-it pritet të prezantojnë presidentit serb, planin për zgjidhjen e përshpejtuar të çështjes së Kosovës, apo siç njihet ndryshe skenarin e prezantuar për para-marrëveshjen Kosovë-Serbi. Një gjë të tillë në mënyrë të tërthortë e pati paralajmëruar edhe vetë Vuçiç, në një paraqitje televizive, një ditë më parë.

“Po pres të shohë se çfarë do të më dorëzojnë, sepse më thanë se kanë diçka për mua. Kur më erdhën për herë të parë përfaqësuesit e Scholz dhe Macron, sikur ta dija, nuk pranova ta marr atë letër,”- tha Vuçiç.

POR ÇFARË MENDOHET SE KA PLANI I RI:

- Afati i fundit për fazën e parë të marrëveshjes është 24 shkurti, data e përvjetorit të parë të fillimit të agresionit rus kundër Ukrainës.

- Serbia nuk do ta ndryshojë Kushtetutën

- Kosova do të duhej të fillonte formimin e ZSO-së (Asociacioni i Komunave Serbe)

- ZSO do të ishte garanci për komunitetin serb, por do të ishte pjesë e legjislacionit të Kosovës

- Njohja reciproke nuk do të ishte pjesë e kësaj faze

– Nëse arrihet një marrëveshje, “shpërblimi” është një paketë financiare

- Nëse nuk ka marrëveshje, do të ketë një “rrahje të rëndë” për palën që do të ndërhynte në prishjen e marrëveshjes. Por ky nuk është i vetmi kërcënim në planin e supozuar, por parashikohet edhe një skenar i errët, për të cilin nuk thuhet në termat më të saktë se çfarë do të sjellë: - Nëse palët refuzojnë të bien dakord, aktorët ndërkombëtarë kanë parashikuar një skenar alternativ, ku do ta merrnin procesin tërësisht në duart e tyre; - Arsyeja e urgjencës është se "një vit pas luftës në Ukrainë, vendet aleate planifikojnë të tregojnë unitet, gatishmëri dhe fuqi në mbështetje të Ukrainës".

Por nuk mbaron me kaq...

Edhe dje, mediat e Prishtinës publikuan atë që thonë se është një dokument gjerman: një draft se si do të duket Unioni i ardhshëm i Komunave Serbe me 17 pika. 

- Statusi i personit juridik për ZSO do konsiderohet si statuti si akti më i lartë juridik

- Do të përbëhet nga 10 bashki

- Ata do të kenë një stemë dhe një flamur

- Do të ketë një llogari bankare, do të jetë në gjendje të merret me transaksione financiare dhe të ketë prona

- Mbikëqyrje e plotë mbi zhvillimin ekonomik lokal, arsimin, kujdesin shëndetësor parësor dhe dytësor, mbrojtjen sociale dhe planifikimin urban dhe rural

- Do të ketë kuvend, kryetar, nënkryetar, këshill, bord dhe zyrë apeli

- Të gjitha ndryshimet dhe plotësimet në statut janë bërë në përputhje me Kushtetutën dhe ligjet e Kosovës

Çfarë thonë shqiptarët për këtë version të ri?

Kur bëhet fjalë për shqiptarët e Kosovës, zgjidhja e vetme për ta është njohja reciproke dhe respektimi i sovranitetit të Kosovës nga Serbia. Mirëpo, ata janë të zemëruar me kryeministrin e Prishtinës, Albin Kurti i cili, siç thonë ata, nuk është transparent dhe të cilin e akuzojnë për prishjen e lidhjeve të tyre me SHBA-në.

Ndërkaq, Kurti ka caktuar për sot një takim me përfaqësuesit e partive parlamentare në Kuvendin e Prishtinës, për t'i informuar për bisedimet që ka pasur me të dërguarin amerikan Gabriel Escobar, si dhe për çështje të tjera që kanë të bëjnë me dialogun në mes të Beogradit dhe Prishtinës. Mirëpo deri më tani i është përgjigjur vetëm Ramush Haradinaj./Blic