Turi në rajon/ Hasani: Autorët e sulmit të Banjskës të mbajnë përgjegjësi, garancia për sovranitetin e Kosovës është NATO

Igli Hasani dhe Vjosa Osmani

KOSOVA- Presidentja e Kosovës, Vjosa Osmani, priti sot në takim ministrin për Europën dhe Punët e Jashtme të Shqipërisë, Igli Hasanin, ku së bashku biseduan rreth zhvillimeve të fundit politike dhe të sigurisë, por edhe rreth nevoja për koordinimin e vazhdueshëm ndërshtetëror në politikën e jashtme.

Presidentja ka theksuar se Kosova ka nevojë edhe më tej për mbështetjen e Shqipërisë në arenën ndërkombëtare, sidomos në organizatat në të cilat nuk është e përfaqësuar.

“Përtej lidhjes historike e partneritetit strategjik, Kosova dhe Shqipëria duhet të kenë synime të përbashkëta dhe strategji të harmonizuara në interes të dy shteteve”, mësohet të ketë thënë Osmani.

Po ashtu ajo ka thënë se forcimi i shtetit të Kosovës dhe konsolidimi i pozicionit ndërkombëtar është synim i vazhdueshëm, i cili ka nevojë edhe për mbështetjen e Shqipërisë.

“Pozita e Kosovës në arenën ndërkombëtare ka nevojë për kontribut të vazhdueshëm të politikës së jashtme të Shqipërisë”, është Osmani duke theksuar se për Kosovën, Shqipëria është jo vetëm një partner strategjik, por edhe shtet me të cilin ka lidhje vëllazërore, kulturore e kombëtare.

Gjithashtu në takim u diskutua edhe për koordinimin për çështjen e njohjeve të reja, përfshirjen në Partneritetin për Paqe si një hap paraprirës i anëtarësimit në NATO, por edhe në organizata të tjera ndërkombëtare. Sipas Osmanit, zhvillimet e fundit në veriun e Kosovës dhe veprimet armiqësore të Serbisë dhe lidershipit të saj kërkojnë angazhim dhe vëmendje të shtuar të faktorit ndërkombëtar por edhe të vendeve të rajonit në funksion të ruajtjes së paqes dhe stabilitetit.

igli hasani

KOSOVË- Ministri i Jashtëm, Igli Hasani në konferencën e përbashkët me homologen e tij, Donika Gërvalla foli për tensionet mes Kosovës dhe Serbisë. Ai tha se është qesharake që në shekullin e 21 të çohet ushtria fqinjit në kufi.

Ministri gjithashtu u shpreh se garancia më e madhe për integritein dhe sovranitetin e Kosovës është NATO, ku edhe Shqipëria është pjesë.

"Kosova ka një aleat të përjetshëm, të padiskutueshëm që është Shqipëria. Në çdo moment, në të mirë dhe të keqe, Shqipëria do të jetë këtu pranë Prishtinës dhe shqiptarëve të Kosovës. Ne i ndjekim, me vëmendje zhvillimet në rajon, në Kosovë. Bëjmë thirrje të gjitha aktorëve dhe faktorëve që jetojnë në shek 21, nuk i cojnë ushtrisë fqinjit më tek kufiri por askush nuk duhet ta vazhdojë më këtë lojën qesharake sepse garancia më e madhe për integritein dhe sovranitetin e Kosovës është NATO, ku edhe Shqipëria është pjesë”, tha Hasani.

pamje nga konferenca

KOSOVË- Ministri i Jashtëm i Shqipërisë, Igli Hasani ka nisur turin tre ditor në rajon, ku vizita e parë ka qenë në Kosovë. 

Pas takimit me homologen e tij ata kanë mbajtur një konferencë të përbashkët për mediat, ku Hasani tha se autorët dhe organizatorët e sulmit të Banjskës duhet të mbajnë përgjegjësi. Ai gjithashtu tha anëtarësimi i Kosovës në NATO është një nga prioritetet e qeverisë shqiptare.

"Ky sulm është një akt i rrezikshëm dhe kriminal. Sulmi ishte një kërcënim i rëndë për sigurinë dhe stabilitetin. Autorët dhe organizatorët duhet të mbajnë përgjegjësi. Me ministren pata mundësi te diskutojmë për idetë se si do e çojmë përpara agjendën e përbashkët për anëtarësimin e Kosovës në organizata ndërkombëtare, ne NATO. Anëtarësimi i Kosovës në NATO eshtë prioritet për qeverinë shqiptare. Jemi te gatshëm të ndihmojmë Kosovën në procesin e integrimit.", tha ministri. 

Gërvalla u shpreh se gjatë takimit me homologun Hasani, ata folën për ruajtjen e paqes dhe stabilitetit në rajon, ku sipas saj Shqipëria do të luajë rol proaktiv në të gjithë çështjet e sigurisë me pozitat që ka në arenën ndërkombëtare. Sipas saj tentativat për destabilizimin e Kosovës do të vijojnë edhe në vitin 2024 nga krimi i organizuar dhe strukturat nga Serbia. Sakaq, ajo zbuloi se ka ndarë me ministrin Hasani eksperiencën e Kosovës në zhvillimin e votës së diasporës.

“Për paqen dhe stabilitetin në rajonin tonë bashkësia ndërkombëtare duhet të ndëshkojë tentativat për destabilizim. E falënderova kolegun Hasani për pjesëmarrjen në varrimin e heroit të fundit Afrim Bunjaku. Sulmi i natës së fundit ka dëshmuar se në veri çështja e sigurisë është serioze. Duhet të jemi vigjilentë pasi krimi i organizuar me strukturat e ardhura nga Serbia do vijojnë destabilizimin e vendit tonë edhe në vitin 2024. Me pozicionin e saj gjithnjë e më të fuqishëm në arenën ndërkombëtare, republika e Shqipërisë do luajë rol proaktiv në të gjithë çështjet e sigurisë tonë. U pajtuam për një organizim më gjithëpërfshirës për ruajtjen e kulturës dhe identitetit tonë në mërgim. Me ministrin Hasani kam ndarë eksperiencën e Kosovës për realizimin e zgjedhjeve jashtë shtetit që emigrantët tanë të bëhen pjesë e proceseve politike në vend”, u shpreh ajo mes të tjerash.

igli hasani

KOSOVË- Ministri për Europën dhe Punët e Jashtme të Shqipërisë, Igli Hasani ka nisur sot turin tre ditor në rajon, ku do të vizitojë fillimisht Kosovën.

Gjatë ditës së sotme ai do të zhvillojë takime me liderët politikë në Kosovë, përfshirë homologen e tij Donika Gërvalla, Presidenten Vjosa Osmani, dhe krerët e partive politike.

Ndërsa takimi me kryeministrin Albin Kurti nuk është i mundur pasi ai ndodhet ne Davos për forumin ekonomik

AXHENDA:

09:00 Takim me Zëvendës Kryeministren dhe Ministres e Punët të Jashtme dhe Diasporës, znj. Donika Gërvalla

10:00-Konferencë për shtyp e ministrave Hasani dhe Gërvalla

10:25 – Takim me Presidenten e Republikës së Kosovës Sh.S. Vjosa Osmani Sadriu

11:15- Takim me Kryetarin e Kuvendit të Kosovës Sh.T. Glauk Konjufca

14:15- Takim me Zëvendës Kryeministrin e Republikës së Kosovës z. Besnik Bislimi

15:00 – Takim me Kryetarin PDK, z.Memli Krasniqi

16:00- Takim me Kryetarin e LDK, z.Lumnir Abdixhiku

16:45- Vizitë në KFOR, takim me komandantin e KFOR

17:30- Takim me Kryetarin e AAK, z.Ramush Haradinaj

18:20- Takim me Kryetarin e lëvizjes Nisma, z.Fatmir Limaj