Liderët e huaj urojnë Ramën për fitoren e zgjedhjeve/ Macron: Franca, gjithmonë në krah të Shqipërisë në rrugën e saj evropiane! Orban: Mezi pres t’ju takoj të premten

edi rama, marta kos

TIRANË- Komisionerja e Bashkimit Europian për Zgjerimin, Marta Kos ka uruar kryeministrin Edi Rama për rezultatin e zgjedhjeve parlamentare të 11 majit.

Përmes një postimi në "X", komisionerja shkruan se pret me padurim vazhdimin e bashkëpunimit në ndjekjen e reformave të Shqipërisë për anëtarësimin e saj në BE. Më tej shkruan se momenti për zgjerimin e Bashkimit Europian është real dhe duhet shfrytëzuar.

POSTIMI I PLOTË: 

Urime Edi Rama. Pres me padurim vazhdimin e bashkëpunimit tonë të mirë në ndjekjen e reformave të Shqipërisë për anëtarësimin e saj në BE. Momenti për zgjerimin e Bashkimit Europian është real, le ta shfrytëzojmë së bashku!

ursula Von der Leyen dhe edi rama

TIRANË- Kreyministri Edi Rama i është përgjigjur Presidentes së Komisionit Europian Ursula von der Leyn, pas e uroi për fitoren e zgjedhjeve parlamentare. Më mesazhin e tij Rama theksoi se mbështetja e saj ka shumë rëndësi në këtë moment përcaktues në rrugën e Shqipërisë drejt BE.

“Faleminderit me gjithë zemër, e dashur Ursula. Fjalët e tua kanë shumë rëndësi dhe mbështetja jote ka edhe më shumë — sidomos në këtë moment përcaktues në rrugën e Shqipërisë drejt Bashkimit Europian.

Për më tepër, nuk mund të kishte moment më të përshtatshëm për të të mirëpritur në Tiranë — menjëherë pasi populli shqiptar foli me një zë të fuqishëm për ëndrrën e madhe dhe vendosmërinë e palëkundur për t’u bërë anëtarë të plotë të familjes europiane brenda kësaj dekade. E di që Shqipëria mund të mbështetet tek ti dhe tek udhëheqja jote. Dhe ti duhet ta dish që ne jemi plotësisht të vetëdijshëm: në këtë rrugë, nuk ka dhurata për të kërkuar, vetëm merita për të fituar. Prandaj po — të synojmë më të mirën që ende na pret! Gjithmonë së bashku”, ka shkruar Rama.

Edi Rama dhe Viktor Orban

TIRANË- Kryeministri Edi Rama i është përgjigjur kryeministrit hungarez Viktor Orban, pasi ai e uroi për fitoren në zgjedhje. Në mesazhin e tij Rama shprehet se mezi pret të vazhdojë punën kryeministrit hungarez. 

“Faleminderit me gjithë zemër, i dashur Viktor. Mezi pres të vazhdojmë punën tonë së bashku në interesin më të mirë të vendeve tona të bukura, si dhe për integrimin e plotë të Shqipërisë dhe Ballkanit Perëndimor në BE — një kauzë që ti e ke mbështetur prej kohësh.

Dhe po, mezi pres të të mirëpres në Tiranë për Samitin e EPC-së, pas atij takimi fantastik që ndamë në Budapest vetëm gjashtë muaj më parë — ku ti vendose një standard shumë të lartë, miku im”, shkruan Rama.

Edi Rama dhe Antonio Costa

TIRANA- Presidenti i Këshillit Evropian, Antonio Costa, ka uruar kryeministrin Edi Rama për fitoren në zgjedhjet e 11 majit. Ai uron Ramën duke thënë se rezultatet e zgjedhjeve janë mbresëlënëse dhe se pret me padurim që ta përgëzojë nesër personalisht në Tiranë.

"Urimet më të ngrohta, i dashur Edi Rama, për këto rezultate mbresëlënëse zgjedhore. Pres me padurim t'ju përgëzoj personalisht nesër në Tiranë", shkruan Costa në urimin e tij.

Edi Rama dhe Ursula von der Leyen

BRUKSEL- Presidentja e Komisionit Europian Ursula von der Leyn ka uruar kryeministrin Edi Rama për fitoren në zgjedhjet e 11 majit. Në një mesazh të shpërndarë në platformën 'X' ajo shkruan se nën udhëheqjen e Ramës, Shqipëria ka bërë përparime të mëdha drejt Bashkimit Evropian. Von der Leyen shton se Shqipëria e meriton të jetë në BE.

"Urime për fitoren në zgjedhje! Nën udhëheqjen tuaj, Shqipëria ka bërë përparime të mëdha drejt Bashkimit tonë. Le të vazhdojmë të punojmë ngushtë së bashku për reformat drejt BE-së. Shqipëria e meriton të jetë në BE! Me padurim pres t’ju uroj personalisht nesër në Tiranë", shkruan ajo.

Edi Rama dhe emmanuel macron

TIRANË- Presidenti francez, Emmanuel Mcron ka uruar kryeministrin Edi Rama për fitoren e zgjedhjeve parlamentare. Në mesazhin e tij, Macron tregon mbështetjen e palëkundur të Francës për rrugën evropiane të Shqipërisë. Gjithashtu Macron përmendi dhe takimin e të premtes, ku Shqipëria do të presë Samitin e Komunitetit Politik Evropian.

“Urime Edi Rama, mik i dashur, për fitoren tuaj në zgjedhjet legjislative. Franca do të qëndrojë gjithmonë në krah të Shqipërisë në rrugën e saj evropiane. Do të takohemi përsëri të premten për Samitin e Komunitetit Politik Evropian dhe për një vizitë që duhet të na mundësojë të forcojmë më tej partneritetin tonë!” shkruan Macron. 

Edi Rama dhe Sheikh Mohamed bin Zayed Al Nahyan

TITRANË- Presidenti i Emirateve të Bashkuara Arabe, Sheikh Mohamed bin Zayed Al Nahyan, ka uruar kryeministrin Edi Rama për fitoren në zgjedhjet parlamentare.

Sheikh Mohamed në urimin e tij shprehu besim në rritjen e vazhdueshme të marrëdhënieve dypalëshe, duke pohuar se Emiratet e Bashkuara Arabe dhe Shqipëria do të vazhdojnë të punojnë së bashku për të nxitur zhvillimin e mëtejshëm në dobi të të dy kombeve dhe popujve të tyre.

“Urime të sinqerta Kryeministrit Edi Rama për rezultatin e zgjedhjeve parlamentare në Shqipëri. Lidhjet midis Emirateve të Bashkuara Arabe dhe Shqipërisë kanë parë një rritje të fortë vitet e fundit dhe jam i bindur se së bashku mund të vazhdojmë të zgjerojmë bashkëpunimin dhe të promovojmë zhvillimin e mëtejshëm në dobi të kombeve dhe popujve tanë”, shkruan Presidenti i EBA.

Edi Rama dhe Viktor Orban

HUNGARI- Kryeministri i Hungarisë Viktor Orban, ka uruar Edi Ramën për fitoren e zgjedhjeve të 11 majit. Orban përmes një postim në “X”, shkruan se kjo ishte një fitore bindëse, ndërsa shton se pret me padurim të jetë pjesë e samitit në Tiranë më datë 16 maj.

“Urime Kryeministrit Edi Rama për fitoren e tij bindëse në zgjedhjet parlamentare të Shqipërisë. I dashur Edi, mezi pres t’ju shoh këtë të premte në Tiranë në atë që mund të jetë një Samit historik i EPC-së”, shkruan Orban.