Masakra me 12 të vrarë në Cetinje/ Autori i dyshuar vetëflijohet! Kryeministri i Malit të Zi: Ndalim i armëve në mbarë vendin, tre ditë zi kombëtare

Foto nga vendi i ngjarjes

MALI I ZI- Autoritetet në Mal të Zi, bënë sot të ditur gjetjet paraprake të hetimeve, një ditë pasi një person i armatosur vrau 12 persona, në mesin e të cilëve dy fëmijë dhe plagosi të paktën edhe katër të tjerë në qytetin e Cetinjës. Sipas autoriteteve malazeze autori i sulmit është 45 vjeçari, Aco Martinoviç, i dënuar në të kaluarën për ushtrim dhune dhe armëmbajtje pa leje. Ky është incidenti i dytë i kësaj natyre në tre vitet e fundit në këtë qytet të Malit të Zi, në veriperëndim të Podgoricës.

Sulmi i të mërkurës në Cetinjë ndodhi pas një përleshje në një lokal. Autori i sulmit, 45 vjeçari Aco Martinoviç, vrau pronarin e barit, fëmijët dhe anëtarët e familjes së tij, sipas autoriteteve malazeze. Policia njofton se i dyshuari ishte dënuar në vitin 2005 për dhunë, por dënimi ishte pezulluar dhe se së fundmi ai kishte dërguar në gjykatën e apelit edhe një dënim tjetër për armëmbajtje pa leje.

Mediat vendase njoftojnë se sulmuesi njihej për sjellje të dhunshme. Autoritetet thanë se i dyshuari e kishte kaluar ditën e mërkurë në bar me disa të njohur të tjerë kur shpërtheu përleshja. Më pas, ai shkoi në shtëpi dhe u kthye sërish në lokal i armatosur, duke hapur zjarr ndaj të pranishmëve rreth orës 5.30 të pasdites. Prokurorja e Mali të Zi, Andrijana Nastiç tha se autori i sulmit i vrau viktimat në gjashtë pika të ndryshme.

“Po i zhvillojmë hetimet në gjashtë vende të ndryshme. Janë gjashtë vende krimi. Dymbëdhjetë persona janë të vrarë, përfshirë dy fëmijë”, thotë ajo.

Sipas prokurores, katër viktimat e para u vranë në lokal. Më pas sulmuesi vazhdoi në një vend tjetër, ku vrau edhe katër persona të tjerë dhe dy fëmijët në një vend të tretë. Ai pastaj vrau edhe dy persona të tjerë në dy pika të tjera, tha prokurorja Nastiç.

Sulmuesi u largua më pas nga vendi i ngjarjes, por forcat policore malazese e zbuluan vendndodhjen e tij dhe e rrethuan atë. Sipas Ministrisë së Brendshme të Malit të Zi, ai vdiq rrugës për në spital nga plagët pasi qëlloi veten në kokë. Njëri nga të plagosurit është në gjendje kritike, sipas drejtorit të qendrës klinike të Malit të Zi, ndërsa tre të tjerë janë në gjendje të qëndrueshme.

“Ajo që mund të them sot është se gjendja e pacientëve në spitalin tonë, dy burra dhe një grua, është e qëndrueshme. Ata iu nënshtruan ndërhyrjeve kirurgjike mbrëmë. Pacienti i katërt është në gjendje tejet kritike. Ai ka pësuar lëndime në kokë”, deklaroi drejtori i spitalit, Aleksandar Radoviç.

Incidenti i të mërkurës i la banorët e Cetinjës të tronditur. Qeveria e Malit të Zi shpalli tre ditë zie kombëtare që nga e enjtja dhe të gjitha festat e Vitit të Ri janë anuluar në mbarë vendin./ VOA

Pamjet

MALI I ZI- Autoritetet malazeze do të shqyrtojnë të gjitha opsionet për të parandaluar incidente të mëtejshme të lidhura me armët, duke përfshirë ndalimin e armëve në mbarë vendin. Kryeministri malazez Milojko Spajiç tha se ky vendim vjen pasi një burrë kishte sulmuar me armë zjarri në qytetin e Cetinjes të mërkurën vrau të paktën 12 persona dhe plagosi rëndë katër të tjerë. 

“Në mbledhjen (e ardhshme) të Këshillit të Sigurisë Kombëtare, ne do të shqyrtojmë urgjentisht të gjitha opsionet, duke përfshirë një ndalim të plotë të posedimit të armëve. Armët nuk mund të jenë në rrugë dhe në duart e atyre që mund të lëndojnë të tjerët. Unë do t’i kërkoj krerëve tanë të sigurisë që nesër të ofrojnë zgjidhje konkrete për sigurinë e qytetarëve tanë”, tha Spajiç.

Policia e identifikoi vrasësin si 45-vjeçarin Aco Martinoviç. Ministri i Brendshëm i Malit të Zi, Danilo Sharanoviç tha se Martinoviç filloi të shtënat pasi shpërtheu një sherr në lokalin ku ai ndodhej. Policia thotë se ai qëlloi dhe vrau pronarin e lokalit, gruan dhe fëmijët e tij, si dhe anëtarët e familjes së tij pasi u largua nga lokali. Policia dërgoi forcat e saj speciale për të kërkuar sulmuesin në Cetinje, që ndodhet rreth 30 kilometra në veriperëndim të kryeqytetit Podgoricë. I dyshuari kreu vetëvrasje pasi policia e gjurmoi dhe e rrethoi.

MALI I ZI- Dymbëdhjetë persona, përfshirë dy fëmijë, janë vrarë dhe katër të tjerë janë plagosur në pasditen e 1 janarit në Cetinje të Malit të Zi, ka bërë të ditur prokurorja Andrijana Nastiç pas ekspertizës. I dyshuari për vrasje të shumëfishtë dhe plagosje, Aco Martinoviq, ka tentuar të bëjë vetëvrasje dhe ka ndërruar jetë gjatë transportit për në spital.

Vrasjet kanë ndodhur në pesë vendodhje të ndryshme, në lokacionin e parë dhe të dytë janë vrarë katër persona, në të tretin dy fëmijë, ndërsa në lokacionin e katërt dhe të pestë nga një person. Ministri i Punëve të Brendshme, Danillo Sharanoviç, ka thënë në një konferencë të jashtëzakonshme në mesnatë se motivi i vrasjeve është i panjohur, pasi në mesin e viktimave ishin miq dhe kumbara e Martinoviç.

Ai është thënë t'i ketë vrarë katër personat e parë në një lokal, pas një zënke që i kishte paraprirë një shoqërimi disaorësh. Katër persona janë dërguar në Qendrën Klinike të Podgoricës në gjendje kritike, sipas drejtorit të këtij institucioni, Aleksandar Radoviç.

Kryeministri malazez, Millojko Spajiç e ka përshkruar rastin si tragjedi të tmerrshme. Ai ka paralajmëruar ashpërsimin e kritereve për mbajtjen e armëve.

“Do të shqyrtojmë ndalimin e plotë të mbajtjes së armëve,” ka thënë Spajiq.

Martinoviç ishte dënuar me një vit burgim me kusht në vitin 2005 për sjellje jo të mirë, por nuk është konsideruar si person me interes për sigurinë, ka thënë ministri Sharanoviç. Ai ka treguar se në vitin 2022 tek ai janë gjetur armë dhe eksploziv, për çka është dënuar në shkallën e parë me tre muaj burgim. Qyteza e Cetinjes është rreth 30 kilometra larg Podgoricës. Qeveria e Malit të Zi i ka shpallur tri ditë zie, më 2,3 dhe 4 janar, për shkak të këtij rasti.

Koncertet për shënim të Vitit të Ri janë anuluar në Podgoricë, Budvë dhe Kotor, ndërsa kryeministri Spajiq u ka bërë thirrje edhe komunave tjera që t’i anulojnë organizimet e jashtme./REL