Përplasje në PS? Balla për mungesën e Spiropalit në seancën për Ballukun: Do të marr një vendim me grupin parlamentar. Deputetja: Thirre grupin ta diskutojmë

Taulant Balla

TIRANË- Kreu i Grupit Parlamentar të Partisë Socialiste, Taulant Balla u pyet në konferencë për shtyp lidhur me  mungesën e Elisa Spiropalit në seancën për votimin e imunitetit të Belinda Ballukut. Në përgjigje, Balla deklaroi se vendimet do i marrë së bashku me grupin parlamentar.

“Nuk i marr vetëm vendimet, i marr me grupin parlamentar. Që kështu do ta pyes dhe grupin parlamentar për këtë çështje”, tha Balla.

Ndërsa kryeministri Edi Rama kur u pyet në konferencë nga gazetarët për arsyen e mungesës së Spiropalit në seancën për votimin e imunitetit të Ballukut, tha se “Balla merret me mungesat”./Dosja.al

Elisa Spiropali dhe Taulant Balla

TIRANË- Deputetja e Partisë Socialiste, Elisa Spiropali, ka reaguar lidhur me një deklaratë të Taulant Ballës. Ky i fundit tha sot se mund të mbledhë grupin socialist për të marrë një vendim lidhur me mungesën e Spiropalit në seancën parlamentare të 12 marsit për votimin e imunitetit të Belinda Ballukut.

Përmes një postimi në Facebook, Spiropali thekson se nëse çështja kërkon konsultim me grupin parlamentar, atëherë duhet bërë pa vonesë. Spiropali gjithashtu shprehet se çdo qëndrim që del nga një diskutim i hapur, i troçtë dhe i ndërgjegjshëm, meriton respekt, pavarësisht drejtimit që merr.

Statusi Spiropalit:

Taulant, e lexova me vonesë një deklaratë tënden publike. Jam plotësisht dakord. Nëse çështja kërkon konsultim me grupin parlamentar, atëherë është pikërisht ajo që duhet bërë pa vonesë.

Thirre grupin dhe zhvillojmë një diskutim të plotë. Vendimmarrja kolektive është forca e grupit të PS dhe garancia e legjitimitetit politik. Çdo qëndrim që del nga një diskutim i hapur, i troçtë dhe i ndërgjegjshëm, meriton respekt, pavarësisht drejtimit që merr. Rëndësi ka që vendimi të jetë i menduar, i argumentuar dhe në përputhje me përgjegjësinë që kemi përballë publikut./Dosja.al