Protesta për Zvërnecin/ Protestuesit çajnë kordonin metalik, policia i sulmon me ujë. Tubimi shpërndahet në gjithë Tiranën
Pas më shumë se tre orësh, mbyllet protesta para Kryeministrisë/ Qytetarët thirrje: Nesër sërish në...
Pas më shumë se tre orësh, mbyllet protesta para Kryeministrisë/ Qytetarët thirrje: Nesër sërish në...
Tragjedia me dy viktima në Shëngjin, policia jep detaje: Të gjithë shtetas nga Kosova, tre persona në spital 3 Qersho...
“Ka forca në Shqipëri dhe jashtë që janë kundër”/ Rama: Të rreshtohesh me PS, do të thot&eum...
"Shqipëria është e shqiptarëve"/ Qytetarët mbushin rrugët e Tiranës, kërkojnë anulimin e pr...
Banka e Shqipërisë vlerëson se ky nivel qarkullimi është tregues i qartë që tregu dytësor në Shqipëri është larg të qenët i zhvilluar. Për krahasim, vendet me treg sekondar të zhvilluar raportojnë volume vetore tregtimi 10-30 herë më të larta se stoku i borxhit.
TIRANË- Tregu dytësor i bonove dhe obligacioneve të qeverisë shqiptare ngelet në përmasa të vogla dhe përpjekjet për zhvillimin e tij, deri tani, nuk kanë dhënë rezultate të rëndësishme. Banka e Shqipërisë e konsideron tregun jolikuid, me numër transaksionesh dhe volumesh të ulëta, ku bankat përgjithësisht janë aktorët kryesorë në këtë treg.
Sipas informacionit nga Banka e Shqipërisë, volumet në tregun dytësor të letrave me vlerë, në vitin e kaluar, arritën në 64.9 miliardë lekë, vlerë kjo që përbën rreth 9% ndaj totalit të stokut të borxhit të brendshëm. Volumi i tregtimit gjatë vitit 2023 rezulton me rënie nga viti i mëparshëm, në rreth 17%.
Banka e Shqipërisë vlerëson se ky nivel qarkullimi është tregues i qartë që tregu dytësor në Shqipëri është larg të qenët i zhvilluar. Për krahasim, vendet me treg sekondar të zhvilluar raportojnë volume vetore tregtimi 10-30 herë më të larta se stoku i borxhit.
Tregu me pakicë ra me 15% në vitin 2023
Tregu dytësor me pakicë i titujve qeveritarë vitin e kaluar kishte vlerën e 7.9 miliardë lekëve, ose rreth 76 milionë eurove. Ky segment i tregut u referohet transaksioneve të blerjes dhe shitjes që personat fizikë dhe juridikë kryejnë me ndërmjetësit e licencuar financiarë, kryesisht bankat tregtare.
Shifra përfshin si shitjet e titujve nga individët dhe bizneset para maturimit te ndërmjetësit financiarë, ashtu edhe transaksionet e kahut të kundërt, blerjet nga individët dhe subjektet të titujve qeveritarë të mbajtur në portofolin e ndërmjetësve financiarë.
Sipas të dhënave nga Autoriteti i Mbikëqyrjes Financiare, për vitin e kaluar, volumi i tregut dytësor me pakicë pësoi rënie me 15% krahasuar me vitin 2022. Rënia e volumeve të tregtimit dytësor duket e lidhur me uljen e ndjeshme të yield-eve gjatë vitit të kaluar, pas rritjes së fortë që kishin shënuar në gjysmën e dytë të vitit 2022. Kjo bëri që individët dhe bizneset të investonin më pak në bono dhe obligacione, si në tregun primar, edhe atë sekondar.
Pjesën më të madhe në volumet e tregtimit dytësor me pakicë e përbëjnë shitje nga portofoli i ndërmjetësit financiar (kur individi ose biznesi blejnë tituj prej bankave/shoqërive komisionere).
Këto transaksione përbënin 60% të volumit të përgjithshëm të tregtimit dytësor me pakicë vitin e kaluar. Megjithatë, vlera e tyre pësoi rënie me 23% krahasuar me vitin 2022, kryesisht për shkak të rënies së yield-eve.
Në përgjithësi, individët dhe shoqëritë tregtare në Shqipëri investimet e tyre në tregun e titujve të qeverisë vazhdojnë t’i kryejnë kryesisht në tregun primar. Vitin e kaluar, vlera e blerjeve në tregun sekondar ishte 4.73 miliardë lekë, ndërsa blerjet në tregun primar (nëpërmjet pjesëmarrjes direkte në ankande) arritën në 40.1 miliardë lekë.
Ndërkohë, transaksionet e shitjeve të titujve para afatit të maturimit nga individët dhe bizneset vitin e kaluar kishin vlerën e 3.16 miliardë lekëve, në nivele të përafërta me vitin 2022. Në fakt, në periudhat e rënies së yield-eve, shitja e titujve para maturimit mund të jetë më e leverdishme, sepse kjo nënkupton çmim më të lartë kundrejt vlerës së tyre nominale.
Mosrritja e vlerës së tregtimit në kushtet kur yield-et pësuan rënie të konsiderueshme mund të jetë gjithashtu një tregues i zhvillimit të dobët të tregut dhe njohjes së pakët së mekanizmave të tij nga investitorët e vegjël.
Tregtimi i titujve bëhet nëpërmjet ndërmjetësve financiarë (shoqërive komisionere) të licencuara nga AMF, që janë në shumicën dërrmuese banka tregtare. Në përgjithësi, ndërmjetësit financiarë nuk aplikojnë komisione për blerjen dhe shitjen e titujve në tregun me pakicë.
Klienti paguan vetëm çmimin e titullit të kuotuar nga banka që mund të jetë më i lartë (me prim) ose më i ulët (me zbritje) se vlera nominale, në varësi të ecurisë së yield-eve në treg. E ardhura nga yield-et e titujve klasifikohet si e ardhur nga investimi dhe tatohet në burim në masën 15%.
E njëjta gjë ndodh edhe me primin nga çmimi i shitjes. Në rast se një individ apo biznes e shet bonon/obligacionin përpara maturimit, me çmim më të lartë se çmimi i blerjes, diferenca mes tyre (e ardhura shtesë) tatohet si fitim nga investimi, në masën 15%.
BSH: Pse nuk zhvillohet tregu dytësor
Në një prononcim për revistën “Monitor”, Banka e Shqipërisë vlerëson se ekzistojnë një sërë arsyesh pse tregu dytësor është pak i zhvilluar.
Baza e investitorëve në tregun e titujve është e ulët, vendase, tejet e përqendruar dhe me preferenca të ngjashme për likuiditetin. Mbajtësit kryesorë të borxhit të brendshëm janë bankat të cilat zotërojnë rreth 70% të stokut total. Një pjesë e konsiderueshme e borxhit zotërohet nga individët, të cilët pothuaj tërësisht janë shtetas shqiptarë.
Edhe pse zotërimet e institucioneve financiare të tilla si fondet e investimit, fondet e pensionit, shoqëritë e sigurimit, përfshirë dhe atë të sigurimit të depozitave, kanë shënuar rritje vitet e fundit, zotërimet e tyre mbeten të ulëta, duke përbërë rreth 16% të stokut të borxhit të brendshëm.
Sipas Bankës së Shqipërisë, përgjithësisht është ky segment i tregut financiar i cili shihet si promotor në zhvillimin e tregut të kapitaleve, duke eksploruar mundësitë e tregtimit, pritshmërinë mbi normat e interesit dhe alokimit në asete të ndryshme financiare.
Ndërkohë, investitorët jorezidentë, institucionalë ose me pakicë janë pothuaj inekzistentë dhe me pjesëmarrje sporadike në tregun e brendshëm të titujve të qeverisë.
Banka e Shqipërisë vlerëson se aksesi i tyre në tregun e brendshëm do ofronte angazhim të lartë të fondeve të huaja, me ndikim në uljen e primeve të rrezikut dhe sheshim të kurbës së yield-eve, si dhe ekspertizën financiare në tregtim dhe rritjen e likuiditetit të tregut sekondar.
Nga ana tjetër, ky segment i tregut vepron në baza oportuniste, duke qenë jobesnik dhe shmangës i rrezikut, nëse shihen pasiguri mbi riskun e kreditit të vendit apo ato të normave të interesit dhe kursit të këmbimit.
Fakti që ky tip investitori është tejet sensitiv ndaj rreziqeve kërkon si parakusht për angazhim minimizimin e rreziqeve nëpërmjet ekzistencës së një tregu likuid dytësor, për të dalë nga investimi me kosto të ulët, sistem pagesash të zhvilluar dhe rreziqeve ligjore të ulëta.
Një faktor tjetër, sipas Bankës Qendrore, është se në Shqipëri mungojnë banka të mirëfillta investimi, me fokus ndërmjetësimin e produkteve financiare të normave të interesit, të tregut të parasë, aksioneve apo derivate të tyre.
Nisur nga kostot e larta të transaksioneve në tregun dytësor, dhe shpenzimet e larta financiare për mbajtjen e një stafi të aftë dhe infrastrukturë të përshtatshme për tregtimin e titujve në tregun sekondar, bankat përgjithësisht preferojnë një strategji të “mbajtjes deri në maturim” dhe rrallë përfshihen në transaksione të tregut dytësor kur shohin oportunitet financiar apo të nxitur nga nevoja për likuiditet.
Ekspertët: Dominimi i bankave në tregun e titujve nuk jep nxitje për zhvillimin e tij
Prof. Dr. Elvin Meka, Dekan në Fakultetin e Biznesit dhe Drejtësisë, Tirana Business University, mendon se zhvillimi modest i tregut dytësor të letrave me vlerë të qeverisë është një funksion i shumë faktorëve historikë, institucionalë, ekonomikë, rregullatorë dhe socialë e psikologjikë, që të marrë të gjithë së bashku kanë kushtëzuar një zhvillim shumë anemik të këtij tregu ndër vite.
“Për sa u përket faktorëve historikë, tregu dytësor i titujve qeveritarë i ka fillesat jo më larg se viti 1995, kur për herë të parë Banka e Shqipërisë nisi përpjekjet për zhvillimin e këtij tregu pranë bankave tregtare, me synim tërheqjen e individëve dhe sipërmarrjeve në këtë treg, përveç pjesëmarrjes të tyre në tregun parësor.
Më tej, tregu do të merrte një tjetër dimension me fillimin e operacioneve të tregut të hapur, po nga Banka e Shqipërisë, nëpërmjet instrumentit të Marrëveshjeve të Riblerjes (REPO) në vitin 1998, që gjithsesi ishte vetëm fillesa e tij.
Ndërkohë, do të ishte Departamenti i Bursës së Tiranës, që në maj 1996, që do të realizonte transaksionet e para në tregun dytësor të titujve qeveritarë, me tregtimin e një obligacioni 5-vjeçar midis Bankës së Shqipërisë dhe Bankës së Kursimeve, si dhe në vijim me tregtimin e bonove të thesarit mes bankave tregtare, anëtare të saj.
Bursa e Tiranës, si departament i Bankës së Shqipërisë, do të ishte pionierja e parë e realizimit të tregtimit zyrtar të transaksioneve në tregun dytësor të letrave me vlerë të qeverisë.
Më pas, tregu do të njihte zhvillime të tjera, që kishin të bënin me shitblerjen e këtyre titujve me të drejta të plota mes bankave, si dhe zgjerimin e tregut me pakicë të këtyre titujve, midis institucioneve dhe individëve, por gjithsesi në vëllime shumë modeste krahasuar me tregun parësor, si dhe në një numër shumë të kufizuar transaksionesh në vit”, – thotë ai.
Në këndvështrimin institucional, sipas tij, tregu financiar shqiptar ka qenë gjithmonë një treg shumë i cekët dhe me vëllime të kufizuara transaksionesh.
“Kjo ka ardhur jo vetëm për shkak të dominimit absolut të këtij tregu nga bankat tregtare, por dhe mungesës thuajse totale të ndërmjetësve financiarë jo-banka në këtë treg, për arsye biznesi, por dhe ato rregullatore.
Nga ana tjetër, tregut financiar shqiptar i kanë munguar thuajse gjatë gjithë kohës, alternativa të tjera investimi në tituj dhe letra me vlerë, nga sektori privat, duke i kthyer titujt qeveritarë në alternativën e vetme të investimit në tregun financiar, si për bankat dhe institucionet, ashtu dhe për individët.
Nga ana tjetër, kjo mungesë alternativash dhe problemi strukturor që sektori bankar në Shqipëri ka pasur që nga 1992-shi, pra ai i zhbalancimit të theksuar midis depozitave dhe huave (ku gjithmonë vëllimi i depozitave ka tejkaluar të paktën me 1.7 herë më shumë sesa totali i huave) i ka kushtëzuar bankat të përdorin shumë rrallë tregun dytësor të titujve qeveritarë, duke maksimizuar investimet e tyre në tregun parësor të këtyre titujve.
Nuk duhet harruar se, titulli i parë privat u tregtua në tregun shqiptar të titujve vetëm në vitin 2023”, – thotë z. Meka.
Ai mendon se aspekti rregullator i tregut të titujve në Shqipëri ka favorizuar historikisht bankat në ndërmjetësimin financiar në këtë treg, qoftë nga pikëpamja e organizimit të këtij ndërmjetësimi, qoftë dhe nga pikëpamja rregullatore e tij.
“Praktikisht, edhe legjislacioni aktual bllokon nga pikëpamja praktike çdo lloj sipërmarrje, që nuk është bankë, për të hyrë në tregun e titujve qeveritarë, por dhe në tregun dytësor të titujve në përgjithësi.
Legjislacioni ka favorizuar dhe po favorizon në vijim bankat tregtare, për të ofruar thuajse në pozita monopol ndërmjetësimin në tregun dytësor të titujve, ndërkohë që kjo krijon një situatë paradoksale, pasi bankat tregtare, për nga natyra e tyre e biznesit, janë thelbësisht të interesuara për të tërhequr klientë që sjellin depozita në bankë dhe jo që të kërkojnë shërbime që nuk sjellin fonde në arkat e tyre, ose ca më keq, të ofrojnë shërbime dhe produkte që u largojnë atyre depozitat e klientëve nga banka.
Në kushte të tilla, me këtë legjislacion që ka Shqipëria, teknikisht nuk mund të pritet që të ketë promovim dhe zhvillim të tregut dytësor të titujve, qofshin ata qeveritarë, ose privatë”, – vëren z.Meka.
Së fundi, po jo më pak të rëndësishëm, në këtë cektësi të tregut të titujve qeveritarë, sipas tij, janë dhe faktorët socialë dhe psikologjikë, që lidhen me individin shqiptar, si investues dhe klient i këtij tregu.
“Për arsye objektive dhe historike, por dhe të mungesës së përhershme të alternativave investuese, përveç depozitave bankare, që kanë qenë të njohura që gjatë periudhës së viteve ’20 në Shqipëri, individët dhe investuesit shqiptarë kanë investuar masivisht në depozita bankare dhe shumë më pak në tituj qeveritarë.
Pavarësisht rritjes së fortë të investimeve të publikut (individëve) në tituj qeveritarë, sidomos vitet e fundit, niveli i edukimit financiar, por dhe shumë faktorë psikologjikë kanë kushtëzuar një pjesëmarrje minimale të tyre në këtë treg.
Për më tepër, publiku shqiptar mbetet masivisht i painformuar mbi funksionimin e tregut dytësor, ndërkohë, që duke qenë një treg monopol nga bankat, tarifat e ndërmjetësimit janë tërësisht dekurajuese për një përdorim të zgjeruar të tregut dytësor, i cili përdoret nga publiku më shumë në situata emergjente, sesa për menaxhim financiar të investimeve të tyre”, – thotë ai.
Mungesa e tregut dytësor nuk mundëson një çmim të drejtë
Zhvillimi shumë i dobët i tregut dytësor shtron probleme për një funksionim optimal të tregut financiar, në radhë të parë në përcaktimin e një çmimi të drejtë të titujve financiarë në çdo kohë.
Sipas Bankës së Shqipërisë, mungesa e një tregu dytësor likuid, ku çmimet e titujve përcaktohen lirshëm dhe në mënyrë të shpeshtë, cenon besueshmërinë e kurbës së yield-eve, e cila do të shërbente si burim vlerësimi kontabël për portofolat që investitorët e ndryshëm si bankat apo institucionet financiare raportojnë te palët e interesuara.
Mungesa e çmimeve të besueshme të tregut sekondar e bën të vështirë orientimin e tregut në përcaktimin e çmimit të emetimeve të reja në tregun primar, rrit ndjeshëm rrezikun e primit të likuiditetit dhe dobëson sinjalet që politika monetare merr nga një kurbë e besueshme e yield-eve të qeverisë për pritshmërinë e tregut mbi normat e interesit.
Prandaj, Banka e Shqipërisë vlerëson se përpjekjet për të zhvilluar tregun sekondar duhet të jenë të gjithanshme, pasi përfitues janë të gjithë aktorët si qeveria, bankat, banka qendrore dhe investitorë të tjerë strategjikë si fondet e investimeve etj.
Likuiditeti më i lartë i tregut sekondar mund t’i lejojë investitorët të rrisin kohëzgjatjen e portofolit të tyre, të arrijnë kthim më të lartë, duke sjellë njëkohësisht dhe një sheshim të kurbës së yield-eve, dhe në këtë kuptim, duke ulur koston e huamarrjes së qeverisë.
Projekti i titujve referencë, rezultate të zbehta
Në vitin 2018, Ministria e Financave, në bashkëpunim me Bankën e Shqipërisë dhe pesë banka tregtare në vend, nisën zbatimin e projektit të titujve referencë.
Pesë bankat tregtare pjesëmarrëse në projekt u angazhuan të marrin rolin e market makers (zhvilluese të tregut), me kuotimin e vazhdueshëm të titujve referencë, sipas disa kritereve të përcaktuara që lidhen me minimumin e volumit të kuotuar dhe diferencës maksimale të çmimit të blerjes dhe të shitjes, në këmbim të privilegjit të dhënë nga Ministria e Financave për pjesëmarrje ekskluzive në ankandet primare të titujve referencë për blerjen e tyre për nevoja vetjake, apo për klientët e tyre.
Aktualisht, lista e titujve referencë përfshin obligacione me kupon fiks dhe me maturim 3-vjeçar, 4-vjeçar dhe 5-vjeçar,
Në analizën e Bankës së Shqipërisë, për një periudhë 2-vjeçare nga fillimi i projektit, tregu sekondar i titujve të qeverisë dhe ai i titujve referencë shënoi rritje progresive të kënaqshme, ku u vunë re si përmirësime të volumeve të tregtimit, ashtu dhe përmirësime në përthithjen e këtyre instrumenteve në tregun primar me përmirësim të raporteve të mbulimit dhe pjesëmarrje të lartë të porosive të klientëve ndërmjetësuar nga bankat krijuese të tregut.
Gjithashtu, u vërejt një dinamizëm i lartë ndërmjet sinjaleve të lëshuara nga tregu sekondar dhe rezultateve të ankandeve në tregun primar, por zhvillimet e mëvonshme kanë diktuar një rënie të dinamizmit të tregtimit dytësor të titujve referencë në veçanti dhe tregut sekondar në përgjithësi. Megjithatë, gradualisht efekti i këtij projekti duket se ka ardhur duke u zbehur.
Ngjarje të tilla si tërmeti i nëntorit 2019 duke vijuar situatën e pandemisë, diktuan nevoja të larta të huamarrjes së qeverisë në tregun e brendshëm dhe jo vetëm në vitet pasuese, duke ezauruar në një masë të konsiderueshme kërkesën në tregun primar dhe duke lenë hapësira të ulëta në rritjen e kërkesës në tregun sekondar.
Pandemia, nga ana tjetër, çoi në kufizime lëvizjesh dhe punë me staf të reduktuar të ndërmjetësve financiarë dhe në këtë drejtim dhe në incentive të ulët dhe rënien e volumeve të tregtimit. Gjithashtu, procesi i bashkimit të disa bankave gjatë viteve të fundit, mendohet të jetë një tjetër faktor në uljen e numrit të transaksioneve në tregun sekondar të titujve të qeverisë.
Sipas Bankës së Shqipërisë, me pakësimin e numrit të bankave ulet potenciali i rotacionit të bankave krijuese të tregut nga banka të tjera, në rast të një sistemi që vlerëson me pikë dhe zëvendëson përforcuesin më të dobët me një bankë tjetër aspirante për të qenë krijuese tregu.
Mbështetur në të dhënat e Ministrisë së Financave, për vitin 2023, vlera totale e tregtimit dytësor të titujve referencë ishte rreth 7.9 miliardë lekë, në rritje me 59% krahasuar me një vit më parë. Megjithatë, matur si pjesë ndaj tregut dytësor, veprimet me titujt referencë përbëjnë rreth 12% të volumit total të tij.
BSH: Rritja e tregut kërkon zgjerim të bazës së investitorëve
Në këndvështrimin e Bankës së Shqipërisë, faktor kyç për zhvillimin e tregut të titujve të qeverisë, përfshirë atë sekondar, do të ishte zgjerimi i bazës së investitorëve. Zgjerimi i bazës së investitorëve lidhet më së shumti sesa e aftë është qeveria dhe autoritetet rregullatore në rritjen e besueshmërisë dhe krijimin e një mjedisi pozitiv dhe tërheqës investues.
Vitet e fundit, autoritetet rregullative kanë ndërmarrë përmirësime ligjore për hartimin e një ligji të ri mbi tregun e kapitaleve; përmirësimeve në drejtim të sistemit të pagesave për emetimin dhe shlyerjen e titujve dhe regjistrimit elektronik të mbajtësve të borxhit, identifikimit unik me një numër ISIN ndërkombëtar, i cili pritet të shërbejë si në rritjen e besimit të investitorëve jorezidentë, ashtu dhe në lidhjen e depozitarit qendror të titujve të emetuar në tregun e brendshëm me ata ndërkombëtarë.
Së fundi, Banka e Shqipërisë, në bashkëpunim me AMF dhe Ministrinë e Financave dhe Ekonomisë, është duke ndërmarrë hapat e nevojshëm për fillimin e një projekti të rëndësishëm me EBRD, nëpërmjet të cilit do të identifikohen nevojat për ndryshimet në aktet ligjore që rregullojnë veprimtarinë në tregjet financiare, me synim bërjen e ambientit të tregtimit më të sigurt, si për investitorët e huaj, edhe për ata vendas.
Pavarësisht sa më sipër, Banka e Shqipërisë vlerëson se bankat në funksionin e tyre ndërmjetësues duhet të rrisin më tej përpjekjet për zgjerimin e klientëve nëpërmjet ofrimit të këshillimit, kostove më të ulëta financiare të shërbimeve dhe edukimit financiar.
Gjithashtu, nevojitet që bankat apo aktorë të tjerë të tregut të fokusohen më shumë në drejtim të zhvillimit të tregut sekondar, nëpërmjet eksplorimit të oportuniteteve fitimprurëse nga marrja e pozicioneve në bazë të pritshmërisë mbi normat e interesit/yield-eve për një horizont kohe të përcaktuar, duke mos qenë thjesht investues i fondeve, por dhe administrues i tyre, bazuar në rreziqet e perceptuara të normave të interesit dhe kreditit.
Eksperti i tregjeve financiare, Elvin Meka, mendon se, që tregu dytësor të mund të thellohej dhe të zhvillohej më tej, duhej pikësëpari që të ridimensionohet kuadri ligjor, i cili duhet të hapë tregun për konkurrencë.
“Aktualisht dhe teknikisht, tregu dytësor mbetet monopol i bankave tregtare, që nuk kanë nxitje për të zhvilluar një treg të tillë, pasi shkon kundër natyrës së tyre të biznesit.
Nëse nën emrin e integrimit të Shqipërisë në BE, legjislacioni që rregullon funksionimin e tregut të titujve do të vijojë të mbetet i tillë, për mungesën e pjesëmarrjes së institucioneve dhe sipërmarrjeve të ndryshme nga bankat, atëherë Shqipëria do të duhet të presë gjatë deri në një zhvillim të qenësishëm të këtij tregu.
Minimalisht, rregullatorët mund të konsiderojnë lehtësimin e rregullave për pjesëmarrjen si ndërmjetës në këtë treg dytësor të institucioneve financiare jo-banka, të cilat aktualisht mbikëqyren dhe licencohen si nga Banka e Shqipërisë, ashtu dhe nga AMF.
Kjo do të mundësonte hapje të tregut dhe mundësi më të mëdha për konkurrencë dhe tarifa konkurruese e të ulëta ndërmjetësimi për individët dhe pjesëmarrësit në treg. Pa konkurrencë nuk mund të shpresohet zhvillim i këtij tregu”, – thotë z.Meka.
Sipas tij, duhet që legjislacioni të mundësojë aktivizimin e këtij tregu nëpërmjet Bursës Shqiptare të Titujve – ALSE, që do të mundësonte jo vetëm vizibiliet më të lartë institucional për tregun, por do të tërhiqte dhe më shumë investues dhe pjesëmarrës tregu, të interesuar për të ofruar shërbime ndërmjetësimi përmes platformës së ALSE.
Marrë nga Monitor.al
Foto Ilustruese TIRANË- Ndonëse sektori i qirasë ditore është në zgjerim për shkak të lulëzimit të turizm...
VLORË- Qyteti i Vlorës kryeson listën e 10 qyteteve me numrin më të lartë të pronave të publikuara për qira ditor...
TIRANË- Zgjerimi i sektorit të qirasë ditore, i nxitur nga fluksi i turistëve të huaj, po rrit ndjeshëm të ardhurat e e pro...
Foto ilustruese TIRANA- Agjencia e Prokurimit Publik u ka kërkuar institucioneve që të respektojnë kërkesat ligjore për rapor...
Foto ilustruese TIRANA- Në vitin 2022, kanë qenë 113.460 ndërmarrje ekonomike aktive në sektorë të ndrys...
Mbledhja e Konstituencës së Fondit Monetar Ndërkombëtar dhe Bankës Botërore TIRANA- Rritja e ulët e produktivitetit, efe...
Foto ilustruese TIRANA- Presionet e huaja inflacioniste i janë rikthyer rritjes gjatë tremujorit të fundit të vitit 2023. Sipas Bank&eu...
Foto ilustruese TIRANA- Viti 2023 mund të cilësohet si një vit i mirë hidrik ku prodhimi neto vendas arriti rreth 8.8 milionë MWh ...
Gent Sejko TIRANË- Guvernatori i Bankës së Shqipërisë, Gent Sejko ka qenë i pranishëm në takimin për konstitue...
banka e shqiperise TIRANË- Banka e Shqipërisë vlerëson se rreziqet e rritjes së çmimeve në ekonominë shqiptare pa...
